جوعارعى وقۋ ورنى قابىرعاسىندا جۇرگەنىمدە عوي، ءبىر اعايىممەن پىكىرتالاستىرىپ قالعانىم. قوعام، مادەنيەت، رۋحانيات ماسەلەلەرىن ايتا كەلە، ىشتە قىز-قىز قايناعان، جۇرەككە قايعى بايلاعان ءبىراز دۇنيەنى دە اقتارىپ ەدىم. سول كەزدە اعايىم تەرەڭ كۇرسىنىپ: «بولاشاقتى سەندەرگە تاپسىردىق. كەلەشەك سەندەردىڭ قولدارىڭدا»، – دەپ ەدى-اۋ... وعان: «ماعان مۇنداي قيراندى ءھام قۇراندى بولاشاقتىڭ كەرەگى جوق! سىزدەردىڭ بىزگە لاقتىرعان كەلەشەكتەرىڭىز كۇرەسىندى ىزدەپ تاۋىپ، سوعان ءتۇسىپ جاتىر!» – دەگەنىم دە ەسىمدە.

كەشىرىڭىزدەر، بىراق بۇل سوزىمە وكىنگەن ەمەسپىن. كەرىسىنشە، ۋاقىت وتكەن سايىن دۇرىس ايتقانىما كوزىم جەتىپ كەلەدى. كىرسىز ۇرپاققا ءمىنسىز كەلەشەك قانا ءمىناسىپ. ال بىزدە قالعانى نە: الداۋ، ارباۋ، ۇرلىق، وتىرىك، سوتتاۋ، قاماۋ ءھام جاقسىلىقتىڭ ءوزى ەمەس، ىمى عانا. ءيا، رۋحاني قۇندىلىقتار جەتتى، الايدا ول بولمىسقا سىڭبەگەن كۇيى جەتتى. ۇلكەن ادامدار رۋحاني مۇرانى كوكىرەگىنە ساقتاماي، قولىنا ۇستاپ تاپسىرا سالدى، كىشى بالالارعا. سونىڭ اسەرىنەن عوي، وسى جولداردى جازىپ وتىرعانىم.

ءجا، وسى سوزدەردى سانامدا قايتا جاڭعىرتقان نە جاعداي – سونى ايتايىن. بۇگىن ورالدا قوقىس جاشىگىنەن جاڭا تۋعان نارەستە تابىلىپتى. جىلاپ جاتىر ەكەن... ءساۋىردىڭ جيىرماسى كۇنى كەرەكۋدەگى باكينسكايا كوشەسىندەگى ءۇيدىڭ كىرەبەرىسىنىڭ جەرتولەسىندە كارىز قۇبىرىن تازالاۋ كەزىندە شالا تۋعان شاقالاقتىڭ ءمايىتى تابىلعان...

قىلمىس پا؟ قىلمىس. ءبىر اتتەگەن-ايى، زاڭ پەرىشتە-ءمۇسىندى كۇرەسىنگە تاستاعان ەكى ادامدى عانا جازالايدى. دەمەك، تاعى دا سالدارمەن كۇرەسەمىز. بۇعان شىن مانىندە كىم كىنالى؟ الدىمەن اقشا دەپ، جان باقشاسىنا كوز سالماعان وتىز جىلعى «باعبان»! ەل مادەنيەتىن قولدان تۇنشىقتىرعاندا تىرپ ەتپەگەن، موينىن پىشاققا توسقان قۇرباندىق سەكىلدى قول قۋسىرىپ قاراپ تۇرعان كىسىلەر!

جازۋ ۇستەلىمنىڭ استىنداعى قوقىس جاشىگىنە قاراپ-قاراپ قويامىن، نارەستە ءتۇسىپ كەتكەن سەكىلدى جانىم تۇرشىگىپ. شىنداپ كەلگەندە، قوقىسقا تاستالعان بالالار – بولاشاقتىڭ سيمۆولدىق بەلگىسى عانا. اتالمىش جاعداي قايتالانا بەرمەۋى ءۇشىن قايتپەك كەرەك؟ ەشكىمگە ەشتەڭە تاپسىرماۋ قاجەت – ءبارىن ءوزىمىز، ءدال بۇگىن جاساۋعا ءتيىسپىز. تىم بولماسا، ەرتەڭ مەن سياقتى ءبىر جاس قوقىس جاشىگىنە ءۇڭىلىپ جۇرمەۋ ءۇشىن...

اسىلان قۋانىشۇلى

Abai.kz