ۇكىمەت قايتارىلعان اكتيۆتەردى باسقاراتىن جاۋاپكەرشىلىگى شەكتەۋلى سەرىكتەستىك قۇراماقشى. بۇل اشىق نقا پورتالىندا جاريالاندى.

«جارعىلىق كاپيتالىندا مەملەكەتتىڭ ءجۇز پايىز قاتىسۋىمەن «قايتارىلعان اكتيۆتەردى باسقارۋ جونىندەگى كومپانيا» جاۋاپكەرشىلىگى شەكتەۋلى سەرىكتەستىگى قۇرىلسىن»، – دەلىنگەن قاۋلى جوباسىندا.

جشس-ءنىڭ نەگىزگى ماقساتتارى «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» قازاقستان رەسپۋبليكاسىنىڭ زاڭىندا جانە قازاقستان رەسپۋبليكاسىنىڭ باسقا دا زاڭدارىندا، نورماتيۆتىك قۇقىقتىق اكتىلەرىندە بەلگىلەنگەن تارتىپپەن قايتارىلعان اكتيۆتەردى باسقارۋ، ساقتالۋىن قامتاماسىز ەتۋ، وتكىزۋ بولماق.

سەرىكتەستىكتىڭ جارعىلىق كاپيتالى وسى قاۋلىعا قوسىمشاعا سايكەس قازاقستان رەسپۋبليكاسى قارجى مينيسترلىگىنىڭ مەملەكەتتىك مۇلىك جانە جەكەشەلەندىرۋ كوميتەتىنىڭ تەڭگەرىمىندەگى مۇلىكتى بەرۋ جولىمەن قالىپتاستىرىلسىن، – دەلىنگەن اقپاراتتا.

جوباعا رەسپۋبليكالىق بيۋدجەتتەن قارجى بولىنبەيدى.

جاڭادان قۇرىلاتىن جشس ءوز الدىنا مىناداي مىندەتتەر قويماق: مەملەكەتكە قايتارىلعان اكتيۆتەردى ونىڭ اتىنان مەنشىگىنە قابىلداۋ، مەملەكەت كىرىسىنە اينالدىرىلعان اكتيۆتەردىڭ ساقتالۋىن جانە ۇستالۋىن قامتاماسىز ەتۋ، اكتيۆتەرگە بيلىك ەتۋ، اكتيۆتەردى وتكىزۋدەن تۇسكەن قاراجاتتى ارناۋلى مەملەكەتتىك قورعا اۋدارۋدى قامتاماسىز ەتۋ.

قوسىمشاعا سايكەس، جاڭا كومپانيانىڭ جارعىلىق كاپيتالىنا رەسپۋبليكالىق مۇلىكتى ءۇش جۇيەلىك بلوك جانە ءۇش مونيتور تۇرىندە بەرۋ جوسپارلانۋدا.

ەسكە سالساق، 12 شىلدەدە «زاڭسىز ساتىپ الىنعان اكتيۆتەردى مەملەكەتكە قايتارۋ تۋرالى» زاڭعا جانە قولدانىستاعى نورماتيۆتىك-قۇقىقتىق اكتىلەرگە وزگەرىستەر مەن تولىقتىرۋلار ەنگىزىلگەن بولاتىن.

Abai.kz