قر ۇلتتىق قاۋىپسىزدىك كوميتەتىنىڭ توراعاسى

ەرمەك ساعىمباەۆقا!

قر اقپارات جانە مادەنيەت ءمينيسترى

ايدا بالاەۆاعا!

جۋىقتا وتكەن رەسپۋبليكالىق فەرمەرلەر فورۋمىندا ەل پرەزيدەنتى قاسىم-جومارت توقاەۆ بىلاي دەدى (تۇپنۇسقادان قاز-قالپىندا): «سەگودنيا كراسيۆايا جيزن ۆ سوتسسەتياح ي اگرەسسيۆنايا رەكلاما تاك نازىۆاەموگو «ۋسپەشنوگو ۋسپەحا» سوزدايۋت ۋ ليۋدەي يلليۋزيۋ، چتو دوبيتسيا ۆسەگو لەگكو ي پروستو. كاكايا-تو چاست مولودەجي ۆ ەتو ۆەريت ي تراتيت سۆوە دراگوتسەننوە ۆرەميا ۆپۋستۋيۋ».

مىنە، وسى «ۋسپەشنىي ۋسپەح» بۇگىندە قوعامدىق پىكىرگە ىقپال ەتۋ ساياساتىنا اۋىز سالا باستادى. پرەزيدەنتتىڭ پىكىر پريزماسى ارقىلى قوعامدا ورىن العان جەكەلەگەن جايتتەرگە توقتالايىن.

جۋىقتا الەۋمەتتىك جەلىلەر ارقىلى پارلامەنت سەناتىنىڭ بۇرىنعى باسشىسى داريعا نازارباەۆانى جەر-كوككە سىيعىزباي ماقتاعان ۆيدەو تاراعانى ءمالىم. البەتتە، تاقىرىپقا جەلەۋ بولعان پەرسوناجدىڭ باسقالاردان ادامي «ارتىقشىلىعى» بولسا، وعان ەشقانداي داۋ جوق. بىراق بۇل ادام – داريعا حانىم كەشە عانا ەلدەگى ەكىنشى باسشى رەتىندە جوعارى ساياسي لاۋازىم يەسى بولعانىن ۇمىتپاعان ءجون. سوندىقتان بۇنى بۇرىنعى ساياسي رەجيمنىڭ «ارتىقشىلىعىن» دارىپتەۋگە ارنالعان، قوعامدىق ساناعا سىڭىرىلمەك ساياسي مانيپۋلياتسيا دەپ قابىلداۋ كەرەك.

اسىرەسە قازاق قوعامىنا (قايتالاپ ايتام، قازاق قوعامىنا) ىرىتكى سالۋعا استىرتىن باعىتتالعان وسىنداي «ەسكىنى اڭساۋ» ءۇردىسى بۇگىندە ساياسي سيپات الا باستاعان سياقتى. الەۋمەتتىك جەلىلەر ارقىلى تاراپ جاتقان مۇنداي مانيپۋلياتسيا ارقىلى «جاڭا قازاقستاندى» ساياسي جىك-جىككە ءبولۋ، ءوش الۋ، ەسە قايتارۋ، «قايتىپ كەلۋ» ارەكەتىنىڭ الپەتىن سەزىنۋ قيىن بولماسا كەرەك.

ماسەلەن، تاعى ءبىر مىسال: قاڭتار وقيعاسىنا تىكەلەي قاتىسى بار، قانتوگىسكە سەبەپشى بولدى دەپ سانالاتىن «تەرىس ءدىني اعىم» يەلەرى ەندىگى جەردە قوعامنىڭ ساياسي ساناسىنا «قيقىم سالۋعا» بەلسەندى تۇردە كىرىسۋدە. بۇعان تاعى دا سول «ۋسپەشنىي ۋسپەح»-قا جەتكەن بۇرىنعىلار مۇرىندىق بولۋدا. قاڭتاردا مەملەكەتتىك توڭكەرىس جاساۋعا ارەكەتتەنىپ، اقىرىندا شەتەلگە قاشىپ كەتكەندەر بىرتىندەپ ەلگە ورالا باستادى.

ەندى ولار ەل ىشىنە ۇلتتىق مۇرا مەن سالت-ساناعا قارسى يدەولوگيانى ءۇيىرىپ، رەۆانشيستىك ساياساتتى قوعامعا سىڭىرۋگە قام جاساۋدا. ماقسات – ازىرگە ونسىز دا الا-قۇلا قوعامدا الەۋمەتتىك-پروتەستىك تەڭسەلىس پەن نارازىلىق تۇرعىسىندا تولقۋلار تۋدىرۋ. الەۋمەتتىك جەلىلەر مەن تارالىمى ميلليونعا تاقاۋ جازىلۋشىسى بار تانىمال ينتەرنەت رەسۋرستارعا قارجىلاي كومەك بەرۋ ارقىلى ولاردى ءوز «باۋىرلارىنا» باسىپ، اشىق پلاتفورمالار ارقىلى ساياسي تەڭسەلىستەر تۋدىرۋعا نيەتتى. ماعان مۇنداي ينسايدەرلىك اقپاراتتىڭ بىرنەشەۋى جەتتى.

