باس ءمۇفتي تيكتوكتاعى يمامدارعا ەسكەرتۋ جاسادى
الەۋمەتتىك جەلىدە حالىقتىڭ سۇراقتارىنا جاۋاپ بەرىپ وتىراتىن ءدىن قىزمەتكەرلەرى تۋرالى قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى تاعانۇلى Qasqa Jol Youtube ارناسىندا جۋرناليست اباي سەيفۋللاعا بەرگەن سۇحباتىندا ايتتى.
«قازىر تيكتوكتا تىكەلەي ەفيردە وتىراتىن يمامدار تانىمال. كەيدە قيىس كەتىپ جاتسا ءبىرىن-ءبىرى تۇزەپ جاتادى. وسى ۇستازداردىڭ بارلىعىن ءدىني باسقارما باقىلاي ما؟» دەپ سۇرادى جۇرگىزۋشى.
«قازىر بىلىكتى ۇستازدارىمىز، عالىمدارىمىز كوبەيىپ كەلەدى. كەيدە، ءيا، شاتاسىپ تا جاتادى. بىراق شاريعاتتا بۇل شاتاسۋعا بولادى دەگەن ءسوز ەمەس. وسىنى ۇمىتپاۋ كەرەك. ءدىني باسقارما ءار كەزدە دە مۇنى يمامدارعا، ۇستازدارعا ەسكەرتىپ وتىرادى. بايقاڭىزدار، اسىعىستىق جاساماڭىزدار، بىلەتىن دۇنيەنى ايتىڭىزدار. بىلمەيتىن بولسا، كەيىنگە قالدىرىپ، انىقتاپ بارىپ ايتىڭىزدار دەپ ەسكەرتىپ وتىرامىز. حالىققا اللاھتىڭ قۇرانىن قاتە ايتساق، ول قۇدايدىڭ اماناتىنا قيانات قىلعانىمىز. پايعامبار سۇننەتىن دە قاتە ايتپاۋ كەرەك. ەڭ ۇلكەن نارسە – بىلمەگەنىڭدى «بىلمەيمىن، انىقتاپ، كەيىن ايتىپ بەرەيىن» دەۋ»، - دەپ ايتتى ناۋرىزباي تاعانۇلى.
«ءبىز ءدىني باسقارماعا شاقىرىپ الىپ، ناسيحات ايتىپ جاتىرمىز. نەمەسە ءبىزدىڭ نايب-مۇفتيلەرىمىز، ۋاعىز-ناسيحاتقا جاۋاپتى ازاماتتار وڭىرلەرگە بارعان كەزدە قاتەلەسكەن ءدىن قىزمەتكەرلەرى بولسا، جولىعىپ، ناسيحات جۇمىستارى جۇرگىزىلىپ جاتىر. ءدىن قىزمەتكەرلەرىنە ايتارىمىز – ەگەر ءبىر سۇراقتى بىلمەسەڭىز، قىسىلىپ، ۇيالىپ قاتە جاۋاپ بەرگەننەن «بىلمەيمىن، كەيىن ايتىپ بەرەيىن» دەگەن ابزال. ەلدى، جاماعاتتى شاتاستىرۋ – كۇنا. ال يمامدار ءبىرىن-ءبىرى الەۋمەتتىك جەلىدە سىناعاننان گورى، قاتەلىكتى ۋشىقتىرۋدان گورى، الدىن الىپ وتىرعان دۇرىس»،- دەپ ءتۇسىندىردى باس ءمۇفتي.
سۇحباتتىڭ تولىق نۇسقاسىن مىنا سىلتەمە ارقىلى كورۋگە بولادى.
;t=4306s
Abai.kz
