ۇلتتىق مۋزەيدىڭ بۇرىنعى ديرەكتورى ارىستانبەك مۇحامەديۇلىنا قاتىستى «ديپلومات» قوناق ءۇيىن رەيدەرلىك جولمەن باسىپ الۋ ءىسى بويىنشا تەرگەۋ اياقتالدى. بۇل تۋرالى سىبايلاس جەمقورلىققا قارسى قىزمەت مالىمدەدى.

بۇعان دەيىن باق-تا ارىستانبەك مۇحامەديۇلىنىڭ سوت وتىرىسىنان ۆيدەو تاراپ، وندا ايىپتالۋشى «جەمقورلىقپەن كۇرەس قىزمەتكەرلەرىنىڭ قوناقۇيدى ءۇشىنشى تۇلعالاردىڭ اتىنا قايتا جازۋعا جانە  111 ملن تەڭگە وتەماقى تولەۋگە ماجبۇرلەگەنىن» ايتقان. انتيكور بۇل مالىمدەمەنى تەرىسكە شىعاردى.

«كەيبىر بۇقارالىق اقپارات قۇرالدارىندا، الەۋمەتتىك جەلىلەردە جانە مەسسەندجەرلەردە سىبايلاس جەمقورلىققا قارسى قىزمەت قىزمەتكەرلەرىن «ديپلومات» قوناق ءۇيىن ءۇشىنشى تۇلعالارعا قايتا جازۋعا جانە 111 ملن تەڭگە سوماسىندا زالالدى وتەۋگە ماجبۇرلەۋ تۋرالى بۇرىنعى مادەنيەت جانە سپورت ءمينيسترى ا.مۇحامەديۇلىنا قاتىستى سوت پروتسەسىنەن اقپارات پەن بەينەروليك تاراتىلادى. بۇل اقپارات شىندىققا سايكەس كەلمەيتىنىن حابارلايمىز»، - دەدى انتيكور.

جەمقورلىققا قارسى قىزمەت «مۇحامەديۇلى جالعان اقپاراتتى ءوزى جاۋاپكەرشىلىكتەن جالتارۋدى ويلاپ جۇرتشىلىقتى اداستىردى» دەيدى .

وسىعان بايلانىستى اگەنتتىك "جالا جابۋ" بابى بويىنشا سوتقا دەيىنگى تەرگەۋدى باستاۋ تۋرالى ماسەلە قاراستىرىلىپ جاتقانىن حابارلادى.

ايتا كەتەيىك، ۇلتتىق مۋزەيدىڭ بۇرىنعى باسشىسى ارىستانبەك مۇحامەديۇلى «التىن ادامنىڭ الەم مۋزەيلەرىنە شەرۋى» حالىقارالىق كورمەسىن ۇيىمداستىرۋ بارىسىندا 146 ميلليون تەڭگە بيۋدجەت قارجىسىن جىمقىردى دەگەن كۇدىكپەن 2022 جىلعى 28 مامىردا ۇستالعان.

ارىستانبەك مۇحامەديۇلى 2014-2019 جىلدار ارالىعىندا مادەنيەت جانە سپورت ءمينيسترى بولعان. 2019 جىلدىڭ شىلدەسىندە ۇلتتىق مۋزەيىنىڭ ديرەكتورى قىزمەتىنە تاعايىندالعان.

Abai.kz