ماسكەۋ قازاقستاندىق مەديا كەڭىستىكتەگى تانىمال ءورىستىلدى تۇلعالاردى قارالاۋ وپەراتسياسىن ازىرلەۋ ۇستىندە. DALA INSIDE-قا جەتكەن اقپارات بويىنشا كرەمل وسى كۇنگە دەيىن «ورىس الەمىنىڭ» وكىلدەرىمەن ءدام-تۇزى جاراسىپ كەلگەن مەديا-ماگنات ارمانجان بايتاسوۆقا كەكتەنىپ العان.

كۇنى كەشە روسكومنادزوردىڭ پارمەنىمەن ارمانجانعا تيەسىلى Arbat-media اگەنتتىگىنىڭ رەسەي اۋماعىندا اقپارات تاراتۋىنا شەكتەۋ قويىلدى. ارگۋمەنت: اگەنتتىك رەسەي اگرەسسياسىن ايىپتاعان. سوعىسقا قاتىستى ماسكەۋدىڭ ساياساتىنا قايشى مالىمەت تاراتقان. بايتاسوۆ مۇنى اۋىر قابىلدادى. سەبەپ: Arbat-media-نى وقيتىن اۋديتوريانىڭ 40 پايىزى رەسەيلىك وقىرماندار. الايدا كرەمل يدەولوگتارى ءۇشىن بۇل جەڭىل جازا. ارەكەڭنىڭ You-tube ارناسىندا توبە كورسەتكەن – الەكسەي ارەستوۆيچ، اگيل رۋستامزادە، ابباس گالياموۆ سىندى رەسەيدىڭ انتيپودتارى قازاقستانداعى ورىس پروپاگانداسىنىڭ تۇندىگىن تۇرگەن.

تاياۋ كۇندەرى بايتاسوۆ باستاعان قازاقستاننىڭ باتىسشىل، ليبەرالدى وكىلدەرىنە قارسى ارام، لاس اقپاراتتار تاراي باستايدى. ونىڭ العاشقى بەلگىلەرى بايقالا باستادى.

پروپاگانديست مارگاريتا سيمونيانمەن اففيرلەنگەن تەلەگرام-ارنادا بايتاسوۆتىڭ كوگىلدىر جىگىتتەرمەن كوڭىل كوتەرگەنى، بۇل ءۇشىن ماسكەۋدەگى مونشانى جالعا الىپ، 400 مىڭ دوللاردى دالاعا شاشقانى تۋرالى پروۆوكاتسيا پايدا بولدى. كرەمل بايتاسوۆقا تىزەسىن باتىرا المايدى، سوندىقتان وسىنداي پاسىق، ساسىق امالعا بارۋعا ءماجبۇر.

پۋتين پروپاگانديستەرىنىڭ نىساناسىنا ىلىككەندەردىڭ اراسىندا بايتاسوۆتان بولەك – ساياساتكەر مۇحتار جاكىشەۆ، ەكونوميستەر الماس شوكين، راقىم وشاقباەۆ، ساياساتتانۋشى دوسىم ساتپاەۆ، ءتىپتى ەشكىممەن قاق-سوعى جوق دەيتىن نۇرلان سماعۇلوۆ تا بار.

سماعۇلوۆ دەمەكشى، رەسەي نارىعىنا كىرسە، تۇزاققا تۇسەرىن سەزگەن «استانا موتورستىڭ» قوجايىنى پەتەربورداعى «حيۋندايدىڭ» زاۋىتىن ساتىپ الۋدان اينىپ قالعان.

جاكىشەۆتىڭ جايى بولەك اڭگىمەنىڭ ارقاۋى. مۇحتاردى قارالايتىن كونتەنتتىڭ باعىت-باعدارى – «قازاقتىڭ اتوم ءوندىرىسىن اقش-تىڭ قولىنا ۇستاتپاق بولدى. ول ءۇشىن وعان قوماقتى گونورار تولەندى...»، - دەگەنگە سايادى. بىراق، كوزى اشىق قازاقتىلدى اۋديتوريا مۇندايعا الدانا قويمايدى. قازاقستانداعى كرەمل «جانسىزدارى» جاكىشەۆتىڭ جۇرت الدىنداعى ابىرويىن توگۋدىڭ وزگە جولىن ىزدەستىرۋ ۇستىندە.

دوسىم ساتپاەۆقا دا «دوسە» تىگىلىپ جاتىر. البەتتە، كرەمل مۇنى قازاقستانداعى رەسەيشىل كۇشتەردىڭ كومەگىمەن جۇزەگە اسىرارى انىق. ەلىمىزدەگى رەسەيشىل ساراپشىلار مەن رەسەيشىل باق ماسكەۋدەن تۇسەتىن ترانزاكتسيانى اسىعا كۇتىپ وتىر. Dalainside دەرەككوزىنىڭ ايتۋىنشا كرەمل بۇل تاراپتا ەرمۇحامبەت ەرتىسباەۆپەن كونسۋلتاتسيالار وتكىزۋى مۇمكىن.

Abai.kz