بەيسەنبى, 18 شىلدە 2024
ءوز ءسوزىم... 11087 72 پىكىر 12 قىركۇيەك, 2023 ساعات 14:42

كوڭىلباي شۇكەنوۆكە شۇيلىگىپ جۇرگەندەر كىم؟

قازاقستان رەسپۋبليكاسىنىڭ

باس پروكۋرورى ب.ن. اسىلوۆتىڭ;

قازاقستان رەسپۋبليكاسى

جوعارعى سوتىنىڭ توراعاسى

ا.ا. مەرعاليەۆتىڭ نازارىنا!

مەن كوڭىلباي شۇكەنوۆ دەگەن جىگىتتى سوڭعى بەس-التى جىلدان بەرى جاقسى بىلەمىن. سوڭعى ۋاقىتتا ءتىپتى جاقىن ارالاسىپ كەتتىك. كاسىپكەر. مەتسەنات. قازاقتا «قارا قۇس باسىپ جەيدى، سۇڭقار شاشىپ جەيدى» دەگەن كەرمەت ماقال بار عوي. ءبىر سوزبەن ايتقاندا، كوڭىلباي شۇكەنوۆ تاپقانىن حالقىمەن ءبولىسىپ كەلە جاتقان سۇڭقار مىنەزدى جىگىت!

ءار كەزدەسكەن سايىن، كوڭىلباي قالدىبەكۇلى ماعان كىمگە باسپانا اپەرگەنىن، كىمگە ماشيا سىيلاعانىن ايتىپ، ىلعي جۇرەك تولقىتاتىن قۋانىشتى جاڭالىقتارىن جەتكىزەتىن.

سوڭعى كەزدەسكەنىمىزدە كوڭىلباي ءىنىم ماعان ءوز باسىنان ءوتىپ جاتقان وتە ءبىر كوڭىلسىز جاعدايدى بايانداپ، توبە شاشىمدى تىك تۇرعىزدى.

ونىڭ ايتىسىنا قاراعاندا، وسىدان ءۇش-ءتورت كۇن بۇرىن استانا قالاسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ قىزمەتكەرلەرى ونىڭ ءۇيى مەن كەڭسەلەرىنە باسىپ كىرىپ، ءتىنتۋ جۇرگىزىپتى.

كوڭىلبايدىڭ ايتۋىنشا، باسا-كوكتەپ كىرگەن توپتىڭ قولىندا ءتىنتۋ جۇرگىزۋ تۋرالى سوتتىڭ شەشىمى بار كورىنەدى.

ماسقارا بولعاندا، ول ءتىنتۋ تۋرالى شەشىم كوڭىلباي شۇكەنوۆ نەگىزىن قالاپ، قازىر ءوزى باسشىلىق ەتىپ وتىرعان «Amanat Drive» كووپەراتيۆىن ەمەس، «Amanat Home» كووپەراتيۆىن ءتىنتۋ تۋرالى شىعارىلىپتى.

ول از بولعانداي، ءبىر توپ جەلوكپە جۋرناليست كوڭىلباي شۇكەنوۆتى قارالاۋ تۋرالى ارنايى بەينەماتەريالدار ۇيىمداستىرىپ، ول بەينەماتەريالدى رەسەيگە تاۋەلدى ءبىر تەلەارنادان تاراتپاقشى بولىپ جاتقانعا ۇقسايدى.

كوڭىلباي قالدىبەكۇلىنىڭ ۇستاپ جۇرگەن ۇيالى تەلەفونىن دا تەكسەرۋگە الىپ كەتىپتى...

ال، «Amanat Home» كووپەراتيۆىن كەزىندە كوڭىلباي شۇكەنوۆ  قۇرعانىمەن، قازىر ول كووپەراتيۆتىڭ قوجايىنى باسقا ادام. «Amanat Home» كووپەراتيۆىنىڭ سالىمشىلارى سايلاۋ وتكىزىپ، باسىم داۋىسپەن كوڭىلباي شۇكەنوۆتىڭ كانديداتۋراسىن شەتكە قاعىپ، باسقا ازاماتتى جەتەكشى ەتىپ سايلاپ العان. سوسىن، كوڭىلباي قالدىبەكۇلىنىڭ «Amanat Drive» كووپەراتيۆىن قۇرىپ، اياعىنان تۇرعىزىپ، بۇگىندە جەمىستى جۇمىس ىستەپ جاتقانى ءمالىم.

