اتامىز قازاق ەڭبەگىنە، ەرلىگىنە سۇيىنگەن ەل پەرزەنتىن «ازاماتىم!» دەگەن عوي. ءبىزدىڭ زامانىمىزداعى ازاماتتاردىڭ ءبىرى – مامىردىڭ 8-كۇنى جاسى الپىسقا تولعان عالىمجان ءبادىلجانۇلى جاقيانوۆ. كوزى قاراقتى كوپشىلىكتىڭ عالىمجاننىڭ كىم ەكەنىن جاقسى بىلەتىنى شاكسىز.

اسىرەسە «قازاقستاننىڭ دەموكراتيالىق تاڭداۋى» قوزعالىسىن  ۇيىمداستىرۋمەن بايلانىستى قىزمەتى تۋرالى از ايتىلعان دا، از جازىلعان دا جوق. ال مەنىڭ بىلەتىنىم – ءتىل مەن جاعىن جالعا بەرگەن الدەكىمدەردىڭ: - بۇل جاقيانوۆ سەمەي، پاۆلودار وبلىستارىنىڭ اكىمى بولعانىندا ءوز پايداسى ءۇشىن ويىنا كەلگەندى ىستەدى! - دەپ كۇيسەگەندەرى. وسى وبلىستارداعى تۋعان-تۋىسقاندارىممەن، دوس-جولداستارىممەن ارالاس-قۇرالاس بولىپ ءجۇرىپ، عالىمجانعا قاتىستى تەرىس ءسوز ەستىگەن ەمەسپىن. عالىمجانعا بولعان «تاريحي سوتتان» كەيىنىرەكتە  پاۆلودارعا جولىم ءتۇسىپ، ءبىر جاس جۋرنالشىمەن تانىسىپ، اڭگىمەلەسكەنىمىزدە ونىڭ: - اعا، قالام ۇستاپ، قاتارعا قوسىلعان بەس جىلىم ىشىندە كورىپ-بىلگەنىمدە  بيلىكتىڭ   عالىمجان جاقيانوۆقا جاساعان قياناتىنان وتكەن سۇمدىق جوق، نەتكەن ادىلەتسىزدىك! - دەپ كۇيىنگەن ءتۇرى ءالى كوز الدىمدا. ول سوتتىڭ دا سوراقى وتكىزىلگەنىن، عالىمجانعا «مەملەكەتكە ەكى ميلليون تەڭگە زيان كەلتىدى دەپ تاعىلعان ايىپتىڭ بەتپاقتىق ەكەنىن، ول سوما وبلىستىق دەنساۋلىق ساقتاۋ ءبولىمىنىڭ سىزدى وي جەردەگى ءدارى-دارمەك قويماسىن قۇرعاق قىرعا كوشىرۋگە جۇمسالعانىن ايتتى.

ءيا، «ايران ىشكەن قۇتىلعان، شەلەك جالاعان تۇتىلعان»، «تىرناقتىلار مەن تىستىلەر» اۋەيىلەنگەن زامان.

وزىنە بولعان سول سوتتىڭ ۇكىم شىعارۋى الدىنداعى سوڭعى سوزىندە عالىمجاننىڭ نە دەگەنىن ەسكە تۇسىرەلىك (تۇپنۇسقاسىنان): «...پريچينا وچەۆيدنا: داتۋ وكونچانيا پروتسەسسا وبوزناچيل ليچنو پرەزيدەنت  نازارباەۆ. ي ۆ ەتوم ني ۋ مەنيا، ني ۋ مويح ستوروننيكوۆ نەت ي نە بىلو نيكاكيح سومنەني. تاكجە ليچنو پرەزيدەنت نازارباەۆ  نازۆال ي سروك موەگو وسۋجدەنيا – سەم لەت، و چەم بىلو يزۆەستنو زادولگو دو سۋدەبنوگو رازبيراتەلستۆا... پروكۋراتۋرا ي سۋد، ياۆلياياس نە بولەە چەم ورگانامي، وبسلۋجيۆايۋششيمي رەجيم ليچنوي ۆلاستي پرەزيدەنتا نازارباەۆا، ۆ داننوم سلۋچاە ليش سلەپو يسپولنيلي پريكاز».

اشىق، انىق ايتتى. ونى ۇمىتاعان جەتەسىز شەنەۋنىكتەر شەتكە ەرىكسىز كەتكەن عالىمجاندى ەلگە جولاتپاۋعا تىرىستى. ورالىپ ەدى، الگى ءتىل-جاعىن جالعا بەرگەندەر تاعى دا كۇيسەي باستادى.

ە، عالىمجان ءىنىم، قازەكەڭ: «ەرجىگىت نە كورمەيدى، ءتىرى جۇرسە» دەدى دە عوي. بەكەم بول، بەرىك بول! سەن دە تاپ بولعان ادىلەتسىزدىك قاشانعى ۇستەم بولا بەرەر دەيسىڭ! ەندى شارشاماي، شالدىقپاي، حالقىڭا ادال قالپىڭدا 100 جاساۋىڭا تىلەكتەسپىز!

اعاڭ عابباس قابىشۇلى

Abai.kz