«بۇگىنگى بيلىك وتستاۆكاعا كەتەدى»، «مەرزىمىنەن بۇرىن وتەتىن سايلاۋلارعا دايىندىق ءجۇرىپ جاتىر»، «دەپۋتاتتاردان ۇيات كەتتى» (مەن ءوزىمدى ۇياتتان كەتتىم دەپ ايتا المايمىن جانە وزگەگە دە ايتقىزبايمىن) دەگەن سياقتى جالاڭ ترەندتەردىڭ الەمجەلىگە ەركىن تاراۋىنا سول رەۆانشيستىك كۇشتەردىڭ قولتىققا سۋ بۇركۋ ارەكەتتەرى سەبەپ بولۋدا. بۇنىڭ ءبارى «بۇرىنعىنىڭ كەزىندە مۇنداي بولماعان» دەگەن تەزيستى تاراتۋ ارقىلى قوعامدىق ساناعا سولاقاي ساڭىلاۋ سالۋدىڭ ساياسي تەحنولوگياسى دەپ قابىلداۋ كەرەك.

مەن ءدال وسىنداي كونترپروپاگاندالىق ماتەريالداردىڭ ءبىر پاراسىن ءتيىستى ۆەدومستۆولاردىڭ جوعارى لاۋازىمگەرلەرىنە جولداعان ەدىم. ەندى قوعامعا ىرىتكى سالۋشى تۇپنۇسقالاردى انىقتاۋدى، ەڭ باستىسى – ەل-جۇرتقا جىك سالۋ پيعىلى بار وسىنداي «ەسكىشىل» استىرتىن كۇشتەردى انىقتاۋدى، ولار جونىندە قوعامعا تولىققاندى اقپارات بەرۋدى ۇلتتىق قاۋىپسىزدىك كوميتەتىنىڭ باسشىلىعىنان سۇرايمىن.

البەتتە، مەن مۇددەلى مەكەمەلەردى ءمانى مايىسقان ماسەلەنىڭ انىق-قانىعىن، مەملەكتتىڭ ءدىڭى مەن دىڭگەگىن سولقىلداتۋعا تىربانعان رەۆانشيستىك كۇشتەردى انىقتاۋعا شاقىرعاندا، دەپۋتات باپي ءسوز بوستاندىعىنا نۇقسان كەلتىرۋگە اسەر ەتۋدە دەگەن وي بولماۋى كەرەك. ەشقانداي زاڭسىز قۋدالاۋ بولماۋى ءتيىس. بۇل ۇلتتىڭ، ەلدىڭ، مەملەكەتتىڭ تۇتاستىعىنا تانتىلىكتەن تۋعان ارەكەت دەپ قابىلدانۋى كەرەك.

بىراق جەمە-جەمگە كەلگەندە، «ەسكىشىلدىك» تەحنولوگياسى ۇلتتىق تۇتاستىققا قاستىق قىلاتىن، قازاق قوعامىن ساياسي لاگەرلەرگە بولشەكتەۋگە قۇشتار «ءسوز بوستاندىعى» ءبىزدىڭ ەلدىك بولاشاعىمىزعا قاتەر تۋدىرۋى ابدەن مۇمكىن. قازاقستاننىڭ قاۋىپسىزدىگىنە، جۋىق بولاشاقتاعى ەلدىك مۇراتىنا قاسكۇنەم مۇنداي ءسوز بوستاندىعى بىزگە قاجەت ەمەس دەپ سانايمىن.

سول سياقتى «بۇرىنعى بيلىكتى» اڭساۋشىلار ۋشىقتىرىپ، قازاقتار مەن جالپى مۇسىلماندار دۇنيەسىن «جاڭا قازاقستانعا» قارسى ايداپ سالىپ جۇرگەن ءدىني-ساياسي ارەكەتتەر دە اشكەرەلەنۋى كەرەك. قازاقتىڭ مىڭ جىلدىق ۇلتتىق مۇراتتارى مەن ۇلتتىق سالت-ءداستۇرى شاريعاتپەن ەمەس، ءتيىستى زاڭناما نورمالارىمەن رەتتەلۋى تيىستىگىن ۇمىتپايىق!

ەرمۇرات باپي،

قر پارلامەنتى ءماجىلىسىنىڭ دەپۋتاتى، حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەسى

Abai.kz