بۇل تۋرالى كوڭىلباي شۇكەنوۆ ءوزىنىڭ الەۋمەتتىك جەلىلەردە، باق-تا جاساعان ۇندەۋلەرى مەن لەكسيالارى، سۇحباتتارى ارقىلى ءجۇز قايتارا ايتىپ كەلەدى. «Amanat Drive» كووپەراتيۆىنە مۇددەلى، مۇددەسىز قاۋىم ونى جاتقا بىلەدى.

مەن بىلگەندە، «Amanat Drive» – جۇرتقا پايىزسىز نەسيە بەرۋ ارقىلى باسپانامەن، كولىكپەن قامتاماسىز ەتۋگە ارنالعان، بانكتەرگە، اسىرەسە «وتباسى بانك» اق-عا باسەكەلەس بىرەگەي كووپەراتيۆ.

سوڭعى ۋاقىتتا «Amanat Drive» كووپەراتيۆىنىڭ بەدەلى كوتەرىلىپ، جۇرتتىڭ جاپپاي قولداۋىنا يە بولا باستاعانىن بۇكىل حالىق كورىپ وتىر. باسپانا مەن كولىك الۋدا جۇرتقا وتە ءتيىمدى بولعان سوڭ، ازاماتتاردىڭ بانكتەردەن باسپانا ءۇشىن سالعان قارجىسىن شىعارىپ الىپ، وسى كووپەراتيۆكە قۇيا باستاعانىن دا جاقسى بىلەمىز.

بۇل – نارىقتىق قوعامنىڭ بۇلجىماس زاڭى! ناعىز بىسەكەلەستىك دەگەن – وسى!

ءيا، كوڭىلباي شۇكەنوۆكە دۇركىن-دۇركىن اقپاراتتىق شابۋىلداردىڭ بولىپ جاتاتىنىن دا كورىپ كەلەمىز. بىراق، ەشبىر قۇقىق قورعاۋ ورگاندارى سوت شەشىمىمەن «Amanat Drive» كووپەراتيۆىنىڭ جۇمىسىن توقتاتقان ەمەس.

مۇنداي قارجىمەن جۇمىس ىستەيتىن ۇيىمداردىڭ اينالاسىندا ارىزدار مەن وتىنىشتەردىڭ، وكپە-رەنىشتەردىڭ بولىپ جاتۋى دا تابيعي قۇبىلىس. بىراق، ونداي داۋ-دامايلاردىڭ ءبارى ءبىر ۇستەلدىڭ باسىندا بەتپە-بەت كەلىسىمدەر، تۇسىندىرۋلەر ارقىلى شەشىلۋى كەرەك. ودان شەشىلمەسە، ادۆوكات جالداپ، سوتقا جۇگىنىپ شەشۋگە بولادى عوي.

ءبىر قىزىعى، «Amanat Drive» كووپەراتيۆىنىڭ سالىمشىلارىنىڭ ىشىنەن باسپانا نەمەسە كولىك الۋ مەرزىمىنىڭ بەلگىلى سەبەپتەرمەن ۇزارىپ كەتۋىنە بايلانىستى الەۋمەتتىك جەلىلەر ارقىلى رەنىش بىلدىرگەندەر بار شىعار، بىراق «كوڭىلباي شۇكەنوۆ اقشامىزدى الداپ، جەپ كەتتى!» دەگەندەر بولعان جوق. ءتىپتى، ۇزاق كۇتۋگە شىدامى جەتپەگەندەر بولسا، ولار ەكى جاقتى جاسالعان كەلىسىم-شارتتىڭ نەگىزىندە سالعان اقشالارىن قايتارىپ الىپ جاتادى.

«Amanat Drive» كووپەراتيۆىنىڭ جۇرتقا تيىمدىلىگى سول، مىسالى 20 ميلليون تەڭگەگە دەيىنگى سوماعا باسپانا الماق بولساڭىز، الدىمەن 5 پايىز كىرۋ جارناسىن، 30 پايىز العاشقى سوماسىن قۇياسىز. قالعان 14 ميلليون تەڭگەنى «Amanat Drive» كووپەراتيۆى سىزگە ون جىلعا اي سايىن ءبولىپ تولەۋگە ءوسىمسىز بەرەدى. قۇشاق-قۇشاق قۇجات جيىپ اۋرە بولمايسىز. تەك قانا جەكە باسىڭىزدىڭ كىم ەكەنىن دالەلدەيتىن كۋالىك پەن نەكەدەگى جۇبايىڭىزدىڭ كەلىسىمى بولسا، جەتىپ جاتىر. جاسىڭىزعا، جۇمىسىڭىزدىڭ بار-جوقتىعىنا، بىرىڭعاي جيناقتاۋشى زەينەتاقى قورىندا قارجىڭىزدىڭ بولعان-بولماعانىنا قاراماي، اتالعان كووپەراتيۆتىڭ سالىمشىسى بولا الاسىز.

