ترامپتىڭ ءىزىن باسا، رەسەيباسى پۋتين دە الىپ-ۇشىپ بەيجىڭگە بارعان. قىتاي ليدەرى شي رەسەيباسى ءپۋتيننىڭ «ءسىبىر كۇشى - 2» گاز قۇبىرىن سالۋ تۋرالى وتىنىشىنەن تاعى دا باس تارتتى!

رەسەي پرەزيدەنتىنىڭ ءباسپاسوز حاتشىسى پەسكوۆتىڭ ايتۋىنشا: پۋتين مەن شي 10 جىلدان استام ۋاقىت بويى تالقىلاپ كەلە جاتقان جانە قىتايعا گاز جەتكىزۋ كولەمىن جىلىنا 100 ميلليارد تەكشە مەترگە دەيىن ارتتىرۋدى كوزدەيتىن «ءسىبىر كۇشى - 2» جوباسى بويىنشا ءالى دە كەلىسىمگە كەلمەگەن.

ۇنجىرعاسى تۇسكەن پەسكوۆ بۇل جايلى: «كەيبىر تۇستاردى ءالى دە پىسىقتاۋ كەرەك»، — دەپ قىسقا قايىردى. پەسكوۆتىڭ سوزدەرىنەن ۇققانىمىز - تاراپتار جوبانىڭ ماڭىزى، ءمانى بويىنشا ءوزارا تۇسىنىسكەن. دەيتۇرا، ونى ىسكە اسىرۋ مەرزىمدەرى تۋرالى ناقتى ۋاعدالاستىققا قول جەتكىزە الماعان.

پۋتين بەيجىڭگە وزىمەن بىرگە اۋقىمدى دەلەگاتسيا ەرتىپ بارعان ەكەن. ونىڭ ىشىندە: 5 ۆيتسە-پرەمەر، 8 مينيستر جانە ەڭ ءىرى مەملەكەتتىك كومپانيالاردىڭ باسشىلارى، سونىڭ ىشىندە «گازپروم» مەن «روسنەفت» باسشىلارى بار.

كەلىسسوزدەر قورىتىندىسى بويىنشا: ماسكەۋ مەن بەيجىڭ 40 قۇجاتقا قول قويعان. بىراق ولاردىڭ ەشقايسىسىندا «ءسىبىر كۇشى - 2» دە، مۇناي-گاز سالاسىنداعى ىنتىماقتاستىق تا ايتىلماعان.

Financial Times باسىلىمىنىڭ جازۋىنشا: جاڭا گاز قۇبىرى بويىنشا باستى كەدەرگى — گازدىڭ باعاسى بولىپ وتىر. قىتاي باعانى رەسەيدىڭ ىشكى نارىعىنداعى دەڭگەيدە تالاپ ەتۋدە. بۇل - شامامەن مىڭ تەكشە مەترگە 50 دوللار. بۇل - قازىر بەيجىڭنىڭ قازىر تولەپ وتىرعان باعادان (مىڭ تەكشە مەترگە 258 دوللار) 5 ەسە تومەن جانە «گازپرومنىڭ» وزگە شەت ەلدەرگە بەرىپ وتىرعان باعادان (420 دوللار) 8,5 ەسە از.

بىلايشا ايتقاندا، بەيجىڭ ماسكەۋدى تەسپەي سورعىسى كەلگەن...

بۇل تۇستا مىنانى ەسكەرگەن ءجون: قىتايدىڭ كەزىندەگى ءسىبىر حاندىعىنىڭ قيىر شىعىستاعى يەلىگىن باسى ءبۇتىن باۋىرىنا باسۋدان ايىرعان پاتشالىق رەسەيمەن جاسالعان قياناتشىل شارتتان قالعان تاريحي ەسەسى بار.

بۇگىن پۋتين «ۇيقىداعى ايداھاردىڭ ويانعانىن» سەزبەيتىن الەمدەگى جالعىز ساياساتكەر دەسەك ارتىق ايتپايمىز. ويتكەنى، 400 جىل ورىس يمپەرياسى يگەرە الماعان ءسىبىردى قىتاي ءالسىز بولعان شاعىندا ۋاقىتشا ايىرىلىپ قالعان تاريحي ايماعى سانايدى. ال ءپۋتيننىڭ بار قيالى - سول ءسىبىردىڭ بار بايلىعىن قىتايعا مايلاپ، جايلاپ ساتۋ.

رەسەي ءۇشىن ەڭ ماڭىزدى – «ءسىبىر كۇشى – 2» قۇبىرىنىڭ جوباسىنا رەسەي قىتايدى 10 جىلدان بەرى ۇگىتتەپ، قولقالاپ كەلەدى. دەسە دە، بەيجىڭ ءالى اسىعار جوق.

بەيجىڭنىڭ اسىقپايتىن سەبەبى – وسى ءوز جەرى ارقىلى وتەتىن گازعا رەسەيدى ارالاستىرماي، وعان تەك سالىق-مالىعىن عانا تولەپ، ءبىر ءوزى يەلىك ەتۋ. ءارى ءالىپتىڭ ارتىن باعىپ، گاز سالاسىنداعى رەسەي كومپانيالارىنىڭ السىرەپ، اياعىنا جىعىلۋىنا كۇتىپ وتىر. جانە قىتايعا بۇل گاز ءۇندى-قىتايعا بۇلداپ ساتۋ ءۇشىن كەرەك. ال، رەسەي بيلىگىنىڭ قىتايدىڭ «الما ءپىس، اۋزىما ءتۇس» دەگەن ەكونوميكالىق ساياساتىن ۇعىنباۋى تاڭقالدىرادى...

Abai.kz