جۇما, 23 اقپان 2024
1240 0 پىكىر 20 قىركۇيەك, 2023 ساعات 16:52

«پارلامەنتتىك تەرگەۋ تۋرالى» زاڭ. ۇكىمەت نە دەيدى؟

ماجىلىستەگى «اق جول» پارتياسى جۋىردا «پارلامەنتتىك تەرگەۋ تۋرالى» قازاقستان رەسپۋبليكاسى زاڭىنىڭ جوباسىن ازىرلەپ، ۇكىمەت ساراپتاماسىنا ۇسىنىپتى. زاڭ جوباسى 28 باپتان تۇرادى.

«بارلىق دامىعان جانە وزگە دە مەملەكەتتەردىڭ پارلامەنتتەرىنە تەرگەۋ قۇزىرەتى بەرىلگەن ماسەلەن، پارلامەنتتىك تەرگەۋدى اقش كونگرەسى مەن، ۇلىبريتانيا پارلامەنتى كەڭىنەن قولدانادى. گەرمانيا، يتاليا، يسپانيا، چەحيا، پولشا، ليتۆا، وڭتۇستىك كورەيا، جاپونيا، كورشىلەرىمىز رەسەي مەن وزبەكستان مەملەكەتتەرىندە پارلامەنتتىك تەرگەۋ جانە باقىلاۋ تۋرالى ارنايى زاڭدار مەن رەگلامەنتتەر بار. 2016 جىلى تمد پارلامەنتارالىق اسسامبلەياسى دا «پارلامەنتتىك تەرگەۋ تۋرالى» ۇلگىلىك زاڭىن قابىلداعان بولاتىن»، - دەپ ءۋاج كەلتىرگەن «اق جول» دەپۋتاتتارى «زاڭسىز شىعارىلعان كاپيتالدى قايتارۋ تۋرالى» زاڭ جوباسىن تالقىلاۋ بارىسىندا پارلامەنتتىك تەرگەۋ فۋنكتسياسىنىڭ قاجەتتىلىگىنە كۇمان قالماعانىن ايتادى.

«اق جول» دەمپارتياسى مۇنداي ۇسىنىستاردى «پارلامەنتتىك وپپوزيتسيا تۋرالى» زاڭ جوباسىنا 2013 جانە 2020 جىلدارى ۇسىنعاندا، ۇكىمەت ۇنەمى قارسى بولىپ، توسقاۋىل قويىپ وتىردى. ال، ەلىمىزدىڭ دەموكراتيالىق دامۋىنىڭ ءوزى قازىر ءدال وسى ينستيتۋتتى تالاپ ەتۋدە»، - دەيدى پارتيا.

زاڭ جوباسىنىڭ ماقساتى:

* دەموكراتيالىق ينستيتۋتتاردىڭ حالىقارالىق تاجىريبەسىن ەنگىزۋ، قوعامدىق جانە پارلامەنتتىك باقىلاۋدى كۇشەيتۋ;

* وكىلدى، اتقارۋشى جانە سوت بيلىكتەرى تارماقتارىنداعى تەجەۋ مەن تەپە-تەڭدىك بالانسىن قالىپتاستىرۋ;

* رەزونانستى وقيعالار، سونداي-اق، سولارعا بايلانىستى جانە قوعامنان جاسىرىلاعان بولۋى مۇمكىن فاكتىلەرگە قوعامدىق-ساياسي جاعىنان دا باعا بەرۋ سياقتى قاعيداتتاردى ىسكە اسىرۋ، - دەلىنگەن.

ءبىز اتالعان زاڭ جوباسىنىڭ تولىق ءماتىنىن وقىرماندار تالقىسىنا ۇسىنعاندى ءجون كوردىك. بۇل زاڭ جوباسىنا قاتىستى ءسىز نە دەيسىز؟

پارلامەنتتىك تەرگەۋ تۋرالى
قازاقستان رەسپۋبليكاسىنىڭ زاڭى

اتالعان زاڭ قازاقستان رەسپۋبليكاسىنىڭ پارلامەنت پالاتالارىنىڭ قازاقستان رەسپۋبليكاسىندا پارلامەنتتىك تەرگەۋ جۇرگىزۋىنە بايلانىستى قوعامدىق قاتىناستاردى رەتتەيدى.

1 باپ. اتالمىش زاڭنىڭ رەتتەلۋ قۇرالى 

1. اتالمىش زاڭمەن قازاقستان رەسپۋبليكاسى پارلامەنت پالاتالارىنىڭ پارلامەنتتىك تەرگەۋ جۇرگىزۋىنە نەگىز بولاتىن جايتتار، پارلامەنتتىك تەرگەۋ جۇرگىزۋ پروتسەدۋرالارىنا قاتىستى ونىڭ ۇيىمداستىرۋشىلىق نىسانى مەن نەگىزگى ەرەجەلەرى، سونداي-اق، مەملەكەتتىك ورگاندار مەن لاۋازىمدى تۇلعالارىنىڭ، پارلامەنتتىك تەرگەۋگە قاتىسۋعا تارتىلعان وزگە مەكەمەلەر مەن ازاماتتاردىڭ قۇقىقتارى مەن مىندەتتەرى قاراستىرىلادى.

2. اتالمىش زاڭدا پارلامەنتتىك تەرگەۋ رەتىندە پارلامەنت پالاتالارىنىڭ قوعام، ازاماتتار مەن مەملەكەت ءۇشىن كەرى اسەرى بار فاكتىلەردى تەرگەۋ بويىنشا قىزمەتى ۇعىمى قاراستىرىلادى.

2 باپ. پارلامەنتتىك تەرگەۋدىڭ ماقساتى مەن پرينتسيپتەرى 

1. پارلامەنتتىك تەرگەۋدىڭ ماقساتتارى بولىپ تابىلادى:

1) ادام مەن ازاماتتىڭ قازاقستان رەسپۋبليكاسى كونستيتۋتسياسىمەن كەپىلدەندىرىلگەن قۇقىعى مەن بوستاندىعىن قورعاۋ;

2) قازاقستان رەسپۋبليكاسى پارلامەنتى پالاتالارىنىڭ قازاقستان رەسپۋبليكاسىنىڭ ۇكىمەتىنىڭ، ورتالىق مەملەكەتتىك ورگانداردىڭ، جەرگىلىكتى مەملەكەتتىك باسقارۋ جانە ءوزىن-ءوزى باسقارۋ ورگاندارىنىڭ، كۆازيمەملەكەتتىك سەكتور سۋبەكتىلەرىنىڭ قىزمەتتەرىن باقىلاۋىن قامتاماسىز ەتۋ;

3) پارلامەنتتىك تەرگەۋگە نەگىز بولعان فاكتىلەر مەن جاعدايلاردىڭ پايدا بولۋ شارتتارى مەن سەبەپتەرىن انىقتاۋ، ول جونىندە قوعامدى حاباردار ەتۋ، سونداي-اق، وسىنداي سەبەپتەر مەن شارتتاردى جويۋعا كومەك كورسەتۋ.