ەڭ كەرەمەتى، «Amanat Drive» كووپەراتيۆى ارقىلى وسى جولمەن العان باسپاناڭىزدىڭ پاسپورتى بىردەن قولىڭىزعا بەرىلەدى.

بەلگىلى سەبەپتەرمەن بۇل كووپەراتيۆ ارقىلى العان باسپاناڭىزدىڭ اي سايىنعى سوماسىن تولەي الماي قالساڭىز، ەكى اي مەرزىمگە سىزگە ۋاقىت بەرەدى. ال، ودان ارى دا تولەۋگە مۇمكىندىگىڭىز مۇلدە بولماسا، وندا كووپەراتيۆ پاتەردى قايتارىپ الادى دا، ءسىزدىڭ العاشقى قۇيعان 30 پايىز سوماڭىزدى جانە اي سايىن قۇيىپ كەلگەن اقشاڭىزدى تۇگەل ءبىر جولا وزىڭىزگە قايتارىپ بەرەدى.

ال، 20 ميلليون تەڭگەدەن كوپ سوماعا پاتەر الماق بلساڭىز، كىرۋ جارناڭىز سول 5 پايىز، ال العاشقى تولەيتىن سوماڭىز 30 ەمەس، 50 پايىزعا جوعارلايدى.

كولىك الۋدىڭ دا شارتى وسىلاي...

ەندى ءسىز  «Amanat Drive» كووپەراتيۆى مەن بانكتەردىڭ باسپانا بەرۋگە ارنالعان نەسيەلەۋ ءتارتىبىن نەمەسە ۇكىمەتتىڭ باسپانامەن قامتۋ تۋرالى باعدارلامالارىن سالىستىرىپ كورىڭىز.

ايىرماسى – جەر مەن كوكتەي!

تيىمدىلىك جاعىنان ولار «Amanat Drive» كووپەراتيۆىنىڭ شاڭىنا ىلەسە المايدى!

جۇرتتىڭ ىستىق ىقىلاسىنا بولەنىپ، تابىسى تومەن وتباسىلاردىڭ باسپانالى بولۋىنا جەڭىلدىك تۋدىرا باستاپ ەدى، ەندى سول «Amanat Drive» كووپەراتيۆى بىرەۋلەردىڭ كوزىنە سۇيەل بولىپ قادالىپ جاتقانى بەلگىلى بولدى.

جوعارىداعى ءتىنتۋ – سونىڭ ايقىن كورىنىسى دەپ ويلايمىن!

وتىز جىل بويى ات توبەلىندەي توپ مەملەكەتتى عانا ەمەس، قاراپايىم حالىقتى دا توناۋمەن كەلەدى. سونىڭ ىشىندە، بانك ارقىلى توناۋ ابدەن شەگىنە جەتىپ، ءتىپتى اسىپ كەتتى دەسە دە بولادى. سونىڭ كەسىرىنەن، قانشاما وتباسى تاپقان-تايانعانىن قورقاۋ بانكتەردىڭ قۇلقىنىن تولتىرامىن دەپ ءجۇرىپ، ءسىڭىرى شىققان تاقىر كەدەيگە اينالدى. ۋاعىندا تولەي الماي، قۇيعان اقشاسىمەن بىرگە باسپاناسىنان ايىرىلعان جاندار قانشا ما؟!

سوڭى – الماتىداعى قاندى وقيعالارعا اپارىپ سوققان جوق پا؟!!

قاراپ وتىرساق،  سەرگەي تەرەششەنكونى وتپەلى كەزەڭدەگى پرەمەر-مينيستر دەسەك، بۇگىنگى ءاليحان سمايىلوۆقا دەيىن رەسپۋبليكا ۇكىمەتىن قازاقتىڭ كىلەڭ «سەن تۇر، مەن اتايىن!» جىگىتتەرى باسقارىپتى.

سونىڭ بىردە-بىرەۋى باسپانا تۋرالى كوڭىلباي شۇكەنوۆ قۇرعان «Amanat Drive» كووپەراتيۆى سەكىلدى ءبىر باعدارلاما جاساي العان ەمەس!

