پرەزيدەنت قاسىم-جومارت توقاەۆ CCTV ارناسىنا بەرگەن سۇحباتىندا تايۋاندى قىتايدىڭ ءبىر بولىگى دەپ اتادى.

«ءبىز بۇل الەمدەگى بارلىق ادامعا ايدان انىق ماسەلە دەپ ەسەپتەيمىز. «ەكى قىتاي» بولماۋى كەرەك. تايۋان قىتايدىڭ ءبىر بولىگى. بارلىق مەملەكەتتەردىڭ اۋماقتىق تۇتاستىعى ءپرينتسيپى بىرىككەن ۇلتتار ۇيىمىنىڭ جارعىسىندا بەكىتىلگەن. ەرەجە ساقتالۋى كەرەك»، – دەدى توقاەۆ.

مەملكەت باسشىسى اتالعان قاعيدانىڭ شانحاي ىنتىماقتاستىق ۇيىمىنىڭ دەكلاراتسياسى مەن جارعىسىندا دا بەلگىلەنگەنىن ەسكە سالعان.

«سوندىقتان مەن تاعى دا ءبىر رەت اتاپ وتكىم كەلەدى. تايۋان قىتايدىڭ ءبىر بولىگى. جانە بۇعان ەش كۇمانىمىز جوق»، - دەدى توقاەۆ.

دەگەنمەن بىلتىر عانا پەتەربور جيىنىندا پرەزيدەنت توقاەۆ قازاقستاننىڭ «لحر» مەن «دحر» دەگەن رەسەي وككۋپاتسيالاپ العان ايماقتارىنا قاتىستى ۇستانىمىن ايتا وتىرىپ:

«ءبىز تايۋاندى دا، كوسوۆونى دا، وڭتۇستىك وسەتيا مەن ابحازيانى دا مويىندامايمىز. سول پرينتسيپپەن لۋگانسكى مەن دونەتسكى دەيتىن كۆازيمەملەكەتتىك تەرريتوريالاردى دا مويىندامايمىز»، - دەگەن ەدى.

باتىس ساراپشىلارى ءدال قازىر قىتايدىڭ ورتالىق ازيا ەلدەرىنە ىقپالى جوعارىلاپ بارا جاتقانىن ايتادى.

«قىتاي ورتالىق ازيا ەلدەرىن لوگيستيكا ماقساتىندا قولدانۋدا. قازاقستان ايماعى ارقىلى كاسپيگە شىعىپ، ەۋروپاعا تاعى ءبىر جولدى سالۋدا. قىتاي-قىرعىزستان-وزبەكستان تەمىر جولىنىڭ قۇرىلىسىن باستادى. بۇنىڭ بارلىعى دەرلىك رەسەيدى ايماقتان ىسىرىپ، ەكونوميكالىق ۇستەمدىگىن كۇشەيتۋ امالدارى»،-دەيدى ساراپشىلار.

ايتا كەتەيىك، 9 مامىردا ماسكەۋدە پارادقا بارىپ كەلگەن ورتالىق ازياي ەلدەرىنىڭ باسشىلارى ەندى قىتايعا جول تارتپاق.

16-20 مامىر كۇندەرى قىتايدا «ورتالىق ازيا جانە قىتاي» فورۋمى وتەدى.  وندا ايماق ەلدەرىنىڭ قىتايمەن بايلانىسىن كۇشەيتۋ ماسەلەسى تالقى بولىپ، بىرقاتار قۇجاتتارعا قول قويىلماق.

«قىتاي حالىق رەسپۋبليكاسى توراعاسى سي ءتسزينپيننىڭ شاقىرتۋى بويىنشا قازاقستان پرەزيدەنتى  قاسىم-جومارت توقاەۆ، قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون، تۇركىمەنستان پرەزيدەنتى سەردار بەردىمۇحامەدوۆ جانە وزبەكستان پرەزيدەنتى شاۆكات ميرزيوەۆ 16-20 مامىر ارالىعىندا قىتايعا مەملەكەتتىك ساپارمەن كەلەدى»، — دەيدى قىتايدىڭ ءسىم ارنايى وكىلى.

«ورتالىق ازيا جانە قىتاي» ءسامميتى 18-19 مامىردا، سيان قالاسىندا وتپەك. باتىس ساراپشىلارى قىتاي ۇرىمتال ءساتتى پايدالانىپ، وا-داعى ءوز ىقپالىن ارتتىرا تۇسەدى، ال رەسەي وعان قارىمتا جاۋاپ قايتارۋعا قاۋقارسىز دەگەن ويدا.

Abai.kz