2. پارلامەنتتىك تەرگەۋ مىنا پرينتسيپتەر نەگىزىندە جۇرگىزىلەدى:

1) زاڭدىلىق;

2) ادام مەن ازاماتتىڭ قۇقىعى مەن بوستاندىعىن قۇرمەتتەۋ جانە ساقتاۋ;

3) تۇلعانىڭ ار-وجدانى مەن ابىرويىن قۇرمەتتەۋ;

4) ازاماتتاردىڭ زاڭ مەن سوت الدىنداعى تەڭدىگى;

5) القالىلىق، پاراساتتىلىق، اشىقتىق جانە جاريالىلىق

6) پارلامەنت پالاتالارىنىڭ پارلامەنتتىك تەرگەۋ جۇرگىزەتىن دەپۋتاتتارىنىڭ تاۋەلسىزدىگى جانە ولاردىڭ قىزمەتىنە مەملەكەتتىك ورگانداردىڭ لاۋازىمدى تۇلعالارى مەن قىلمىستىق جاۋاپتىلىق قاۋپى تونگەن وزگە دە ادامداردىڭ ارالاسۋىنا جول بەرمەۋ;

7) اشىقتىق.

3. پارلامەنتتىك تەرگەۋ انىقتاۋدى، الدىن الا تەرگەۋدى جانە سوت ءوندىرىسىن الماستىرمايدى.

3 باپ. پارلامەنتتىك تەرگەۋدىڭ قۇقىقتىق نەگىزدەرى

پارلامەنتتىك تەرگەۋ قازاقستان رەسپۋبليكاسىنىڭ كونستيتۋتسياسىنىڭ، اتالمىش زاڭنىڭ، سونداي-اق قازاقستان رەسپۋبليكاسىنىڭ وزگە دە نورماتيۆتىك قۇقىقتىق اكتىلەرىنىڭ نەگىزىندە جۇزەگە اسىرىلادى.

4 باپ. پارلامەنتتىك تەرگەۋدىڭ مازمۇنى

1. پارلامەنتتىك تەرگەۋگە جاتادى:

1) ادام مەن ازاماتتىڭ قازاقستان رەسپۋبليكاسىنىڭ كونستيتۋتسياسىمەن كەپىلدىك بەرىلگەن قۇقىقتارى مەن بوستاندىقتارىن ورەسكەل نەمەسە جاپپاي بۇزۋ فاكتىلەرى;

2) مەملەكەتتiك ورگانداردىڭ، جەرگiلiكتi مەملەكەتتiك باسقارۋ جانە ءوزiن-ءوزi باسقارۋ ورگاندارىنىڭ، كۆازيمەملەكەتتiك سەكتور سۋبەكتiلەرiنiڭ قۇزىرەتسىز شەشiمدەرi ناتيجەسiندە قوعامدىق مۇددەلەرگە ەلەۋلi زالال كەلتiرۋ فاكتiلەرi, قوعامدىق جانە جەكە مۇددەلەر قاقتىعىسى;

3) تەحنوگەندىك سيپاتتاعى توتەنشە جاعدايلاردىڭ تۋىنداۋىمەن بايلانىستى، سونداي-اق، تابيعي جانە تەحنوگەندىك سيپاتتاعى توتەنشە جاعدايلاردىڭ جاعىمسىز سالدارلارىمەن بايلانىستى ءمان-جايلار;

4) مەملەكەتتىك بيۋدجەتتى ورىنداۋ بارىسىنداعى قاتاڭ قارجىلىق زاڭبۇزۋشىلىقتار;

5) بيلىك ورگاندارىنداعى جەمقورلىق;

6) قوعامدىق ءتارتىپتى توپ بولىپ بۇزۋ، جاپپاي تارتىپسىزدىكتەر، زورلىق-زومبىلىق قولدانۋمەن نەمەسە ونى قولدانۋدىڭ تىكەلەي قاۋپىن تۋدىراتىن ۇلتارالىق قاقتىعىستار، ەكى نەمەسە ودان دا كوپ ادامنىڭ ولىمىنە اكەپ سوققان قىلمىستار جانە باسقا دا زاڭسىز ارەكەتتەر.

2. پارلامەنتتىك تەرگەۋگە جاتپايدى:

1) قازاقستان رەسپۋبليكاسى پرەزيدەنتىنىڭ، سونداي-اق وعان تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ قىزمەتى;

2) سوتتىڭ سوت تورەلىگىن جۇزەگە اسىرۋداعى قىزمەتى;

3) پروكۋراتۋرا مەن ارنايى ورگانداردىڭ قىزمەتى.

3. ەگەر اتالمىش زاڭعا سايكەس تەرگەلىپ جاتقان فاكتىلەر مەن ءمان-جايلاردى سوت ءىس رەتىندە قاراۋعا العان جاعدايدا، پارلامەنتتىك تەرگەۋ سوت شەشىمى شىققانعا دەيىن توقتاتىلادى.

4. سوتتىڭ زاڭدى كۇشىنە ەنگەن شەشىمىمەن (ۇكىمىمەن) انىقتالعان فاكتىلەر مەن ءمان-جايلارعا كۇمان كەلتىرۋگە بولمايدى.

5 باپ. پارلامەنتتىك تەرگەۋ مەرزىمى 

1. پارلامەنتتىك تەرگەۋ مەرزىمى كوميسسيا قۇرىلعان كۇننەن باستاپ ءبىر جىلدان اسپاۋى كەرەك.

2. پارلامەنتتىك تەرگەۋ ءتيىستى شاقىرىلىمداعى پارلامەنت ءماجىلىسىنىڭ وكىلەتتىك مەرزىمى اياقتالعانعا دەيىن ءبىتۋى ءتيىس.

6 باپ. پارلامەنتتىك تەرگەۋدىڭ قوزعالۋ نەگىزدەرى

1. اتالمىش زاڭدا كورسەتىلگەن فاكتىلەر مەن ءمان-جايلارعا بايلانىستى قازاقستان رەسپۋبليكاسى پارلامەنتى پالاتالارىنىڭ دەپۋتاتتارىنا بەلگىلى بولعان وقيعالار پارلامەنتتىك تەرگەۋدى قوزعاۋعا نەگىز بولىپ تابىلادى.

2. قازاقستان رەسپۋبليكاسى كونستيتۋتسيالىق سوتىنىڭ قاۋلىلارى، سونداي-اق قازاقستان رەسپۋبليكاسى ادام قۇقىقتارى جونىندەگى ۋاكiلiنiڭ جانە قازاقستان رەسپۋبليكاسى جوعارى ەسەپ پالاتاسىنىڭ ۇسىنىمدارى مەن ۇسىنىستارى پارلامەنتتiك تەرگەۋدi قوزعاۋ ءۇشiن نەگiز بولا الادى.

