رەسەيدىڭ سوعىس سيمۆولدارىن قازاقستاندا تاراتۋعا "تىيىم". پروكۋرور اقپاراتتى جوققا شىعاردى. بۇل تۋرالى ازاتتىق راديوسى حابارلادى.

"اتامەكەن" ۇلتتىق كاسىپكەرلەر پالاتاسى سايتىندا رەسەيدىڭ ۋكرايناعا باسقىنشىلىق سوعىسىمەن، سونداي-اق "شىعىس تۇركىستان", "كۇردىستان جۇمىسشىلار پارتياسى" ۇيىمدارىمەن بايلانىستى بەلگىلەرى بار تاۋارلاردى قازاقستاندا ساتۋعا تىيىم سالۋ تۋرالى اقپارات جاريالاندى دا كەيىن ءوشىرىلدى.

جاڭالىقتا ەسىمى اتالعان سەمەي قالالىق پروكۋراتۋراسىنىڭ پروكۋرورى قۋات باپينوۆ تا اقپاراتتى جوققا شىعاردى.

ساياساتتانۋشى رەسەي اگرەسسياسىن قولدايتىن ارنايى سيمۆوليكالاردى قازاقستاندا تاراتۋعا رەسمي تىيىم سالۋدى جاسىرۋدىڭ ارتىندا بيلىكتىڭ كرەمل الدىنداعى قورقىنىشى تۇر دەپ سانايدى.

سوعىس سيمۆوليكالارىنىڭ قاسىنا «شىعىس تۇركىستان»، «كۇردىستان جۇمىسشىلار پارتياسى» دەگەن ۇيىمداردىڭ اتاۋىن قوسىپ قويۋى دا تايساقتاۋدىڭ ءبىر كورىنىسى دەيدى.

Abai.kz