حالىق ساناعىنىڭ رەسمي قورىتىندىسى بويىنشا، جيىرما ميلليونعا جۋىق قازاقستاندىقتىڭ شيرەگىنەن كوبى وزگە ۇلت وكىلدەرى ەكەن. جالپى سانى بەس جارىم ميلليوننان اسىپ جىعىلادى.

تەك ون التى دياسپورانىڭ ارقايسىسى كەمى وتىز ءۇش مىڭدى قۇرايدى. ال باسقالارىنىڭ سانى – ۇلتتىڭ كورسەتپەگەندەردى قوسا العاندا، شامامەن 265 مىڭنىڭ اينالاسىندا. بۇل كورسەتكىشتىڭ ءوزى قازاقستاندا تۇراتىن ۇلتتار مەن ۇلىستارعا تەڭ قۇقىق بەرىلگەنىن ايعاقتايدى.

1995 جىلى، ناۋرىزدىڭ ءبىرى كۇنى قازاقستان رەسپۋبليكاسىنىڭ پرەزيدەنتىنىڭ جارلىعىمەن قۇرىلعان مەملەكەت باسشىسى جانىنداعى كونسۋلتاتيۆتى-كەڭەسشى ورگان – قازاقستان حالقى اسسامبلەياسى ەلىمىزدىڭ ىنتىماقتاستىعى مەن تۇراقتىلىعىن ساقتاۋعا ات سالىسىپ، دامۋىنا ۇلەس قوسىپ كەلەدى. پارلامەنتتەگى توعىز ورىن وسى اسسامبلەيا مۇشەلەرىنە ءتيىستى.

دەمەك، زاڭداردى ۇسىنۋ مەن تالقىلاۋدا، قايتا قاراۋ مەن ماقۇلداۋلاردا اتالمىش ۇيىمنىڭ ايتارلىقتاي ۇلەسى بار.

2015 جىلدى «قازاقستان حالقى اسسامبلەياسى جىلى» دەپ اتاپ وتتىك. بۇل جىلى وتكىزىلگەن شارالاردىڭ باسىم بولىگى بۇكىلقازاقستاندىق مادەنيەتتى دامىتۋ، ەل ازاماتتارىن ورتاق مۇددەگە جۇمىلدىرۋ، جاستاردى پاتريوتتىققا تاربيەلەۋ، ەتنوسارالىق بايلانىستاردى كۇشەيتۋگە باعىتتالدى. وسى ءىستىڭ باسى-قاسىندا قحا ءجۇردى. ونىڭ مىندەتى دە سول – ءار قازاقستاندىق ەتنيكالىق ءھام ءدىني ەرەكشەلىگىنە قاراماستان كونستيتۋتسياعا ساي ازاماتتىق قۇقىقتارى مەن بوستاندىقتارىن تولىق پايدالانا الاتىنداي جاعداي جاساۋ، باۋىرلاستىققا، سىيلاستىققا، ءوزارا تۇسىنىسۋگە مۇرىندىق بولۋ. ارينە، مەملەكەتىمىزدە ەلىمىزدىڭ بارلىق ەتنوستارىنىڭ ءدىنى مەن ءداستۇرىن، مادەنيەتىن ساقتاۋعا دا، دامىتۋعا دا قاجەتتى جاعدايلار جاسالعان. ال اسسامبلەيا اتقارۋعا ءتيىس شارۋالار قازاقستاننىڭ ەتنوسارالىق قاتىناستار ماسەلەلەرىن ءتيىمدى شەشۋىنە ىقپال ەتەدى.