7 باپ. پارلامەنتتىك تەرگەۋدى قوزعاۋ باستاماسى 

1. اتالمىش زاڭدا كورسەتىلگەن فاكتىلەر مەن ءمان-جايلار انىقتالعان جاعدايدا، كەمىندە بەس دەپۋتاتتان تۇراتىن پارلامەنت ءماجىلىسىنىڭ نەمەسە پارلامەنت سەناتىنىڭ دەپۋتاتتارىنىڭ توبى پارلامەنت ءماجىلىسىنىڭ توراعاسىنا نەمەسە پارلامەنت سەناتىنىڭ توراعاسىنا پارلامەنتتىك تەرگەپ-تەكسەرۋدى باستاۋ تۋرالى جازباشا ءوتىنىش جولدايدى، وندا فاكتىلەر مەن ءمان-جايلار كورسەتىلىپ،  وسى زاڭعا سايكەس تەرگەۋ جۇرگىزۋدىڭ قاجەتتىلىگى نەگىزدەلۋى ءتيىس.

2. پارلامەنتتىك تەرگەۋ كەلەسى مەكەمەلەردىڭ باستاماسىمەن جۇرگىزىلۋى مۇمكىن:

1) پارلامەنت پالاتالارىنىڭ (قوس پالاتانىڭ) كوميتەتتەرى مەن كوميسسيالارى;

2) قازاقستان رەسپۋبليكاسى پارلامەنتى ماجىلىسىندە وكىلدىك ەتەتىن ساياسي پارتيالاردىڭ فراكتسيالارى.

مۇنداي جاعدايلاردا پارلامەنت ءماجىلىسىنىڭ توراعاسىنا نەمەسە پارلامەنت سەناتىنىڭ توراعاسىنا تيىسىنشە پارلامەنت پالاتالارىنىڭ كوميتەتتەرى مەن كوميسسيالارىنان (قوس پالاتادان) نەمەسە ساياسي پارتيالار فراكتسيالارىنان پارلامەنتتىك تەرگەۋدى باستاۋ تۋرالى جازباشا ءوتىنىش جىبەرىلەدى.

3. پارلامەنت ءماجىلىسىنىڭ توراعاسى نەمەسە پارلامەنت سەناتىنىڭ توراعاسى دەپۋتاتتاردان وسىنداي جازباشا ءوتىنىشتى العاننان كەيىن پارلامەنتتىك تەرگەۋ جۇرگىزۋ تۋرالى ماسەلەنى قازاقستان رەسپۋبليكاسى پارلامەنتىنىڭ ءتيىستى پالاتاسىنىڭ وتىرىسىندا تالقىلاۋعا شىعارادى.

8 باپ. پارلامەنتتىك تەرگەۋدى قوزعاۋ تۋرالى شەشىم قابىلداۋ ءتارتىبى 

1. پارلامەنتتىك تەرگەۋ باستاماسىن قولداۋ تۋرالى ماسەلە جازباشا ءوتىنىش كەلىپ تۇسكەن كۇننەن باستاپ 15 كۇننەن كەشىكتىرمەي پارلامەنتتىڭ ءتيىستى پالاتاسىنىڭ وتىرىسىندا قارالادى.

2. پارلامەنتتىك تەرگەۋدى باستاۋ تۋرالى ماسەلەنى قاراۋ ناتيجەلەرى بويىنشا پارلامەنت پالاتاسى پارلامەنتتىك تەرگەۋدى باستاۋ نەمەسە مۇنداي تەرگەۋدى جۇرگىزۋدەن باس تارتۋ تۋرالى شەشىم قابىلدايدى.

پارلامەنتتىك تەرگەۋ باستاماسىن قولداۋ جانە كوميسسيانىڭ قۇرامى تۋرالى شەشىمدەر ەگەر وعان ءتيىستى پارلامەنت پالاتاسى دەپۋتاتتارىنىڭ جالپى سانىنىڭ جارتىسىنان استامى داۋىس بەرسە، ءتيىستى پارلامەنت پالاتاسىنىڭ قاۋلىلارىمەن راسىمدەلىپ، قابىلداندى دەپ ەسەپتەلەدى.

پارلامەنتتىك تەرگەۋ جۇرگىزۋ جونىندەگى كوميسسيانىڭ قۇرىلعان كۇنى پارلامەنتتىك تەرگەۋدى باستاۋ تۋرالى قاۋلى زاڭدى كۇشىنە ەنگەن كۇن بولىپ ەسەپتەلەدى.

9 باپ.  پارلامەنتتىك كوميسسيانى قۇرۋ ءتارتىبى

1. پارلامەنتتىك تەرگەۋدى قوزعاۋ باستاماسى جانە پارلامەنتتىك تەرگەۋدى قوزعاۋ تۋرالى شەشىم قولداۋ تاپقان جاعدايدا پارلامەنتتىڭ ءتيىستى پالاتاسى پارلامەنتتىڭ ءتيىستى پالاتاسىنىڭ دەپۋتاتتارىنان تۇراتىن كوميسسيا قۇرادى جانە ونىڭ توراعالارىن سايلايدى.

2. پارلامەنت ماجىلىسىندە كوميسسيا قۇرۋ قازاقستان رەسپۋبليكاسى پارلامەنتى ماجىلىسىندە وكىلدىك ەتەتىن ساياسي پارتيالاردىڭ بارلىق فراكتسيالارىنىڭ دەپۋتاتتارى، سونداي-اق ءبىر مانداتتى اۋماقتىق وكرۋگتەر بويىنشا سايلانعان جانە ساياسي پارتيالار فراكتسيالارىنىڭ مۇشەلەرى بولىپ تابىلمايتىن ءماجىلىس دەپۋتاتتارى اراسىنان جۇزەگە اسىرىلادى.

پارلامەنت ماجىلىسىنەن كوميسسيا قۇرامىنا ساياسي پارتيالاردىڭ بارلىق فراكتسيالارىنىڭ وكىلدەرىنىڭ تەڭ سانى كىرۋى كەرەك.

ساياسي پارتيا فراكتسياسىنىڭ كوميسسيا قۇرامىنا ءوز وكىلدەرىن جىبەرۋدەن باس تارتۋى، سونداي-اق ساياسي پارتيالار فراكتسيالارىنىڭ مۇشەلەرى ەمەس، ءبىر مانداتتى اۋماقتىق سايلاۋ وكرۋگتەرى بويىنشا سايلانعان پارلامەنت ءماجىلىسىنىڭ جەكەلەگەن دەپۋتاتتارىنىڭ كوميسسيا قۇرامىنا كىرۋدەن باس تارتۋى كوميسسيانى قۇرۋعا كەدەرگى بولىپ تابىلمايدى.

4. قازاقستان رەسپۋبليكاسى پارلامەنتىنىڭ قوس پالاتاسى پارلامەنتتىك تەرگەۋ جۇرگىزۋ تۋرالى شەشىم قابىلداعان جاعدايدا، كورسەتىلگەن تالاپتارعا سايكەس مۇنداي شەشىمدەر پارلامەنتتىڭ ءاربىر پالاتاسىندا قابىلدانادى.

وسى ورايدا پارلامەنتتىڭ قوس پالاتاسىمەن پارلامەنتتىك تەرگەۋ جۇرگىزۋ ءۇشىن ورتاق كوميسسيا قۇرىلادى.