قازاق بانكتەرىن دە نەگىزىنەن ءدال سونداي قازاق جىگىتتەرى قۇرىپ، جەتەكشىلىك ەتتى.

سونىڭ بىردە-بىرەۋى كوڭىلباي شۇكەنوۆ قۇرعان «Amanat Drive» كووپەراتيۆىندەي باسپانا تۋرالى ءبىر ءتيىمدى جوبا جاساپ، حالىققا ۇسىنا العان جوق!!

اقشاسىنان ات ەمەس، اتان تۇيەنىڭ بەلى قايساتىن الەمدىك دەڭگەيدەگى اۋقاتتى جىگىتتەر مەن قىزدار قانشا ما؟!

كەرىسىنشە، سولاردىڭ ءبىرىنشىسى توناۋعا داڭعىل جول اشىپ بەردى; ەكىنشىسى حالىقتىڭ قان-تەرىمەن تاپقان ناپاقاسىن سۇلىكتەي سورۋمەن; ءۇشىنشىسى تاپقانىن قارا قۇس قۇساپ، باۋىرىنا باسۋمەن، بولماسا شەتەلدەرگە اپارىپ تىققىشتاۋمەن كەلەدى...

مىنە،  كوڭىلباي شۇكەنوۆ دەگەن اۋىلدىڭ ءبىر قارا دومالاق بالاسى شىعىپ، سول كەلەڭسىزدىكتىڭ بەتىن قايتارۋ ءۇشىن،  «Amanat Drive» دەگەن كووپەراتيۆ قۇرىپ، حالىقتى قورقاۋ بانكتەردىڭ جەمى بولۋدان قۇتقارا باستاپ ەدى، ءبىزدىڭ قۇقىق قوعاۋ ورگاندارى ونىڭ زاڭدى مۇددەسىن قورعاۋدىڭ ورنىنا، تاپا-تال تۇستە باسىپ كىرىپ، وزگە كووپەراتيۆتى تىنتۋگە شىعارىلعان شەشىممەن كەلىپ، ءۇيى مەن كەڭسەلەرىنىڭ قورىس-قوپاسىن شىعارىپ كەتىپتى.

ايتىڭىزشى، وسى دا ادىلەتتىلىك پە؟!! زاڭ ۇستەمدىك ەتەتىن مەملەكەتكە ءتان قاسيەت پە بۇل؟!!

كەشە عانا پرەزيدەنتىمىز قاسىم-جومارت توقاەۆ ءوزىنىڭ حالىققا جولداۋىندا: «قۇقىق قورعاۋ ورگاندارىنىڭ كاسىپكەرلەردى قۋدالاۋىن ءبىرجولا توقتاتۋ كەرەك. مۇنداي ارەكەتتەرگە تىيىم سالىنعان...» – دەگەن جوق پا؟!!

قاسىم-جومارت كەمەلۇلى ايتىپ، اۋىز جيعانشا بولعان جوق، مىنە، قولىندا شەكسىز بيلىگى بار كۇشتەر كاسىپكەردى تۇقىرتىپ، جوق قىلىپ جىبەرۋگە شاق قالىپ جاتىر...

ايتپاقشى، قاسىم-جومارت توقاەۆتىڭ قازاقستانعا ءۇش شەتەلدىك بانكتى تارتۋدى ۇسىنۋى دا وسى قورقاۋ بانكتەردىڭ اپتىعىن باسۋ ءۇشىن جاساعان قادام بولسا كەرەك.

مەن بەك سەنىممەن ايتا الامىن، «جاڭا قازاقستاندا» جۇرت ريزا بولاتىن ءبىر جەتىستىك بار ما دەسە، «مىنە!» دەپ ۇيالماي كورسەتۋگە تاتيتىن بىردەن-ءبىر جوبا – «Amanat Drive» كووپەراتيۆى!

كورىپ وتىرمىز، كوڭىلباي شۇكەنوۆ پەن «Amanat Drive» كووپەراتيۆى «جاڭا قازاقستاننىڭ» جاڭا برەندى رەتىندە قابىلدانىپ، جۇرتتىڭ كۇندەلىكتى كوزايىمىنا، جاقىن سەرىگىنە، ارقاسۇيەرىنە اينالىپ بارادى!!

استانا قالاسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ قىزمەتكەرلەرى «Amanat Drive» كووپەراتيۆىنە تەككە باسىپ كىرمەگەنى بەلگىلى.

ماقساتتارى – اتالعان  كووپەراتيۆتىڭ كوزىن قۇرتۋ دەپ ويلايمىن.

