بىراق، رەسەيدىڭ قىزمەتىندە جۇرگەندەيمىز!

اتا زاڭىمىزدا (كونستيتۋتسيا) مەملەكەتتىك ءتىل -  قازاق ءتىلى بولعان سوڭ، الداعى ۋاقىتتا مەملەكەتتىك قىزمەتكە قابىلداناتىن جاستاردان، وسى تىلدە ەمتيحان تاپسىرۋدى قالايدا زاڭداستىرۋ قاجەت. ونسىز بولمايدى.  سونىمەن قاتار، قازىرگى مەملەكەتتىك سالادا جۇمىس جاساپ  جۇرگەن  ازاماتشالار  مەن ازاماتتارعا جارتى جىل ۋاقىت بەرىپ، اتتەستاتسيادان وتكىزۋ ءجون بولارى ەدى. بيلىكتەگىلەردىڭ ساناسى مەن تۇيسىگى جەتسە، بۇل ارەكەتتەردىڭ ءبارى ۋلتتىق يدەولوگيا بولىپ ەسەپتەلەدى جانە سوعان قادام باسقانىمىزدى اڭعارتادى. بۇدان قورقاتىن ەشتەڭە جوق. 

ەلدەگى ۋاقىتى جەتكەن تاعى ءبىر وزەكتى نارسە – وناماستيكا سالاسى. رەسپۋبليكا اۋماعىنداعى ءاربىر ولكەنىڭ قۇرامىنداعى ەلدىمەكەندەر مەن اۋدان، قالا، سونداي-اق، كەيبىر وبلىس ورتالىقتارى بولىپ سانالاتىن قالا اتاۋلارىن وزگەرتۋدى جىلدامداتۋ كەرەك. ەگەر، جوعارعى بيلىكتىڭ شاماسى كەلمەسە، وندا ءماجىلىس جانە اۋدان، قالا دەپۋتاتتارىنا رۇقسات ەتىپ، سولاردىڭ كوتەرگەن وي-پىكىرلەرىن قولداپ، ورىنسىز جالتاقتىققا سالىنباي، دەر ۋاقىتىندا كومەكتەسۋ كەرەك-اق. بۇعان ەلىمىزدەگى ەشبىر ەتنوس وكىلدەرى قارسى بولمايدى. ولاردىڭ ءتىپتى، قاقىسى دا جوق. رەسەيدىڭ قاباعىنا قاراي بەرۋدى تىيۋ قاجەت. تۇرىكمەندەر مەن وزبەكتەر كراسنوۆودسك پەن گاگارين قالاسىن باياعىدا وزگەرتىپ تاستاعان. ال، ءبىز ءالى كۇنگە دەيىن ءجۇرمىز.

سونىمەن قاتار، ءبىزدىڭ قازاق مەملەكەتىندەگى بانكتەردىڭ، اسىرەسە ەكىنشى دارەجەدەگى قارجى ۇيىمدارىنىڭ اتاۋى نەلىكتەن وزگە ءتىلد بولىپ  كەلەدى؟! مىسالى ايتقاندا: «حوۋم بانك»، «Forte  بانك»، «Freedom (فريدوم)  بانك» تاعى باسقا... وسىلاردى، مەملەكەتتىك تىلدە اتاۋعا قۇدىرەتىمىز   جەتپەي مە؟! ءبىز ەۋروپا قۇرلىعىندا تۇرعان جوقپىز عوي. قازاقستان - ۇلتتىق  جانە ازيالىق مەملەكەت! سوندىقتان، مىنالاردى سوزا بەرمەي، وزگەرتۋ ءجون بولارى ەدى. ءتىپتى، جاسى ۇلكەن  قازاقتىڭ قارتتارى مەن قاريالارىنىڭ ءتىلى دە كەلمەيدى. ءاردايىم، ءسوزىن تۇزەپ جۇرگەنىمىز!   مىسالى: «حوۋم بانكتى»  -  شاڭىراق،  جانۇيا، سونداي-اق، قايسىبىر  بانكتەردى: التاي، الاتاۋ،  جەتىسۋ، وقجەتپەس، تاعى باسقا قازاقتىڭ قاسيەتتى سوزدەرىمەن جانە اتاۋلارمەن اتاۋعا بولارى ەدى  عوي.

بۇل، ارينە،  قازاقستان  ۇلتتىق بانكىنىڭ توراعاسى عالىمجان پىرماتوۆقا ەسكەرتۋ. ەگەر، رەتى كەلسە، جوعارىدا ايتىلعان بانكتەردىڭ جانە ءبىز ايتپاعان وزگە دە بانكتەردىڭ ءتىزىمىن قاراپ، اتاۋلارىن مەملەكەتتىك تىلدە قايتا اتاۋ.

سونداي-اق، «اتامەكەن» ۇلتتىق كاسىپكەرلىك پالاتاسى تۋرالى ايتقىم كەلىپ وتىر. پالاتانىڭ كازىرگى توراعاسى رايىمبەك باتالوۆ مۇلدە مەملەكەتتىك تىلدە ءىس جۇرگىزە المايتىن ادام سەكىلدى. بۇل ازاماتتى جاماندايىق دەپ وتىرعانىمىز جوق، كىر دە جاقپايمىز. دەگەنمەن، بۇل ازاماتتى،  وسىنداي جوعارى دارەجەگە كوتەرىپ كەرەگى جوق ەدى. قازاق مەملەكەتىندە ءجۇرىپ، مەملەكەتتىك تىلگە جاۋاپكەرشىلىگى جوق ادام، الداعى كەزەڭدە قالاي جۇمىس ىستەمەك. وزگە ۇلتتىڭ ازاماتتارى قازىرگى كۇننىڭ وزىندە قازاق تىلىندە سايراپ تۇرعاندا، مىنانداي كادرلاردىڭ بىزگە كەرەگى  قانشا!  مۇنداي كادرلاردى  جۇمىسىنان بوساتۋ  كەرەك، ايتپەسە، بۇلار مەملەكەتتىك ۇلتتىق يدەولوگيانى العا  باستىرمايدى. رەسەيدىڭ جەرىندە، سولاردىڭ قىزمەتىندە جۇرگەن ادامدار سىياقتى. جانە تاعى ايتارىم، مىنانداي كادرلارمەن ءبىز ەش ۋاقىتتا ۇلتتىق مەملەكەت بولا المايمىز! ءبىزدىڭ ەلىمىزگە، تاجىريبەسى مەن جاۋاپكەرشىلىگى جوعارى، ساۋاتتى دا  بىلىكتى ۇلتتىق ماماندار كەرەك!

بەيسەنعازى ۇلىقبەك

قازاقستان جۋرناليستەر وداعىنىڭ مۇشەسى

Abai.kz