پارلامەنتتىڭ ءاربىر پالاتاسى پارلامەنتتىك تەرگەۋ جۇرگىزۋ جونىندەگى جالپى كوميسسيا قۇرامىنىڭ جارتىسىن قۇرادى جانە وسىنداي كوميسسيانىڭ ەكى تەڭ توراعاسىنىڭ ءبىرىن تاعايىندايدى.

5. كوميسسيا پارلامەنتتىك تەرگەۋ مەرزىمىنە قۇرىلادى جانە ول اياقتالعاننان كەيىن تاراتىلادى.

6. پارلامەنتتiڭ تيiستi پالاتاسىنىڭ وكiلەتتiگiنiڭ سوڭعى ءۇش ايى iشiندە، سونداي-اق قازاقستان رەسپۋبليكاسىنىڭ پارلامەنت سەناتى دەپۋتاتتارىن سايلاۋ بويىنشا سايلاۋ ناۋقانى كەزiندە پارلامەنتتىك تەرگەۋ باستاماسىن كوتەرۋگە جانە كوميسسيا قۇرۋعا بولمايدى.

10 باپ. كوميسسيا مۇشەلەرىنە قويىلاتىن تالاپتار

قازاقستان رەسپۋبليكاسى پارلامەنتى ءماجىلىسىنىڭ نەمەسە پارلامەنت سەناتىنىڭ كەلەسى دەپۋتاتتارى كوميسسيا مۇشەسى بولا المايدى:

1) كوميسسيا تەرگەپ جاتقان وقيعاعا قاتىسۋشى بولىپ تابىلسا، سونداي-اق ەگەر دەپۋتات تەرگەۋ ناتيجەلەرىنە تىكەلەي مۇددەلى بولسا;

2) دەربەس قۇقىقتىلىقتان ايىرىلسا نەمەسە قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن ونى دەپۋتاتتىق دەربەس قۇقىقتىقتان ايىرۋ تۋرالى ماسەلە قارالىپ جاتسا;

3) كوميسسيا تەرگەپ جاتقان وقيعاعا قاتىسۋشى بولىپ تابىلاتىن ادامنىڭ وتباسى مۇشەسى بولسا نەمەسە ونىمەن تۋىستىق قارىم-قاتىناستا بولسا;

4) پارلامەنتتىك تەرگەۋدىڭ ادىلدىگى مەن وبەكتيۆتىلىگىنە نۇقسان كەلتىرۋگە ايقىن نەگىز بولعان جاعدايدا.

11 باپ. كوميسسيا مۇشەسىنىڭ وكىلەتتىگىن توقتاتۋ جانە بوس لاۋازىمداردى الماستىرۋ

1. كوميسسيا مۇشەسىنىڭ وكىلەتتىگى قازاقستان رەسپۋبليكاسىنىڭ زاڭناماسىنا سايكەس ونىڭ ءماجىلىس دەپۋتاتى نەمەسە پارلامەنت سەناتىنىڭ دەپۋتاتى رەتىندەگى وكىلەتتىگى توقتاتىلعان جاعدايدا توقتاتىلادى.

2. كوميسسيا مۇشەسى ءوز ءوتىنىشى بويىنشا ونىڭ قۇرامىنان شىعا الادى.

3. كوميسسيا مۇشەسiنiڭ وكiلەتتiگi قازاقستان رەسپۋبليكاسى پارلامەنتiنiڭ تيiستi پالاتاسىنىڭ شەشiمi بويىنشا، ونىڭ iشiندە كوميسسيا مۇشەسi وسى زاڭنىڭ 10-بابىندا بەلگiلەنگەن تالاپتارعا ساي بولماعان جاعدايدا دا مەرزiمiنەن بۇرىن توقتاتىلۋى مۇمكiن.

4. كوميسسيا مۇشەسىنىڭ وكىلەتتىگىن توقتاتۋ تۋرالى شەشىم قازاقستان رەسپۋبليكاسى پارلامەنتى ءتيىستى پالاتاسىنىڭ قاۋلىسىمەن راسىمدەلەدى.

5. كوميسسيانىڭ قۇرامىنان شىققان مۇشەسىنىڭ بوس ورنىن قازاقستان رەسپۋبليكاسى پارلامەنتى ءتيىستى پالاتاسىنىڭ رەگلامەنتىندە بەلگىلەنگەن تارتىپپەن ءتيىستى پارلامەنت پالاتاسىنىڭ باسقا وكىلى الماستىرادى.

12 باپ. كوميسسيا توراعاسى 

كوميسسيا توراعاسى:

1) كوميسسيانىڭ جۇمىسىن ۇيىمداستىرادى جانە ونىڭ وتىرىستارىن جۇرگىزەدى;

2) قازاقستان رەسپۋبليكاسى پارلامەنتiنiڭ تيiستi پالاتاسىنىڭ وتىرىستارىندا كوميسسيانىڭ قىزمەتi جونىندە ەسەپ بەرەدى;

3) كوميسسيا مۇشەلەرى اراسىندا مىندەتتەردى بولەدى;

4) قازاقستان رەسپۋبليكاسىنىڭ زاڭناماسىمەن قىزمەتتىك اقپاراتقا، سونداي-اق مەملەكەتتىك قۇپيالار تۋرالى زاڭناماعا سايكەس شەكتەۋلى مالىمەتتەرگە جاتقىزىلعان پارلامەنتتىك تەرگەۋ كەزىندە پايدالانىلاتىن مالىمەتتەردى قورعاۋدى قامتاماسىز ەتەدى;

5) كوميسسيا وتىرىستارىنىڭ حاتتامالارىنا قول قويادى;

6) اتالمىش زاڭعا جانە پارلامەنتتىك تەرگەۋ جۇرگىزۋگە نەگىز بولعان فاكتىلەر مەن ءمان-جايلاردى تەرگەۋ بويىنشا پارلامەنتتىك كوميسسيا رەگلامەنتىنە سايكەس وزگە دە ماسەلەلەردى شەشەدى.

13 باپ. كوميسسيانىڭ حاتشىسى

1. كوميسسيانىڭ حاتشىسى كوميسسيانىڭ ءبىرىنشى وتىرىسىندا ونىڭ مۇشەلەرى اراسىنان سايلانادى.

2. كوميسسيانىڭ حاتشىسى:

1) ۇيىمداستىرۋ جاعىنان كوميسسيانىڭ قىزمەتىن قامتاماسىز ەتۋگە جاۋاپتى;

2) كوميسسيا اپپاراتىنىڭ قىزمەتىنە جەتەكشىلىك ەتەدى;

3) كوميسسيا وتىرىستارىنىڭ ستەنوگراممالارىن جانە تۇسىنىكتەمە بەرۋ ءۇشىن كوميسسيا وتىرىستارىنا شاقىرىلعان تۇلعالارمەن ساۋالناما حاتتامالارىن جۇرگىزۋدى قامتاماسىز ەتەدى;

4) كوميسسيانىڭ ءىس قاعازدارىن جۇرگىزۋدى ۇيىمداستىرادى.

