– قۇرمەتتى سوت! مەن كەز كەلگەن جازاعا كەلىسەمىن، ءتىپتى اتىپ تاستاسا دا مەيلى – بىراق تەك اقشا جىمقىردى دەگەن ايىپ ەمەس. قازاقتىڭ كەرەمەت ماقالى بار. "ولىمنەن ۇيات كۇشتى". مەن 60 جىل لايىق ءومىر ءسۇردىم، – دەدى بۇرىنعى مينيستر.

بىلتىر تەرگەۋ ورگاندارى بۇرىنعى ءمينيستردىڭ ءىسى اياسىندا "التىن ادامنىڭ الەم مۇراجايلارى بويىنشا شەرۋى" حالىقارالىق كورمەسىن وتكىزۋ، "قازاقستاننىڭ ۇلتتىق كيەلى نىساندارى مەن مۋزەي قورلارىن جالپىمەملەكەتتىك فوتوگراممەتريالىق 3D-سكانەرلەۋ", "قازاقستان رەسپۋبليكاسىنىڭ ۇلتتىق تسيفرلىق كينوكوللەكتسياسىن تسيفرلاندىرۋ" جوبالارىنا بولىنگەن قاراجاتتى ۇرلاۋ فاكتىلەرى بويىنشا تەرگەۋ جۇرگەنىن حابارلاعان.

جۇما كۇنى بۇرىنعى مينيستر: – سوت كەزىندە بىردە-ءبىر ادام زاڭ بۇزىلدى دەپ ايتقان جوق. ءبىز التىن ادامدى ساقتاپ قالدىق. ونى ءۇندىستاننان ۋاقىتىندا الىپ كەلدىك. ونى سول جاقتا قالدىرعاندا جوعالتار ەدىك. ء[ىس بويىنشا ايىپ تاعىلعان] ءتورت ادامنىڭ ۇياتى تازا. ءبىزدى مادەنيەت قايراتكەرلەرى قولداپ جاتىر، – دەدى.

16 ماۋسىمدا سوتتا ەكىنشى ايىپتالۋشى ازامات قوشەنوۆ تەرگەۋشىلەر مەن پروكۋرورلار "جوعارىدان كەلگەن بۇيرىقتارعا تاۋەلدى" ەكەنىن ايتىپ، “مۇنداي جاعدايدا ادىلدىك تۋرالى نە ايتۋعا بولادى" دەدى. ول "سوڭعى سوزىندە" وتكەن عاسىردىڭ 30-جىلدارىنداعى قۋعىن-سۇرگىن تۋرالى ايتىپ، سوعان ۇقساس "جالاڭ ايىپپەن سوتتاۋ" قازىر دە ءجۇرىپ جاتقانىن ايتتى.

سوتقا ءبىر ايىپتالۋشى دەنساۋلىعىنا بايلانىستى كەلە الماي قالدى. ءجارىسسوز 19 ماۋسىمدا جالعاسادى.

بۇل ىستە بۇرىنعى ءمينيستردى قوسقاندا، ءتورت ايىپتالۋشى بار. وسىعان دەيىن پروكۋرور ارىستانبەك مۇحامەديۇلىن توعىز جىلعا، قالعان ۇشەۋىن سەگىز جىلعا باس بوستاندىعىنان ايىرۋدى سۇراعان.

بۇرىنعى مينيسترگە استاناداعى ۇلتتىق مۋزەي ديرەكتورى بولىپ تۇرعاندا "بيۋدجەت قارجىسىن جىمقىردى" دەگەن ايىپ تاعىلعان. ەكس-شەنەۋنىك 140 ملن تەڭگە بيۋدجەت قارجىسىن جىمقىردى دەگەن كۇدىكپەن بىلتىر مامىر ايىندا ۇستالعان. سوت بيىل ساۋىردە باستالدى.

ارىستانبەك مۇحامەديۇلى 2014-2019 جىلدارى مادەنيەت ءمينيسترى بولدى. كەيىنگى ءۇش جىلدا ۇلتتىق مۋزەيگە جەتەكشىلىك ەتكەن.

وعان قاتىستى وزگە ءىس بويىنشا دا تەرگەۋ جۇرگەن. جۋىردا سىبايلاس جەمقورلىققا قارسى ءىس-قيمىل اگەنتتىگى ارىستانبەك مۇحامەديۇلى "ديپلومات" قوناقۇيىن رەيدەرلىك جولمەن تارتىپ العان دەگەن كۇدىككە ىلىنگەنىن مالىمدەگەن. ۆەدومستۆو تەرگەۋ اياقتالعانىن حابارلادى.

Abai.kz