الەكساندر لۋكاشەنكوعا قاتىستى گااگاداعى حالىقارالىق قىلمىستىق سوت (حقس) وردەر بەرمەك.

الەم جۇرتشىلىعى بەلارۋس باسشىسىنىڭ بىردە تىكەلەي، ەندى بىردە جاناما تۇردە پۋتين اشقان سوعىستى قولداۋىنا قاتىستى ءالىپتىڭ ارتىن باعىپ كەلگەن-ءتىن. ەندى مىنە، شىدامنىڭ دا شەگى بار ەۋروپارلامەنت الەكساندر لۋكاشەنكوعا قاتىستى گااگاداعى حالىقارالىق قىلمىستىق سوتتان (حقس) وردەر بەرۋىن تالاپ ەتتى.

ەۋروپارلامەنتتىڭ سىرتقى ىستەر كوميتەتى ماقۇلداپ ۇسىنىلعان قۇجاتتىق مالىمدەمەدە بەلارۋستىڭ ۋكرايناعا كەلتىرگەن سوعىس جانە ادام شىعىنى مەن قاتار، ونىڭ اۋماعىندا جاسالعان قىلمىسقا دا قاتىسى بارلىعى ءسوز ەتىلەدى. سونىمەن بىرگە ەۋروپارلامەنت دەپۋتاتتارى زاڭسىز دەپورتاتسيالانعان ۋكراين بالالارىنىڭ تاعدىر تالكەگىنە لۋكاشەنكو رەجيمىنىڭ دە قاتىسى بارلىعىن اتاپ ءوتتى. بۇل تۋراسىندا ەۋروپارلامەنتتىڭ ءباسپاسوز قىزمەتى:

«حقس بۇعان دەيىن رەسەي پرەزيدەنتى ۆلاديمير ءپۋتيندى جانە رەسەيدىڭ بالا قۇقىعى بويىنشا توتەنشە وكىلى ماريا لۆوۆا-بەلوۆانى تۇتقىنداۋعا قاتىستى وردەر بەرگەن بولاتىن، ەندى ەۋرودەپۋتاتتار اتالعان ۇيىمدى الەكساندر لۋكاشەنكوعا قاتىستى تاپ سونداي وردەر بەرۋگە شاقىردى»، – دەپ حابارلادى.

ەۋرودەپۋتاتتار وسى ەلدىڭ تۇرمەسىندە پىكىرى سىيىسپاعان 1500 ساياسي تۇتقىن ازاپ شەگىپ وتىرعاندىعىن العا تارتادى جانە ءوز ەلىن رەسەي وتارىنا اينالدىرىپ، ورىس-ۋكراين سوعىسىندا ءپۋتيننىڭ جاندايشابىنا اينالعان جاننان ەش جاقسىلىق كۇتۋگە بولمايتىندىعىن جونىندەگى ءوز ءۋاجدارىن ناقتى مىسالدارمەن كەلتىرەدى.

كوميتەتتىڭ دايىنداعان بايانداماسى ەۋروپارلامەنت بەكىتۋىنە ۇسىنىلىپ، قىركۇيەك ايىندا بولاتىن وتىراستا داۋىسقا سالىنادى.

Abai.kz