14 باپ.  كوميسسيانىڭ قىزمەتىن قامتاماسىز ەتۋ

1. كوميسسيانىڭ قىزمەتىن قامتاماسىز ەتۋ ءۇشىن ونىڭ قازاقستان رەسپۋبليكاسى پارلامەنتى پالاتالارىنىڭ ءتيىستى اپپاراتىنىڭ شتاتتىق قىزمەتكەرلەرىنەن تۇراتىن حاتشىلىعى قۇرىلادى.

2. پارلامەنتتىك تەرگەۋ جۇرگىزۋ كەزىندە كوميسسيا كەلەسىگە قۇقىلى:

1) ونىڭ جۇمىسىنا مەملەكەتتىك ورگانداردىڭ وكىلدەرىن، مامانداردى، ساراپشىلاردى جانە عالىمداردى تارتۋعا;

2) مەملەكەتتىك ورگانداردان، باسقا دا مەكەمەلەردەن، سونداي-اق ازاماتتاردان قاجەتتى اقپاراتتى سۇراتۋعا;

3) قۇقىق قورعاۋ جانە مەملەكەتتىك ورگانداردىڭ، وزگە دە مەكەمەلەردىڭ لاۋازىمدى تۇلعالارىن، سونداي-اق ازاماتتاردى تۇسىنىكتەمە بەرۋگە شاقىرۋعا.

كوميسسيانىڭ پارلامەنت پالاتالارىنىڭ رەگلامەنتىنە سايكەس وزگە دە قۇقىقتارى بولۋى مۇمكىن.

3. قۇقىق قورعاۋ جانە مەملەكەتتىك ورگانداردىڭ لاۋازىمدى تۇلعالارى پارلامەنتتىك تەرگەۋ جۇرگىزگەن كەزدە كوميسسياعا تولىق جانە سەنىمدى اقپاراتتى (قۇجاتتار، ماتەريالدار) بەرۋگە مىندەتتى.

15 باپ. پارلامەنتتىك تەرگەۋ جۇرگىزۋگە نەگىز بولعان فاكتىلەر مەن ءمان-جايلاردى تەكسەرۋ جونىندەگى پارلامەنتتىك كوميسسيانىڭ رەگلامەنتى

1. پارلامەنتتىك تەرگەۋ تارتىبىنە قاتىستى نەگىزگى ەرەجەلەر وسى زاڭمەن جانە پارلامەنت پالاتالارىنىڭ رەگلامەنتتەرىمەن بەلگىلەنەدى. كوميسسيا پارلامەنتتىك تەرگەۋ جۇرگiزۋگە نەگiز بولعان فاكتiلەر مەن ءمان-جايلاردى تەكسەرۋ جونiندەگi پارلامەنتتىك كوميسسيانىڭ رەگلامەنتiن قابىلداۋعا، وسى زاڭعا، قازاقستان رەسپۋبليكاسىنىڭ وزگە دە زاڭدارىنا، سونداي-اق پارلامەنت پالاتالارىنىڭ رەگلامەنتتەرىنە قايشى كەلمەۋگە تيiس پارلامەنتتىك تەرگەۋ جۇرگiزۋ قاعيدالارىن بەلگiلەۋگە قۇقىلى.

2. كوميسسيا رەگلامەنتىنە جاتقىزىلادى:

1) كوميسسيا وتىرىستارىن وتكىزۋ ءتارتىبى;

2) كوميسسيانىڭ ءىس جۇرگىزۋ ءتارتىبى جانە ونىڭ قۇجاتتارىن راسىمدەۋ;

3) كوميسسيانىڭ قورىتىندى بايانداماسىن ازىرلەۋ ءتارتىبى;

4) جەكە جۇمىس توپتارىنىڭ قۇرىلۋ ءتارتىبى مەن قىزمەتى;

5) كوميسسيا مۇشەلەرىنىڭ ءوز مىندەتتەرىن ورىنداۋ ءتارتىبى;

6) كوميسسيانىڭ قىزمەتىن ۇيىمداستىرۋدىڭ وزگە دە ماسەلەلەرى.

16 باپ. كوميسسيا جۇمىسىنىڭ ءتارتىبى

1. كوميسسيا وتىرىسى كوميسسيا مۇشەلەرىنىڭ جالپى سانىنىڭ ۇشتەن ەكىسى قاتىسسا، زاڭدى دەپ ەسەپتەلەدى.

2. ازاماتتاردىڭ جانە بۇقارالىق اقپارات قۇرالدارى وكىلدەرىنىڭ اشىق وتىرىستارعا قاتىسۋ ءتارتىبىن كوميسسيا دەربەس ايقىندايدى.

3. اشىق وتىرىستى وتكىزۋ مەملەكەتتىك نەمەسە زاڭمەن قورعالاتىن وزگە دە قۇپيانى اشۋ تاۋەكەلىن تۋدىرسا، كوميسسيا جابىق وتىرىس وتكىزۋ تۋرالى شەشىم قابىلدايدى. جابىق وتىرىستار وتىرىسقا قاتىسقان كوميسسيا مۇشەلەرىنىڭ جارتىسىنان كوبى وسى شەشىمدى جاقتاپ داۋىس بەرگەن جاعدايلاردا دا وتكىزىلۋى مۇمكىن.

4. قازاقستان رەسپۋبليكاسىنداعى ادام قۇقىقتارى جونىندەگى ۋاكىل كوميسسيانىڭ جۇمىسىنا تىكەلەي نەمەسە ءوزىنىڭ وكىلى ارقىلى قاتىسۋعا قۇقىلى.

5. كوميسسيانىڭ ءبىرىنشى وتىرىسى كوميسسيا قۇرىلعان كۇننەن باستاپ 15 كۇننەن كەشىكتىرىلمەي وتكىزىلەدى.

17 باپ. جۇمىس توپتارى

جەكە فاكتىلەر مەن ءمان-جايلاردى زەردەلەۋ، سونداي-اق قاجەت بولعان جاعدايدا كوميسسيا تەرگەپ جاتقان وقيعا ورنىنا بارۋ قاجەتتىلىگى جاعدايىندا قۇرامىنا كوميسسيا مۇشەلەرى مەن كوميسسيا حاتشىلىعىنىڭ قىزمەتكەرلەرى كىرەتىن جۇمىس توپتارى قۇرىلۋى مۇمكىن.

