قازىرگى كۇندەرى سولتۇستىك كورشىمىز رەسەيدىڭ ءحالى مۇشكىل ەكەنىڭ كورىپ ءجۇرمىز. قاسىنداعى بۇرىن ىقپالىندا بولعان وزگە ەلدەرگە ءتىسىن قايراپ، كۇش كورسەتپەك تۇگەلى، ءوزىنىڭ ىشكى جاعدايىن قالپىنا كەلتىرە الماي وتىر. شىندىعىن ايتۋ كەرەك، ەكى جىلعا تايادى. رەسەي، ەۋروپالىق ەلدەردىڭ تارابىنان سالىنعان سانكتسيالاردان قاتتى سوققى الىپ، جىلدان-جىلعا ەكونوميكاسى جانە الەۋمەتتىك جاعدايى السىرەپ، قيىن جاعدايعا كەلە جاتىر. 

مىنە، وسى ءبىر رەسەيدىڭ الاساپىرانعا تۇسكەن (سمۋتنوە ۆرەميا) ۋاقىتىن ءبىزدىڭ ەلگە مۇمكىندىگىنشە پايدالانىپ قالۋ كەرەك. قازاقستان بيلىگىنىڭ ورىنسىز قورقاقتىعى ء(تىپتى، مەن ايتار ەدىم، بيلىكتىڭ دەنساۋلىعىنىڭ جوقتىعىن كورسەتەدى) كوپ نارسەگە كەدەرگى كەلتىرۋدە. ايتپەسە، تۇككە قاجەتسىز ۇجىمدىق قاۋىپسىزدىك كەلىسىم شارتىنان (ودكب) وسى ۋاقىتقا دەيىن iىعىپ كەتۋگە بولار ەدى.

ەندى، ءوز ىشىمىزدەگى جاعدايىمىزعا كەلەيىك. مىسالى، بىزگە، رەسەيدىڭ قازىرگى بەيشارا جاعدايىن ءساتتى پايدالانىپ، قازاق ەلىنىڭ مەملەكەتتىك ءتىلىنىڭ ءرولىن كۇشەيتىپ، ءتىپتى، وسى جۇيەگە ارنايى زاڭ قابىلداپ الۋ كەرەك ەدى. سونداي-اق، قازاق ءتىلىنىڭ قۇزىرىنا: رەسپۋبليكاداعى عىلىم مەن سپورتتى جانە ەلدەگى كاسىپكەرلىك سالاسىن تولىقتاي كىرگىزۋ كەرەك («اتامەكەن» ۇلتتىق كاسىپكەرلىك پالاتاسىنىڭ جەتەكشىسى، رايىمبەك باتالوۆتى مەملەكەتتىك ءتىلدى بىلمەيتىندىگى ءۇشىن، جۇمىستان بوساتۋ كەرەك-اق). مۇمكىن، بۇل ءۇشىن، وسىلاردى قاداعالايتىن، سونىمەن قاتار، ۇيلەستىرەتىن ارنايى مەملەكەتتىك كوميسسيا قاجەت شىعار. مىنە، وسىلاردى ۋاقىت وتكىزبەي، جىلدامداتىپ ىسكە قوسقان ءجون سەكىلدى.

تاعى ءبىر ايتارىم، بيلىك تارتىنشاقتاپ، قورقاتىن بولسا، وندا، وبلىس اكىمدەرىنە تاپسىرما بەرىپ، كۇندەلىكتى اتقارىپ جۇرگەن جۇمىستارىمەن قوسا، ونوماستيكامەن دە اينالاسۋىن جەدەلدەتۋدى مىندەتتەۋ كەرەك-اق. ءتىپتى، اناۋ پاۆلودار مەن پەتروپاۆلدىڭ اتاۋىن دا وزگەرتىپ جىبەرۋدىڭ ءساتى كەلدى.

ەندىگى كەشىگۋ ورىنسىز دەپ ويلايمىز. كەشىكتىرە بەرسەك، كەيىن انكلاۆقا اينالىپ كەتۋى دە مۇمكىن.  قازاقتىڭ ماقال سوزىمەن ايتقاندا: «تەمىردى قىزعان كەزىندە سوعۋ» قاجەت. ەل تاۋەلسىزدىگىنە وتىز جىلدان استى، ءالى كۇنگە دەيىن ەشتەڭەنى وزگەرتە المادىق. نەتكەن قورقاقتىق، ءتىپتى، ەزدىك دەۋگە بولادى! اتتەن، قازاق بيلىگىنە ساپارمۇرات نيازوۆتاي نەمەسە يسلام كاريموۆتاي قورقىپ شەگىنبەيتىن، تۋعان ەلىنە سەپتىگى تيگىزەتىن، جۇرەكتى ءبىر ازامات كەلمەدى-اۋ. ءتىپتى6 ءتول بيلىگىمىزگە، قالىڭ ورىستان قورىقپاي، كەزىندە بەس وبلىستى الىپ قالعان، سوناۋ جۇمابەك تاشەنوۆتەي دە ازامات تابىلمادى. قازىرگى بيلىگىمىز جانە ونىڭ اينالاسىنداعىلار (مينيسترلەرگە دەيىن) ەل-جۇرتتىڭ ورتاسىنان كەلمەگەن، تەك كابينەتتە گازەتتەرىن اۋدارىستىرىپ، انانى-مىنانى وقىپ، جاتتاپ وسكەن ازاماتتار عوي. مۇنداي ازاماتتار ورىنسىز قورقاق، جاۋاپكەرشىلىگى جوق، ءوزىنىڭ اماندىعىن عانا ويلايتىن ءمۇساپىر بولىپ كەلەدى. سونىمەن قاتار، بۇلار زيالى قاۋىم وكىلدەرىنىڭ جانە ەل ءىشىنىڭ كوڭىل-كۇيىن دە ۇقپايتىن دۇمبىلەز بولادى. سوندىقتان، قانشا تاۋەلسىزبىز دەسەكتە، جالتاق بولىپ، رۋحاني قۇندىلىقتارىمىزدى دامىتا الماي، مەملەكەتتىك ءتىلىمىز ناقتى كۇشەيىپ، قاناتىن كەڭگە جايىپ كەتە الماي، دەل-سال كۇيدە كەلە جاتقاندىعىمىز دا وسىدان. وسى ورايدا ايتارىم، قادىرمەندى بيلىگىمىز، جەتى جىلدى ينۆەستيتسيا تارتىپ، رەفورما جاساۋمەن ۋاقىت وتكىزە بەرمەي، مىنا الاشۇبار قازاقستاندى ونوماستيكا جاعىنان تولىق رەتكە كەلتىرىپ، ۇلتتىق ءتىلىمىزدىڭ اياسىن كەڭەيتىپ، كەيبىر ماڭگۇرت مينيسترلەر مەن اكىمدەردى ۇلتتىق كادرعا اۋىستىرىپ، مىناۋ ۇلانعايىر رەسپۋبليكانى، قازاق حالقىنا جاقىنداتۋ كەرەك. سوندا، سەنىڭ ەسىمىڭ دە، اتقارعان ءىسىڭ دە ەل جۇرەگىندە ۇزاق ساقتالۋى مۇمكىن!

بەيسەنعازى ۇلىقبەك

قازاقستان جۋرناليستەر وداعىنىڭ مۇشەسى

Abai.kz