الماتىنىڭ بۇرىنعى اكىمى باۋىرجان بايبەكتىڭ اكەسى قىدىرعالي بايبەك استانادا سوتتالىپ جاتىر. سوت كابينەتى پورتالى ونىڭ ۇستىنەن ەكى ءىستىڭ اشىلعانىن حابارلادى.

اكىمشىلىك قۇقىق بۇزۋشىلىق ىستەرى جونىندەگى مامانداندىرىلعان اۋدانارالىق سوتى ءبىرىنشى ءىستى 26 ماۋسىمدا قابىلداعان. ال سوت پروتسەسى 11 شىلدەدە بەينەبايلانىس ارقىلى ءوتۋى كەرەك ەدى.

قىدىرعالي بايبەككە اكىمشىلىك قۇقىق بۇزۋشىلىق تۋرالى كودەكستىڭ 319-بابى بويىنشا ايىپ تاعىلدى. وسى باپتا ءتيىستى جەرگە قۇقىقسىز وندىرىستىك، تۇرعىن ءۇي، شارۋاشىلىق، گيدروتەحنيكالىق (سۋ شارۋاشىلىعى) نەمەسە شارۋاشىلىق-تۇرمىستىق وبەكتىلەردى زاڭسىز سالۋ انىقتالعان. باپتىڭ سانكتسياسى زاڭسىز سالىنعان جانە قۇرىلىستى ماجبۇرلەپ بۇزۋمەن نەمەسە ايىپپۇل سالۋدى قاراستىرادى.

بايبەكتىڭ اكەسىنىڭ ۇستىنەن قوزعالىپ جاتقان ەكىنشى ءىس اقبتك-ءنىڭ 463-بابىنىڭ ءبىرىنشى بولىگى بويىنشا قارالماق. اكiمشiلiك قۇقىق بۇزۋشىلىق تۋرالى بۇل باپ تيiستi تiركەۋسiز، رۇقساتسىز نەمەسە حابارلاما جىبەرمەي كاسىپكەرلىك نەمەسە وزگە دە قىزمەتپەن اينالىسۋ، سونداي-اق ارەكەتتەردi جۇزەگە اسىرۋدى قاراستىرادى.

ايتا كەتەيىك، قىدىرعالي بايبەك الماتىنىڭ ەكس-اكىمى باۋىرجان بايبەكتىڭ اكەسى جانە نۇرسۇلتان نازارباەۆتىڭ سىنىپتاسى. بىرنەشە جىل بويى تەمىرجول سالاسىندا جۇمىس ىستەگەن.

ونىڭ ۇلى باۋىرجان بايبەك 2015 جىلدان 2019 جىلعا دەيىن الماتىنى باسقاردى، «Nur Otan» پارتياسىندا ەكس-پرەزيدەنتتىڭ ءبىرىنشى ورىنباسارى بولدى. قاڭتار وقيعاسىنان كەيىن كەنەت قوعامدىق قىزمەتىن باسەڭدەتىپ، جۇرت كوزىنەن تاسالاندى. الەۋمەتتىك جەلىلەردە بايبەكتىڭ الماتى اكىمى بولىپ جۇمىس ىستەگەن جىلدارى سىبايلاس جەمقورلىققا قاتىسى بولۋى مۇمكىن دەپ كۇدىكتەلگەنى تۋرالى اقپارات شىقتى. رەسمي ورگاندار ونى راستامادى. كەيىن بايبەكتىڭ بىردە تۇركيادا، تاعى بىردە مەككەدە، ەندى بىردە گەرمانيادا جۇرگەن سۋرەتتەرى باسىلىمداردا جاريالاندى.

Abai.kz