بىلتىر اقپاننىڭ 24-كۇنى رەسەي پرەزيدەنتى پۋتين ۋكرايناعا قارسى اتالمىش سوعىس باستاپ، الەم جۇرتىن الاڭداتقاندا امەريكانىڭ الدىنعى كەزەك پرەزيدەنتى بولعان ترامپ تا جەكە الەۋمەتتىك جەلىسى ارقىلى كوزقاراسىن ءبىلدىرىپ: «مەن كەزىندە پۋتينگە: «سەن كيەۆكە شابۋىلداساڭ مەن ماسكەۋگە شابۋىلدايمىن»، - دەپ كەسىپ ايتقام. ءمۇنىڭ ءبارى بايدەننىڭ وسالدىعىنان بولدى»، - دەپ پىكىر بىلدىرگەن ەدى.

ول سونداي-اق، اۋعانستاندا تالىپتەردىڭ بيلىككە كەلۋى دە بايدەن بيلىگىنىڭ سىرتقى ساياساتىنىڭ السىزدىگىنىڭ سالدارى دەپ كورسەتكەن.

كوكتەمدە كەلەسى جىلعى پرەزيدەنت سايلاۋىنا تۇسەتىنىن رەسمي تۇردە جاريالاعان ترامپ جاقتاستارىنىڭ الدىندا سويلەگەن سوزىندە ءوزىنىڭ سوعىستى ءبىر تاۋلىك ىشىندە توقتاتا الاتىنىن جەتكىزگەن ەدى، بىراق ناقتى بارىسىن اشىپ ايتپاعان. كۇنى كەشە امەريكانىڭ ايگىلى Fox news تەلەارناسىنىڭ ءتىلشىسى ترامپتان سوعىستى ءبىر تاۋلىكتە توقتاتاتىن ەرەكشە تاكتيكاسى تۋرالى ەگجەي-تەگجەيلى ايتىپ بەرۋدى سۇراپ، سۇحبات الىپتى.

ۋكراينا پرەزيدەنتى زەلەنسكي جايلى توقتالعان ترامپ وعان ءوزى پرەزيدەنت بولىپ تۇرعان 2019 جىلى بايدەننىڭ ۇلىنىڭ ۋكرايناداعى بىلىقتارى تۋرالى تەكسەرىس جۇرگىزۋگە قولقا سالعانىن، سول كەزدە كونگرەسستە باسىم ورىنعا يە بولىپ تۇرعان دەموكراتتار وزىنە «پرەزيدەنتتىك قۇقىعىن اسىرا پايدالاندى» دەپ ايىپ تاققانىن، سونداي سىن ساتتە ۋكراينا باسشىسىنىڭ وزىنە ەشقانداي قىسىم بولماعانىن ايتىپ ۇلكەن ادامگەرشىلىك تانىتقانىن ايتادى.

ال ونىڭ سوعىستى دەرەۋ توقتاتاتىن تاكتيكاسى مىناۋ ەكەن: ترامپ زەلەنسكيگە تاۋلىك ىشىندە پۋتينمەن كەلىسىمگە كەلمەسە بەرىلىپ جاتقان اسكەري كومەكتى بىردەن توقتاتاتىنىن جەتكىزەدى، ال ورىس باسشىسى پۋتينگە تاۋلىك ىشىندە زەلەنسكيمەن كەلىسىمگە كەلمەسە ولارعا بەرىلەتىن كومەكتى ەكى ەسە كوبەيتەتىنىن ايتادى.

ساراپشىلار ترامپتىڭ ءوزى ەرەكشە سەنىم ارتقان تاكتيكاسىنا كۇمانمەن قاراپ وتىر. «امەريكا ۋكرايناعا كومەكتى توقتاتسا انگليا، رەسەيمەن شەكارالاس فينلانديا، پولشا، كەڭەس وداعى قۇلاعان سوڭ ناتو قۇرامىنا ەنگەن بالتىق ەلدەرى باستاعان مەملەكەتتەر، جاقىندا وتكەن ناتو-نىڭ جينالىسىنا قوناق رەتىندە قاتىسقان جاپونيا مەن كورەيا كومەكتەسەر ەدى» دەپ سانايدى.

ساياساتتانۋشىلار سونداي-اق، ترامپتىڭ تايۋان ماسەلەسىنە بايلانىستى ايتقان سوزدەرىن دە قۇپتاماي وتىر. ترامپ «تايۋان كومپانيالارى چيپ ءوندىرىسىنىڭ 90 پايىزدان استامىن وزىنە كوشىرىپ، امەريكالىقتاردىڭ نانىن تارتىپ الدى» دەپ سانايدى. ولارعا قارسى كەدەن سالىعىن كوبەيتۋدى ۇسىنادى. سونىمەن بىرگە ول ءتىلشىنىڭ «قىتاي باسشىسى امەريكانى نەگە جەك كورەدى؟» دەگەن سۇراعىنا «ول ءوز ەلىن وتە جاقسى كورەدى. گولليۆۋدتا قىتاي باسشىسىنىڭ وبرازىن سومداي الاتىن بىردە ءبىر اكتەر جوق» دەپ سەنىمدى تۇردە جاۋاپ بەرەدى.

ەسبول ۇسەنۇلى

Abai.kz