18 باپ. كوميسسيانىڭ جۇمىس جوسپارى

1. كوميسسيا جۇمىس جوسپارىن ازىرلەپ، بەكىتەدى، وندا قامتىلاتىن جايتتار:

1) پارلامەنتتىك تەرگەۋدىڭ نەگىزگى باعىتتارى;

2) پارلامەنتتىك تەرگەۋ جۇرگىزۋ كەزىندە قارالاتىن ماسەلەلەر;

3) پارلامەنتتىك تەرگەۋدىڭ نەگىزگى كەزەڭدەرىن اياقتاۋ مەرزىمدەرى (اقپارات جيناۋ، اقپاراتتى باعالاۋ جانە جۇيەلەۋ، كوميسسيانىڭ قورىتىندى ەسەبىن دايىنداۋ);

4) كوميسسيا وتىرىستارىنا تەرگەلىپ جاتقان فاكتىلەر مەن ءمان-جايلار بويىنشا تۇسىنىكتەمە بەرۋ ءۇشىن شاقىرىلعان تۇلعالار اياسى;

5) كوميسسيا مۇشەلەرىنە ارنالعان تاپسىرمالار تىزبەسى جانە ولاردى ورىنداۋ مەرزىمدەرى.

2. كوميسسيانىڭ جۇمىس جوسپارىنا ونىڭ قىزمەتىنە قاتىستى باسقا دا ماسەلەلەر ەنگىزىلۋى مۇمكىن.

19 باپ. پارلامەنتتىك تەرگەۋدىڭ جۇرگىزىلۋىنە نەگىز بولاتىن ماتەريالدار

1. پارلامەنتتىك تەرگەۋدىڭ نىسانىنا قاتىستى شەشىمدەر شىعارىلىپ، فاكتىلەردىڭ انىقتالۋىنا نەگىز بولا الاتىن ماتەريالدار بولىپ تابىلادى:

1) مەملەكەتتىك ورگانداردىڭ جانە جەرگىلىكتى مەملەكەتتىك باسقارۋ جانە ءوزىن-ءوزى باسقارۋ ورگاندارىنىڭ، كۆازيمەملەكەتتىك سەكتور سۋبەكتىلەرىنىڭ رەسمي قۇجاتتارى، ونىڭ ىشىندە حاتتار مەن قىزمەتتىك قۇجاتتار;

2) مەملەكەتتىك ورگانداردىڭ، سونداي-اق مەملەكەتتىك ەمەس كوممەرتسيالىق جانە كوممەرتسيالىق ەمەس ۇيىمداردىڭ، ازاماتتاردىڭ قۇجاتتارى مەن ماتەريالدارى;

3) پارلامەنتتىك تەرگەۋ اياسىندا انىقتالۋعا جاتاتىن ءمان-جايلاردان حاباردار بولۋى مۇمكىن كۋالاردىڭ، سونىڭ ىشىندە لاۋازىمدى تۇلعالاردىڭ ايعاقتارى;

4) بۇقارالىق اقپارات قۇرالدارىنداعى جانە ينتەرنەتتەگى اقپاراتتار;

5) ساراپشىلاردىڭ قورىتىندىلارى.

6) پارلامەنتتىك تەرگەۋ جۇرگىزۋگە قاجەتتى وزگە دە ماتەريالدار.

20 باپ. ساراپتاما وتكىزۋ

1. پارلامەنتتىك تەرگەۋ جۇرگىزۋ جونىندەگى كوميسسيا عىلىم، تەحنولوگيا نەمەسە قولونەر سالاسىنداعى ارنايى زەرتتەلۋدى تالاپ ەتەتىن جايتتار بويىنشا ساراپتاما تاعايىنداۋ تۋرالى شەشىم قابىلداي الادى.

2. پارلامەنتتىك تەرگەۋ جۇرگىزۋ جونىندەگى كوميسسيانىڭ ساراپتاما وتكىزۋ تۋرالى شەشىمى ءتيىستى سالاداعى قاجەتتى ساراپشىلار شتاتى بار ساراپشىلىق مەكەمەگە جۇكتەلەدى. ساراپشىلىق مەكەمەسى بەكىتكەن ساراپشى ءوز ءبىلىمى مەن تاجىريبەسىنە ساي ساراپشىلىق قورىتىندىسىن بەرۋگە مىندەتتى. ساراپشى الدىن الا جالعان اقپارات بەرگەنى ءۇشىن زاڭمەن بەلگىلەنگەن جاۋاپكەرشىلىك جونىندە حاباردار ەتىلەدى.

3. ساراپشى قورىتىندىسى پارلامەنتتىك تەرگەۋ جۇرگىزۋ جونىندەگى كوميسسياعا حات تۇرىندە جولدانادى. ساراپشى قورىتىندىسىن جاساعان ساراپشى پارلامەنتتىك تەرگەۋ جۇرگىزۋ جونىندەگى كوميسسيانىڭ وتىرىسىنا شاقىرىلۋى مۇمكىن. بۇل جاعدايدا ساراپشى وتىرىسقا قاتىسىپ، ءوزى شىعارعان ساراپشىلىق قورىتىندى تۋرالى انىقتاما بەرۋى ءتيىس.

21 باپ. كوميسسيانىڭ شەشىم قابىلداۋ ءتارتىبى

1. كوميسسيا شەشىمدەرى ونىڭ وتىرىستارىندا اشىق داۋىس بەرۋ ارقىلى قابىلدانادى.

2. كوميسسيانىڭ شەشىمى، ەگەر وعان وتىرىسقا قاتىسقان كوميسسيا مۇشەلەرىنىڭ جارتىسىنان كوبى داۋىس بەرسە، قابىلداندى دەپ ەسەپتەلەدى.

3. كوميسسيانىڭ قورىتىندى ەسەبى بويىنشا شەشىم، ەگەر وعان كوميسسيا مۇشەلەرىنىڭ جالپى سانىنىڭ جارتىسىنان استامى داۋىس بەرسە، قابىلداندى دەپ ەسەپتەلەدى.

22 باپ. كوميسسيانىڭ قۇقىعى

1. كوميسسيا ءوز قىزمەتىن جۇزەگە اسىرۋ كەزىندە كەلەسىگە قۇقىلى:

1) قازاقستان رەسپۋبليكاسىنىڭ ۇكىمەتىنەن، وزگە دە مەملەكەتتىك ورگانداردان، جەرگىلىكتى مەملەكەتتىك باسقارۋ جانە ءوزىن-ءوزى باسقارۋ ورگاندارىنان، مەملەكەتتىك مەكەمەلەردەن، كۆازيمەملەكەتتىك سەكتور سۋبەكتىلەرىنەن جانە وزگە دە ۇيىمداردان بەلگىلەنگەن تارتىپپەن پارلامەنتتىك تەرگەۋ نىسانىنا جاتاتىن قاجەتتى قۇجاتتاردىڭ كوشىرمەلەرىن، سونىمەن قاتار، پارلامەنتتىك تەرگەۋ جۇرگىزۋگە قاجەتتى اقپاراتتاردى سۇراتۋعا جانە الۋعا قۇقىلى;

2) كوميسسيا تەرگەپ جاتقان فاكتىلەر مەن ءمان-جايلار بويىنشا تۇسىنىكتەمە بەرۋ ءۇشىن لاۋازىمدى تۇلعالاردى شاقىرۋعا;

3) كوميسسيا تەرگەپ جاتقان فاكتىلەر مەن ءمان-جايلار بويىنشا تۇسىنىكتەمە بەرۋگە پارلامەنتتىك تەرگەۋگە ىقپال ەتە الاتىن ارنايى ءبىلىمى نەمەسە اقپاراتى بار ازاماتتاردى شاقىرۋعا;

4) وسى باپتىڭ 3-تارماعىندا كوزدەلگەن جاعدايلاردى قوسپاعاندا، شاقىرىلعان ادامدارعا سۇراق قويۋعا جانە ولاردىڭ تۇسىنىكتەمەلەرىن ءتيىستى حاتتامامەن راسىمدەۋگە.

