بەلگيا نەگە كورىقتى ءھام ءپۋتيننىڭ اقشاسىن كىم الماق؟

ەۋروپادا جىلدار بويى قوزعاۋسىز جاتقان رەسەي ورتالىق بانكىنىڭ وراسان زور قارجىسى توڭىرەگىندە ۇلكەن گەوساياسي دەتەكتيۆ ءوربىپ جاتىر!

ەۋروپالىق وداق ەلدەرىندە كرەملدىڭ 210 ميلليارد ەۋرودان استام اكتيۆى بۇعاتتالعان. بۇل قاراجاتتىڭ باسىم بولىگى بەلگياداعى Euroclear دەپوزيتاريىندە ساقتاۋلى. الايدا، وسى ۋاقىتقا دەيىن بۇل اقشانى ۋكرايناعا بەرۋ ماسەلەسىنە كەلگەندە، بەلگيا بيلىگى اشىقتان-اشىق تايساقتاپ كەلدى.

نەگە؟ سەبەبى – كرەملدىڭ قۇپيا قوقان-لوقىسى! بەلگيا پرەمەر-ءمينيسترى بارت دە ۆەۆەر مەن Euroclear باسشىلىعى رەسەي بارلاۋ قىزمەتى تاراپىنان دوڭايبات پەن قاۋىپ-قاتەر سوزدەرىن العانىن جاسىرمايدى. «بۇل اقشاعا تيىسسەڭدەر، سالدارى ماڭگىلىككە سوزىلادى» دەگەن سەس كورسەتەتىن حابارلامالاردان كەيىن بريۋسسەل تاۋەكەلگە بارۋدان جۇرەكسىندى.

بىراق گەوساياسي ويىننىڭ ەرەجەسى وزگەردى! ەندى ساحناعا گەرمانيانىڭ بۇرىنعى قورعانىس ءمينيسترى اننەگرەت كرامپ-كاررەنباۋەر، فرانتسيانىڭ بۇرىنعى ەۋروپا ىستەرى جونىندەگى ءمينيسترى ناتالي لۋازو جانە اقش-تىڭ سانكتسيالار جونىندەگى ەكس-كەڭەسشىسى داليپ سينگح شىقتى. بۇل اۋىر سالماقتى ساياساتكەرلەر توبى باتىل جوسپار ۇسىندى:

قورقىنىشتى سەيىلتۋ: رەسەي اكتيۆتەرىن ساقتاۋ قۇقىعىن بەلگيادان جەكە ەۋروپالىق وداقتىڭ جاڭا ارنايى قارجى دەپوزيتاريىنە وتكىزۋ. سوڭىندا كرەملدىڭ قىسىمى ءبىر ەلگە ەمەس، بۇكىل ەو-عا باعىتتالادى، ال بۇل رەسەي ءۇشىن الدەقايدا قيىن. ۋاقىت تىعىز: ۋكرايناعا بەرىلەتىن ەو-نىڭ 90 ميللياردتىق نەسيەسى ءبىتىپ بارا جاتىر. الداعى قىسقا دەيىن جانە فرانتسياداعى سايلاۋ مەن اقش-تاعى ساياسي وزگەرىستەرگە دەيىن Kيەۆكە تۇراقتى قارجىلىق رەزەرۆ قالىپتاستىرۋ قاجەت. كوزىردى تارتىپ الۋ: ەگەر ەو بۇل اقشانى ءوزى باقىلاۋعا السا، بۇل قاراجات ۆاشينگتون مەن موسكۆانىڭ اراسىنداعى استىرتىن «كەلىسىمدەردىڭ» قۇرالىنا اينالمايدى.

بۇل – تەك اقشا تۋرالى ماسەلە ەمەس، بۇل – ەۋروپانىڭ ساياسي ەرىك-جىگەرى مەن كرەملدىڭ «قورقىنىش تاكتيكاسىنا» قارسى اشىق مايدانى!

ءابىل-سەرىك الىاكبار

Abai.kz