ميحايل حودوركوۆسكيدىڭ «دوسە» (قۇجاتتار) ورتالىعى «مولدوۆانى ساياسي جانە ەكونوميكالىق جاۋلاۋ ستراتەگيالىق جوسپارى» دەپ اتالاتىن رەسەي پرەزيدەنتى اكىمشىلىگىنىڭ 2021 جىلدىڭ كۇزىندە جاساعان قۇجاتىن جاريالادى.

«رەسەي فەدەراتسياسىنىڭ مولدوۆا رەسپۋبليكاسىنا بايلانىستى ستراتەگيالىق ماقساتتارى» اتتى قۇجاتتى جۋرناليستىك كونسورتسيۋم مۇشەلەرى بىردەي ۋاقىتتا الدى، ونىڭ قۇرامىنا Süddeutsche Zeitung (گەرمانيا), RISE (مولدوۆا), Delfi (ەستونيا), Kyiv Independent (ۋكراينا) بار»،- دەلىنگەن باسىلىمدا.

جۋرناليستەر العان قۇجاتقا سايكەس رەسەيدىڭ مولدوۆاعا قاتىستى نەگىزگى ماقساتتارىنىڭ ءبىرى –كيشينەۆتى ۇقشۇ-عا كىرۋگە ماجبۇرلەۋ جانە ەاەو-نى كەڭەيتۋ.

سونداي-اق، رەسەي مولدوۆانى ناتو مەن ەو-نىڭ ىقپالىنان شىعارىپ، ءبىلىم بەرۋ باعدارلامالارى ارقىلى ەلدەگى رەسەيشىل كوزقاراستى كۇشەيتۋدى جوسپارلاعان ەكەن. قۇجاتتىڭ مىندەتى: مولدوۆانىڭ رەسەيشىل ساياساتكەرلەرىن قولداۋ.

«دوسە» ورتالىعى «بۇل قۇجاتتى سوعىس باستالعانشا كرەملدە ۋكراينا ماسەلەلەرىمەن اينالىسقان پرەزيدەنت اكىمشىلىگى باسشىسىنىڭ ورىنباسارى دميتري كوزاكتىڭ قاراماعىنداعىلار جاساعان» دەپ مالىمدەدى.

كەيىنگى كەزدەرى مولدوۆادا رەسەيشىل «شور» وپپوزيتسيالىق پارتياسى نارازىلىق اكتسيالارىن بەلسەندى وتكىزىپ كەلەدى.

اكتسياعا قاتىسۋشىلار پرەزيدەنت مايا ساندۋدى «وتستاۆكاعا كەتسىن» دەپ ۇرانداعان بولاتىن. اقپان ايىنىڭ ورتاسىندا ساندۋ رەسەيدى «مەملەكەتتىڭ ىشكى ىستەرىنە ارالاسۋعا تىرىستى» دەپ ايىپتادى.

Abai.kz