2. كوميسسيا لاۋازىمدى تۇلعالار مەن ازاماتتاردى كوميسسيا قويعان سۇراقتارعا جازباشا تۇردە تۇسiنiكتەمەلەر مەن جاۋاپتار بەرۋدى، سونداي-اق پارلامەنتتىك تەرگەۋگە ىقپال ەتە الاتىن  اقپاراتتى كوميسسياعا جولداۋدى ۇسىنۋعا قۇقىلى.

3. قىلمىستىق ءىس بويىنشا كۇدىكتى نەمەسە ايىپتالۋشى بولىپ تابىلاتىن تۇلعادان كوميسسيا نەمەسە جۇمىس توبى قىلمىستىق ءىستى قوزعاۋ تۋرالى قاۋلىدا، ونى ايىپتالۋشى رەتىندە تارتۋ جونىندەگى ايىپتاۋ قاۋلىسىندا نەمەسە ايىپتاۋ اكتىندە تۇجىرىمدالعان قىلمىس قۇرامى بويىنشا جاۋاپ الا المايدى.

23 باپ.  كوميسسيا مۇشەلەرىنىڭ قۇقىقتارى مەن مىندەتتەرى

1. كوميسسيا مۇشەلەرى مىندەتتى:

1) كوميسسيانىڭ رەگلامەنتىنە سايكەس كوميسسيا وتىرىستارىنا جانە كوميسسيا قۇرعان جۇمىس توپتارىنىڭ قىزمەتىنە جەكە قاتىسۋعا;

2) كوميسسيا تاپسىرمالارىن ورىنداۋعا;

3) پارلامەنتتىك تەرگەۋدىڭ بارىسى تۋرالى اقپاراتتى جاريا ەتۋ بويىنشا كوميسسيا بەلگىلەگەن شەكتەۋلەردى ساقتاۋعا مىندەتتى.

2. كوميسسيا مۇشەلەرى قۇقىلى:

1) كوميسسيا قاراۋىنداعى ماسەلەلەردى تالقىلاۋعا قاتىسۋعا، ۇسىنىستار ەنگىزۋگە جانە كوميسسيا قاراۋىنداعى كەز كەلگەن ماسەلە بويىنشا ءسوز سويلەۋگە;

2) كوميسسيانىڭ رەگلامەنتىندە بەلگىلەنگەن تارتىپپەن ونىڭ وتىرىستارىنا شاقىرىلعان ادامدارعا سۇراقتار قويۋعا;

3) اتالعان زاڭمەن جانە وزگە دە زاڭنامالىق اكتىلەرمەن قاراستىرىلاتىن وزگە قۇقىقتاردى جۇزەگە اسىرۋعا.

3. كوميسسيانىڭ كەز كەلگەن مۇشەسى كوميسسيا قابىلداعان شەشىمگە قاتىستى ءوزىنىڭ ەرەكشە پىكىرىن بىلدىرۋگە قۇقىلى. جازباشا تۇردە باياندالعان مۇنداي ەرەكشە پىكىر شەشىمگە قوسا تىركەلىپ، ونىڭ اجىراماس بولىگى رەتىندە قاراستىرىلادى.

24 باپ.  پارلامەنتتىك تەرگەۋگە قاتىساتىن لاۋازىمدى تۇلعالار مەن ازاماتتاردىڭ مىندەتتەرى

1. لاۋازىمدى تۇلعالار كوميسسيا نە جۇمىس توبىنىڭ سۇراۋىبويىنشا 15 كۇننىڭ ىشىندە پارلامەنتتىك تەرگەۋدى جۇرگىزۋگە قاجەتتى اقپاراتتارى، قۇجاتتار مەن ماتەريالداردى بەرۋى ءتيىس. كوميسسياعا نەمەسە جۇمىس توبىنا ازاماتتاردىڭ جەكە ومىرىنە قاتىستى مالىمەتتەردىڭ تەك ولاردىڭ رۇقساتى بولعان جاعدايدا عانا ۇسىنىلۋى مۇمكىن.

2. پارلامەنتتىك تەرگەۋگە تارتىلعان لاۋازىمدى تۇلعالار مەن ازاماتتار مىندەتتى:

1) كوميسسيا وتىرىسىنا كەلۋگە;

2) كوميسسيا نەمەسە جۇمىس توبىنا تۇسىنىكتەمە بەرۋگە، نە كوميسسيا مەن جۇمىس توبى قويعان بارلىق قىزىقتىرعان سۇراقتارعا جاۋاپ بەرۋگە.

3. كوميسسياعا پارلامەنتتىك تەرگەۋ جۇرگiزۋ ءۇشiن قاجەتتi مالiمەتتەردi (قۇجاتتاردى، ماتەريالداردى) بەرۋدەن باس تارتقانى، نەمەسە مالىمەتتەردى بەرۋدەن جالتارعانى، كوميسسياعا تولىققاندى ەمەس نەمەسە قاساقانا جالعان اقپاراتتار بەرگەنi ءۇشiن لاۋازىمدى تۇلعالار قازاقستان رەسپۋبليكاسىنىڭ زاڭناماسىنا سايكەس جاۋاپكەرشىلىككە تارتىلادى.

25 باپ. پارلامەنتتىك تەرگەۋگە قاتىساتىن لاۋازىمدى تۇلعالار مەن ازاماتتاردىڭ قۇقىقتارى

1. پارلامەنتتىك تەرگەۋگە تارتىلعان لاۋازىمدى تۇلعا نەمەسە ازامات قۇقىلى:

1) وزىنە، جۇبايىنا جانە اياسى زاڭمەن بەلگىلەنگەن جاقىن تۋىستارىنا قارسى ايعاقتار بەرمەۋگە;

2) ادۆوكاتتىڭ قىزمەتتەرىن پايدالانۋعا;

3) قاجەتتى جازبالاردى جۇرگىزۋگە;

4) ساۋالناما حاتتاماسىمەن تانىسۋعا;

5) ساۋالناما حاتتاماسىنا وزگەرىستەردى ەنگىزۋدى سۇراۋعا;

6) باسقا ادامداردى پارلامەنتتىك تەرگەۋگە تارتۋ تۋرالى ءوتىنىش بەرۋگە.

2. ءوزiنiڭ پiكiرi بويىنشا پارلامەنتتىك تەرگەۋگە ىقپال ەتە الاتىن اقپاراتى بار ادام تۇسiنiكتەمەلەر بەرۋ ءۇشiن ءوزىن كوميسسيا وتىرىسىنا شاقىرۋ تۋرالى وتiنiشپەن كوميسسياعا جۇگىنۋگە نە قولداعى اقپاراتىن كوميسسياعا جولداۋعا قۇقىلى.

