ۋكراينداردىڭ تۇڭعىش پرەزيدەنتكە دەگەن وكپەسى قارا قازانداي. جاڭا قازاقستان ورناعالى يممۋنيتەتى السىرەگەن نازارباەۆتى اتاق-ماراپاتىنان ايىرۋ ءۇردىسى جالعاسىن تابۋدا, - دەپ جازادى DALA INSIDE.

كيەۆ يدەولوگتارى ءتۇرلى كەزەڭدە ءابىشۇلىنىڭ كەۋدەسىنە تاققان وردەن-مەدالداردى كەرى قايتارۋدى ويلاسا باستاعان.

سوعىس باستالعالى ۋكراين قوعامىنىڭ وي-ساناسىندا كۇردەلى وزگەرىس ءجۇردى. حالىق دوس پەن دۇشپاندى ايىرا الماعان وسىعان دەيىنگى ورىسشىل بيلىكتىڭ شەشىمدەرىن قايتا قاراۋدى تالاپ ەتۋدە. سونىڭ ىشىندە - توسبەلگى ماسەلەسى دە تىس قالماق ەمەس.

نازارباەۆ ۋكراينانىڭ بىرقاتار مارتەبەلى ناگراداسىمەن ماراپاتتالعان. العاشقىسىن 1997 جىلى كۋچمانىڭ قولىنان الدى. «ەكى ەل اراسىنداعى دوستىق پەن ارىپتەستىكتى دامىتۋعا سىڭىرگەن ەڭبەگى ءۇشىن» كناز ياروسلاۆ مۋدرىي اتىنداعى ءى دارەجەلى توسبەلگىنى كەۋدەسىنە تاقتى.

ەكس-پرەزيدەنتتىڭ كەۋدەسىن كومكەرگەن سالپىنشاقتاردىڭ اراسىندا «ەركىندىك» (سۆوبودي) وردەنىنىڭ ورنى بولەك. مۇنى 2010 جىلى 70-كە تولاردا ءازىر رەسەيدە بوي تاسالاپ جۇرگەن ۆيكتور يانۋكوۆيچتىڭ قولىنان الدى.

ەسكەرتۋ: «ەركىندىك» وردەنى شەتەل باسشىلارىنىڭ كەۋدەسىنە تاعىلاتىن ەڭ بەدەلدى ماراپات. ونىمەن تەرەزەسى تەڭ دەۋگە تۇرارلىق ناگرادا كەمدە كەم.

بۇل وردەنمەن ادەتتە ۋكراينانىڭ ەگەمەندىگى مەن تاۋەلسىزدىگىن بەكىتۋگە ايرىقشا ۇلەس قوسقان، دەموكراتياعا دەم بەرگەن، ءسوز بوستاندىعى مەن ادام قۇقىعى ءۇشىن تالماي تەر توككەن تۇلعالار ناگراتتالادى.

ۋكراين قوعامىنىڭ اشۋ-ىزاسىن تۋعىزىپ وتىرعان دا وسى جايت. نازارباەۆ اتالعان كريتەريلەردىڭ ءبىر دە بىرىنە ساي كەلمەيدى. مايدانداعى حالىقتىڭ تەگەۋرىنىنە توتەپ بەرە الماي، رەسەيدى پانالاۋعا ءماجبۇر بولعان يانۋكوۆيچ نازارباەۆتى وردەنگە ۇسىناردا ىلگەرىدەگى پرينتسيپتەردىڭ ءبىر دە ءبىرىن ەسەپكە الماعان…

كيەۆ يدەولوگتارى مەن ۋكراين قوعامىنىڭ مۇنداي ادىلەتسىزدىككە كونگىسى جوق. ەل باسقارعان تۇستا قىرىمعا قاتىستى پوزيتسياسىن ناقتى ايقىنداي الماعان نازارباەۆتى اتاق-داڭقىنان ايىرۋعا بەكىپ وتىر.

ەكس-پرەزيدەنت 2013 جىلعى ەۋرومايداندى توڭكەرىسكە تەڭەگەن بولاتىن.

«ەركىندىككە ۇمتىلعان ۋكراين حالقىنىڭ كوڭىلىندە دىك قالدى. نازارباەۆتىڭ سول ءبىر ءسوزى اينالىپ الدىنان شىقتى. ودان بەرى دە كيەۆتىڭ كوڭىلىنە تيگەن بىرقاتار مالىمدەمە جاساپ، رەسەيدىڭ ىڭعايىنا جىعىلدى. «ۋكراينادا ۇلتتىق تۇتاستىق جوق…» دەي كەلە، پۋتين پروپاگانداسىنىڭ ريتوريكاسىن قايتالادى. نازارباەۆتىڭ كەۋدەسىنە تاققان توسبەلگىلەردى قايتارۋ شەشىلگەن ماسەلە»، - دەيدى بۇل رەتتە DALA INSIDE دەرەككوزى.

Abai.kz