بۇدان بولەك، ءار جىلدارى بولعان توتەنشە جاعدايلاردىڭ كەزىندە اپاتقا ۇشىراعان ايماقتارعا كومەك كورسەتۋدە دە اسسامبلەيا قالىس قالعان ەمەس. سان الۋان الەمدىك دودالاردا دا قحا وكىلدەرى تۋىمىزدى كوكتە جەلبىرەتىپ، مەرەيىمىز ءوسىرىپ، الاپامىزدى اسىرىپ كەلە جاتقانىنا تاريح كۋا. ەلىمىزدىڭ ءار وڭىرىندەگى تەاترلاردا دا ءتۇرلى ەتنوستاردىڭ ۇلەس سالماعى بار. دالىرەك ايتساق، 85 تەاتردىڭ 16-سى دياسپورالارعا تيەسىلى (ا.م.گوركي اتىنداعى قوستاناي وبلىستىق ورىس دراما جانە قۋىرشاق تەاترى ،ا.وستروۆسكي اتىنداعى باتىس قازاقستان وبلىستىق ورىس دراما تەاترى، اقمولا وبلىستىق ورىس دراما تەاترى، جامبىل وبلىستىق ورىس دراما تەاترى، ك.س.ستانيسلاۆسكي اتىنداعى قاراعاندى وبلىستىق ورىس دراما تەاترى، م.گوركي اتىنداعى مەملەكەتتىك اكادەميالىق ورىس دراما تەاترى، م.يۋ.لەرمونتوۆ اتىنداعى مەملەكەتتىك اكادەميالىق ورىس دراما تەاترى، مەملەكەتتىك نەمىس دراما تەاترى، مەملەكەتتىك ق.قوجامياروۆ اتىنداعى ۇيعىر مۋزىكالىق كومەديا تەاترى، ن.پوگودين اتىنداعى سولتۇستىك قازاقستان وبلىستىق ورىس دراما تەاترى، ن.ساتس اتىنداعى ورىس مەملەكەتتىك اكادەميالىق بالالار مەن جاسوسپىرىمدەر تەاترى، رەسپۋبليكالىق مەملەكەتتىك اكادەميالىق كورەي مۋزىكالىق كومەديا تەاترى، ف.دوستوەۆسكي اتىنداعى سەمەي مەملەكەتتىك ورىس دراما تەاترى، شىمكەنت قالالىق ورىس دراما تەاترى، شىمكەنت قالالىق وزبەك دراما تەاترى).
بيىل قحا قۇرىلعانىنا 28 جىل تولدى. وسى ارالىقتا اسسامبلەيانىڭ وتىز ءبىر سەسسياسى وتكىزىلدى. وتىز ءبىرىنشى سەسسيا بىلتىر «ەل بىرلىگى – جاڭارعان قازاقستاننىڭ تىرەگى» دەگەن اتپەن وتكەن بولاتىن. كۇنى بۇگىن مەملەكەت باسشىسى قازاقستان حالقى اسسامبلەياسىنىڭ كەزەكتى ءXXحىI سەسسياسىن شاقىرۋ تۋرالى وكىمگە قول قويدى. كەزەكتى سەسسيا «ادىلەتتى قازاقستان: بىرلىك، تۇراقتىلىق، دامۋ» تاقىرىپ اياسىندا وتەدى.
ءيا، قازاق حالقى ءتۇرلى ناۋبەت كەزىندە قۇشاق جايا قارسى العان ۇلتتار مەن ۇلىستاردىڭ بۇگىنگى ۇرپاقتارى ءھام حالقىمىزدىڭ قاتارىن كەيىننەن كەلىپ تولىقتىرعان ازاماتتار ءبىر جاعادان باس، ءبىر جەڭنەن قول شىعارىپ، قازاقستاننىڭ دامۋى ءۇشىن ايانباي ەڭبەك ەتسە، ءتۇرلى-ءتۇرلى دەسترۋكتيۆتى توپتاردىڭ تەرىس پيعىلىنا توسقاۋىل بولىپ، ەكسترەميزمدەر مەن تەراريزمدەرگە تويتارىس بەرىپ، بىرلىك تۋىن نىق ۇستاسا – ادىلدىك دەگەنىمىز سول. سوندا عانا تاۋەلسىزدىگىمىز تۇراقتى، باقىتىمىز باياندى بولماق. سوندا عانا دامۋدىڭ داڭعىل جولىنا ءتۇسىپ، باقۋاتتى بولاشاققا باعدار الامىز.

Abai.kz