تەڭگە باعامىنىڭ سوڭعى قۇبىلۋلارى حالىق اراسىندا الاڭداۋشىلىق تۋعىزدى. نەگىزى ءبىز سوڭعى جىلى ۇلتتىق ۆاليۋتا تۇراقتىلىعىنا پسيحولوگيالىق تۇرعىدا ۇيرەنىپ قالعانىمىزدى بايقاتىپ الدىق. ايتپەسە 480-482 دەگەن قىزىل شەكارا ەمەس، 2022 جىلى دوللاردىڭ 500 تەڭگەگە دەيىن بارعانىن دا كورگەن ەدىك.

ۇلتتىق بانك توراعاسى تيمۋر سۇلەيمەنوۆ ۆاليۋتا نارىعىنداعى وسى قۇبىلىسقا قاتىستى ءوز پىكىرىن ءبىلدىردى. ونىڭ ايتۋىنشا، تەڭگەنىڭ السىرەۋىنە ءتورت فاكتور اسەر بەردى. ولار: اقش دوللارىنىڭ جاھاندىق دەڭگەيدە كۇشەيۋى; يمپورتتاۋشىلار تاراپىنان ماۋسىمدىق سۇرانىستىڭ ارتۋى; بازالىق مولشەرلەمەنى تومەندەتۋ بويىنشا قابىلدانعان شەشىم; ۇكىمەتتىڭ كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمدى مىندەتتى تۇردە ساتۋ تۋرالى نورمانى قولدانۋىنىڭ توقتاتۋى.

وسى فاكتوردىڭ ەكەۋى سىرتقى، ەكەۋى ىشكى. ۇلتتىق بانك ەسەبىنشە، تەڭگەگە دەم بەرەتىن فاكتورلار دا كۇشەيىپ كەلەدى. تەڭگەنىڭ نەگىزگى وداقتاسى – باعاسى ءوسىپ كەلە جاتقان مۇناي. مۇناي باعاسىنىڭ ءوسۋى ءبىزدىڭ ەكسپورتتىق تۇسىمدەردىڭ اقشالاي كولەمىن مولايتادى دا، تولەم بالانسىن ءبىز ءۇشىن جاعىمدى قىلادى. سول كەزدە تەڭگە كەرىسىنشە كۇشەيە باستاماق.

نەگىزى ۇلتتىق بانك ينفلياتسيامەن اينالىساتىن، ياعني اقشا-نەسيە ساياساتىن جۇرگىزەتىن مونەتارلى بيلىك. ونىڭ مانداتى دا سول. ول ۆاليۋتا باعامىنا ارالاسپايدى، ونى رەتتەمەيدى. تەڭگە قۇنى قازاقستان قور بيرجاسىنداعى ساۋدا-ساتتىق، سونداعى سۇرانىس پەن ۇسىنىستىڭ ورتاق ءمانى ارقىلى انىقتالىپ وتىرادى. بيرجالىق ستاقان دەگەن ۇعىم بار. كەيىنگى پوستتاردا تۇسىندىرە كەتەمىن. ءبىر سوزبەن ايتقاندا تەڭگەگە سۇرانىس كوپ بولسا ول كۇشەيەدى، دوللارعا سۇرانىس كوپ بولسا، تەڭگە السىرەيدى.

تەڭگەنىڭ بيرجاداعى مۇنداي قۇبىلىستارىنا ۇلتتىق بانك ارالاسا بەرمەيدى. ونى قاداعالاۋشى اشىق ايتىپ ءجۇر. ينتەرۆەنتسيا، ياعني بيرجاعا ارالاسۋ تەك ۇلتتىق ۆاليۋتاعا قاتىستى شوك جاعدايلارىندا وتاندىق قارجى نارىعىنداعى تۇراقتىلىقتى ساقتاپ قالۋ ءۇشىن جاسالادى. ونداي كەزدە دە ۇلتتىق بانك ينتەرۆەنتسيا تۋرالى نارىققا اشىق حابارلايدى.

قازىر ۇلتتىق بانك ءوزىنىڭ نەگىزگى جۇمىسى - ينفلياتسيانى تارگەتتەۋ (مەجەلەنگەن شەككە ءتۇسىرۋ، ول 5-7%) اياسىندا بازالىق ستاۆكاعا مۇقيات زەر سالىپ وتىر. ونداعى قيمىلى جۇيەلى جانە بولجامدى تۇردە جۇرمەك. ينفلياتسيا باسەڭدەي باستاسا، بازالىق ستاۆكا تۇسەدى.

دەمەك نارىق ۇلتتىق بانكتىڭ قيمىلىن الدىن-الا بولجاي الادى. سونىڭ ارقاسىندا قارجى نارىعىنىڭ قاتىسۋشىلارى ءۇشىن ۇزاقمەرزىمدى جۇيەلى جوسپارلاۋعا مۇمكىندىك اشىلدى.

ايبار ولجاەۆ

Facebook جەلىسى

Abai.kz