سوندا، كوڭىلباي شۇكەنوۆ كىمنىڭ جولىن كەسىپ كەتتى؟!

ەكونوميكالىق تەرگەپ-تەكسەرۋ دەپارتامەنتىنىڭ ارتىندا ابىرويى ايرانداي توگىلگەن قارجىلىق توپتار، اسىرەسە بانكتەر تۇرۋى مۇمكىن.

اتالعان دەپارتامەنتىنىڭ وزگە كووپەراتيۆتى ءتىنتۋ تۋرالى سوت شەشىمىن شىعارتىپ الىپ، «Amanat Drive» كووپەراتيۆىنە شۇيلىگۋى – ءبىزدى وسىنداي ويلارعا جەتەلەيدى.

ەگەر، بۇل اركەتتىڭ ارتىندا قانداي دا ءبىر قارجىلىق توپتار تۇرعان بولسا، ولارعا ايتىرىم، سەندەر كوڭىلباي شۇكەنوۆتىڭ ءدال وسى وسى «Amanat Drive» جوباسىن باسىپ تۇسەتىن باعدارلاما جاساپ، حالىققا ۇسىنىڭدار! ءسويتىپ، نارىق الاڭىندا باسەكەگە ءتۇسىپ، ونى جىگىتشە جەڭىپ شىعىڭدار!

ال، راس بولسا، ارنايى بەينەماتەريال جاساپ، كوڭىلباي شۇكەنوۆتىڭ ساعىن سىندىرعىسى كەلىپ جاتقان شەتەلگە تاۋەلدى تەلەارنانىڭ باسشىلارى مەن جۋرناليستەرىنە ايتارىم، «قۇدايدىڭ ءبىر اتى – حالىق!» دەگەن ءسوز بار. «Amanat Drive» – حالىقتىق جوبا. ونىڭ ارتىندا مىڭداعان ءبىزدىڭ قارا كوز قازاعىمىز تۇر. سول حالىقتىڭ وبالىنا قالىپ، قۇدايدىڭ قاھارىنا ۇشىراپ جۇرمەڭدەر، دوعارىڭدار مۇنداي لاس تىرلىكتى!!

باسقاسىن بىلمەيمىن، مەن وسى «Amanat Drive» جوباسى ءۇشىن كىممەن بولسا دا «اقپاراتتىق سوعىسقا» شىعۋعا دايىنمىن!

كەلىڭدەر، جىگىتشە ايتىسىپ كورەيىك!!!

قۇرمەتتى بەرىك نوعايۇلى!

قۇرمەتتى اسلامبەك امانگەلدىۇلى!

جوعارىدا ايتتىم، «Amanat Drive» – حالىقتىق جوبا. ونىڭ مىڭداعان سالىمشىلارى مەن قولداۋشىلارى بار.

ەگەر، مۇنداي جاعداي تاعى قايتالانسا، سول مۇددەلى قاۋىمنىڭ تىنىشى كەتۋى مۇمكىن...

سول ءۇشىن، سىزدەردەن «Amanat Drive» كووپەراتيۆىنە بايلانىستى جاعدايدى نازارلارىڭىزعا الىپ، جوعارىدا باياندالعان ىڭعايسىز ارەكەتتەرگە قۇقىقتىق باعا بەرۋلەرىڭىزدى; وزگە كووپەراتيۆتى تىنتۋگە شىعارىلعان شەشىممەن كەلىپ، «Amanat Drive» كووپەراتيۆىنىڭ كەڭسەسىنە ءتىنتۋ جۇرگىزگەن استانا قالاسىنىڭ ەكونوميكالىق تەرگەپ-تەكسەرۋ دەپارتامەنتىنىڭ تۇسىنىكسىز اركەتى ءۇشىن، ولارعا شارا قولدانۋىلارىڭىزدى سۇرايمىن.

 

اۋىت مۇقيبەك

Abai.kz

72 پىكىر

ۇزدىك ماتەريالدار

اباي مۇراسى

اباي ىلىمىندەگى ءومىر ماقساتى نە؟

دوسىم وماروۆ 1257
وي تۇرتكى

المەرەك ابىزدىڭ ورالۋى - ەلگە ءدىننىڭ ورالۋى

باقتىباي اينابەكوۆ 1984
كورشىنىڭ كولەڭكەسى

رەسەي تىلدىك ءھام ساياسي ەكسپانسيانى قالاي جۇرگىزدى؟

بەيسەنعازى ۇلىقبەك 2027