بۇۇ-نىڭ ادام قۇقىقتارى جونىندەگى كەڭەسى رەسەيدىڭ ۋكراينا جەرىندە كوپتەگەن اسكەري قىلمىس جاسادى، ءتىپتى ادامزاتقا قارسى قىلمىستار جاساعان دەپ جاريالادى.

«رەسەي اسكەرى ماريۋپولدەگى دراما تەاترىنا شابۋىل جاساپ، بەيبىت تۇرعىنداردى ولتىرگەن، ازاپتاعان، توناعان. بۇلاردىڭ ءبارى اسكەري قىلمىسقا جاتادى. گۋمانيتارلىق سيپاتتاعى قىلمىستار رەسەيدىڭ مىڭداعان ۋكرايندى جارىقسىز، جىلۋسىز، سۋسىز قالدىرعانى – ادامزاتقا قارسى قىلمىستارعا تەڭەستىرىلۋى مۇمكىن»، - دەلىنگەن باياندامادا.

باياندامانى دايىنداۋ كەزىندە بۇۇ كوميسسياسىنا قاتىسۋشىلار ۋكراينانىڭ 56 ەلدى مەكەنىنە بارىپ، 348 ايەل مەن 247 ەر ادامنان سۇحبات العان. سونىمەن قاتار، تەرگەۋشىلەر قاماۋدا ۇستاۋ مەن ازاپتاۋ، جاپپاي جەرلەۋ ورىندارىن تەكسەردى.

سونداي-اق، كوميسسيا ءتورت وبلىستىڭ: كيەۆ، چەرنيگوۆ، حاركوۆ جانە سۋمانىڭ وككۋپاتسيالانعان اۋداندارىندا جاسالعان ءولتىرۋ، زاڭسىز ۇستاۋ، ازاپتاۋ، زورلىق-زومبىلىق، زورلاۋ جانە باسقا دا قىلمىستاردى قۇجاتتادى.

باياندامادا ۋكراينانىڭ بەيبىت ازاماتتارىن رەسەي فەدەراتسياسىندا زاڭسىز ۇستاۋ جانە دەپورتاتسيالاۋ جاعدايلارى دا اتاپ وتىلگەن، ولاردىڭ كوپشىلىگى ءالى كۇنگە دەيىن حابار-وشارسىز.

«انىقتالعان گۋمانيتارلىق قۇقىق بۇزۋشىلىقتار، سونىڭ ىشىندە اسكەري قىلمىستار ءۇشىن رەسەي فەدەراتسياسىنىڭ قارۋلى كۇشتەرى جاۋاپكەرشىلىك ارقالايدى»، - دەلىنگەن حابارلامادا.

سونىمەن قاتار، كوميسسيا ۋكراينا قارۋلى كۇشتەرى اسكەرلەرىنىڭ جاساعان «ازداعان قۇقىق بۇزۋشىلىقتارىن» اتادى، سونىڭ ىشىندە رەسەيلىك اسكەري تۇتقىندارعا وق اتقان، ازاپتاعان ەكى وقيعا اسكەري قىلمىسقا جاتقىزدى.

كوميسسيا بارلىق انىقتالعان قۇقىق بۇزۋشىلىق پەن قىلمىستى دالەلدەپ، كىنالىلەردى ۇلتتىق جانە حالىقارالىق دەڭگەيدە قىلمىستىق جاۋاپكەرشىلىككە تارتۋدى ۇسىندى.

«دەگەنمەن ۋكرايناداعى ادام قۇقىقتارىنىڭ بۇزىلۋىن تەرگەۋدە رەسەي ارمياسىنىڭ ەلدە گەنوتسيد جاساعانى تۋرالى ەشقانداي دالەل تابىلعان جوق»، - دەدى بۇۇ-نىڭ ۋكرايناداعى بۇزۋشىلىقتاردى تەرگەۋ جونىندەگى تاۋەلسىز حالىقارالىق كوميسسياسىنىڭ باسشىسى ەريك مەسە.

قۇجات حالىقارالىق قاۋىمداستىققا قىلمىس ءۇشىن جاۋاپتىلاردى سوتقا تارتۋعا كومەكتەسۋى كەرەك.

Abai.kz