26 باپ. كوميسسيانىڭ قورىتىندى ەسەبى

1. پارلامەنتتىك تەرگەۋ ناتيجەلەرى بويىنشا كوميسسيانىڭ قورىتىندى ەسەبى (بۇدان ءارى – قورىتىندى بايانداما) دايىندالادى، ول قازاقستان رەسپۋبليكاسى پارلامەنتىنىڭ ءتيىستى پالاتالارىنا جىبەرىلەدى.

2. قورىتىندى ەسەپتە كوميسسيانىڭ ءوزى تەرگەگەن فاكتىلەر مەن ءمان-جايلار بويىنشا قورىتىندىلارى بولۋعا ءتيىس.

3. قورىتىندى باياندامادا پارلامەنتتىك تەرگەۋ جۇرگىزۋگە نەگىز بولعان وقيعالاردىڭ سەبەپتەرى مەن سالدارىن جويۋعا باعىتتالعان نورماتيۆتىك قۇقىقتىق اكتىلەردى قابىلداۋ تۋرالى ۇسىنىستار بولۋى مۇمكىن.

4. قورىتىندى باياندامادا ارەكەتتەرi (ارەكەتسiزدiگi) پارلامەنتتىك تەرگەۋ جۇرگiزۋگە نەگiز بولعان فاكتiلەر مەن ءمان-جايلاردىڭ تۋىنداۋىنا اكەپ سوققان لاۋازىمدى تۇلعالاردى قىزمەتiنەن بوساتۋ تۋرالى ۇسىنىستار، مەملەكەتتiك ورگانداردىڭ، جەرگiلiكتi مەملەكەتتiك باسقارۋ جانە ءوزiن-ءوزi باسقارۋ ورگاندارىنىڭ، كۆازيمەملەكەتتىك سەكتور سۋبەكتىلەرى، سونداي-اق باسقا دا ۇيىمداردىڭ قىزمەتiن جەتiلدiرۋ جونiندەگi ۇسىنىستار، سوتقا دەيىنگى تەرگەۋ مەن قىلمىستىق ىستەر قوزعاۋ تۋرالى ۇسىنىستار قامتىلۋى مۇمكiن.

5. پارلامەنتتىڭ ءتيىستى پالاتاسى قورىتىندى ەسەپتى ءبىر اي ىشىندە قارايدى جانە بەكىتەدى.

قازاقستان رەسپۋبليكاسىنىڭ ادام قۇقىقتارى جونىندەگى ۋاكىلى پارلامەنت پالاتاسى وتىرىسىندا قورىتىندى ەسەپتى بەكىتۋ تۋرالى ماسەلەنى قاراعان كەزدە قاتىسۋعا قۇقىلى.

6. قورىتىندى باياندامانى قاراۋ كەزىندە قازاقستان رەسپۋبليكاسى پارلامەنتىنىڭ پالاتالارى كوميسسياعا ونىڭ جەكەلەگەن ەرەجەلەرىن ءتۇسىندىرۋدى ۇسىنۋعا قۇقىلى.

7. قورىتىندى بايانداما، ەگەر وعان پارلامەنتتىڭ ءتيىستى پالاتاسى دەپۋتاتتارىنىڭ جالپى سانىنىڭ جارتىسىنان استامى داۋىس بەرسە، بەكىتىلدى دەپ ەسەپتەلەدى.

8. قورىتىندى ەسەپتى ءتيىستى پارلامەنت پالاتاسى بەكىتپەگەن جاعدايدا، كوميسسيانىڭ قىزمەتى توقتاتىلادى.

9. كوميسسيانىڭ بەكىتىلگەن قورىتىندى ەسەبى قازاقستان رەسپۋبليكاسىنىڭ پرەزيدەنتىنە، قازاقستان رەسپۋبليكاسىنىڭ ۇكىمەتىنە، قازاقستان رەسپۋبليكاسىنىڭ باس پروكۋرورىنا جىبەرىلەدى جانە بەلگىلەنگەن تارتىپپەن بۇقارالىق اقپارات قۇرالدارىندا جاريالانادى.

10. قورىتىندى بايانداما قۇقىق قورعاۋ ورگاندارىنا، مەملەكەتتىك ورگاندارعا جانە جەرگىلىكتى مەملەكەتتىك باسقارۋ جانە ءوزىن-ءوزى باسقارۋ ورگاندارىنا جانە وزگە دە ۇيىمدارعا جولدانۋى مۇمكىن.

11. قورىتىندى بايانداما قازاقستان رەسپۋبليكاسىنىڭ پرەزيدەنتiنە جانە قازاقستان رەسپۋبليكاسىنىڭ ۇكiمەتiنە جانە قازاقستان رەسپۋبليكاسىنىڭ باس پروكۋرورىنا جولدانعاننان كەيiن پارلامەنتتىك تەرگەۋ اياقتالدى دەپ ەسەپتەلەدi جانە كوميسسيا تاراتىلادى.

12. قورىتىندى ەسەپ ونى العان كۇننەن باستاپ ءبىر اي ىشىندە قازاقستان رەسپۋبليكاسى ۇكىمەتىنىڭ وتىرىسىندا جانە قازاقستان رەسپۋبليكاسىنىڭ باس پروكۋراتۋراسىندا مىندەتتى تۇردە قارالۋعا ءتيىس. قورىتىندى بايانداما بويىنشا قابىلدانعان شەشىم تۋرالى پارلامەنت پالاتالارىنا دەرەۋ حابارلانادى.

13. قورىتىندى ەسەپ سوتتا شاعىمدانۋعا جاتپايدى.

27 باپ. كوميسسيا قىزمەتىن قارجىلىق جانە ماتەريالدىق-تەحنيكالىق قامتاماسىز ەتۋ

كوميسسيانىڭ قىزمەتىن قارجىلىق جانە ماتەريالدىق-تەحنيكالىق قامتاماسىز ەتۋ قازاقستان رەسپۋبليكاسى پارلامەنتى پالاتالارىنىڭ قىزمەتىن قامتاماسىز ەتۋ اياسىندا جۇزەگە اسىرىلادى.

28 باپ. اتالمىش زاڭنىڭ قولدانىلۋىن قامتاماسىز ەتۋ

1. اتالمىش زاڭ رەسمي جاريالانعان كۇنىنەن باستاپ الپىس كۇن وتكەن سوڭ قولدانىسقا ەنگىزىلەدى.

2. اتالمىش زاڭعا سايكەس پارلامەنتتىك تەرگەۋ ول قولدانىسقا ەنگىزىلگەننەن كەيىن تۋىنداعان فاكتىلەر مەن ءمان-جايلار بويىنشا جۇرگىزىلەدى.

Abai.kz

0 پىكىر

ۇزدىك ماتەريالدار

ادەبيەت

قاۋىرسىن

ءالىمجان ءاشىمۇلى 1542
ءالىپبي

لاتىن جايى

بيجومارت قاپالبەك 1602