رەسەي بۇرىنعى كەڭەس ەلدەرىنەن اسكەري تەحنيكا الۋ ءۇشىن جانتالاسۋىن كۇشەيتتى. ولار وسى ماقساتتا پاتريوتتاردىڭ كۇشىمەن قۇرىلعان ءتۇرلى قورلار مەن ۇيىمداردى پايدالانادى.

ونداي قۇرىلىمداردىڭ مىسالى رەتىندە تومەندەگى تىزىمدەگىلەردى اتاۋعا بولادى:

• فوند پراۆوپوريادوك ششيت
• اسسوتسياتسيا رۋبەج («اسب رۋبەج»)
• نارودنو-پاتريوتيچەسكوە وبەدينەنيە «رودينا»)
• فوند پوددەرجكي ۆەتەرانوۆ «پاتريوت».

وسى ماقساتتا قۇرىلىپ، وسى باعىتتا جۇمىس ىستەيتىن تاعى باسقا دا ۇيىمدار بار بولۋى بەك مۇمكىن.

رەسەي ءوزىنىڭ ىقپالى مەن بايلانىسىنىڭ ارقاسىندا بۇرىنعى كەڭەس ەلدەرىنەن ءبىراز قارۋ-جاراق الىپ ۇلگەردى. بىراق ونىڭ العانى – كوبىنە جايسىز جاعدايدا ساقتالعان، ساپاسى ناشار، ونداعان جىلدار بۇرىن شىققان ەسكى قارۋ.

ناقتى قازاقستانعا كەلسەك، رەسەي تاراپى 2023 جىلى جازدىڭ سوڭىنا دەيىن قازاقستاننان رەسەيگە 7 دانا مت-لب (ترانسپورتەر) جانە 6 دانا بمپ-1 (ترانسپورتەر) جەتكىزىپ الۋدى جوسپارلاعان، - دەپ جازادى ورىس ءتىلدى باق. بۇل ماشينالاردى جوندەۋگە دەپ «كۋرگانماشزاۆود» زاۋىتىنا جەتكىزبەك ەدى.

سونىمەن قاتار، رەسەيلىكتەر ورتالىق ازيادان اسكەري جۇك كولىكتەرى مەن بردم دوڭگەلەكتى ماشينالارىن ساتىپ الىپ جاتىر.

الايدا بۇل جۇمىستاردىڭ تىم باياۋ ءجۇرىپ جاتقانىنا رەسەيدىڭ كوڭىلى تولماي وتىر. ول ازداي، قازاقستان مەن ورتالىق ازياداعى باسقا ەلدەردىڭ رەسمي تۇلعالارى رەسەيدى قارۋلاندىرۋعا قارسىلىق تانىتتى. بۇل جاعداي رەسەيدىڭ ورتالىق ازيا وڭىرىندەگى ىقپالىنىڭ ايتارلىقتاي قاتتى السىرەگەنىن راستايدى. رەسەي جەمە-جەمگە كەلگەندە ءوزىنىڭ وداقتاسى ساناپ كەلگەن ەلدەردەن قولداۋ تاپپادى، ءتىپتى قولما-قول اقشامەن دە كوندىرە الماي وتىر.

ەندەشە رەسەيدىڭ ەندى بۇرىنعى سوۆەتتىك تەحنيكا مەن وق-ءدارىنى باسقا ەلدەردەن ساتىپ الۋعا تىرىساتىنى انىق. سوۆەت قارۋىنىڭ مول قورىن ساقتاپ وتىرعان ەلدەردىڭ ءبىرى – ازەربايجان ەدى.

باتىس ساراپشىلارىنىڭ پىكىرىنشە، ازەربايجاننىڭ ۇكىمەتتىك قۇرىلىمدارى رەسەيدىڭ قارۋ الۋ سيپاتىنداعى بارلىق ارەكەتتەرىنە قاتاڭ توسقاۋىل قويۋى ءتيىس. ويتكەنى رەسەيگە قارۋ ساتقانى ازەربايجاننىڭ ءوزىنىڭ اسكەري الەۋەتىنىڭ تومەندەۋىنە اكەلەدى.

قازاقستان قوعامىندا ەل بيلىگى رەسەي بيلىگىنە بولىسىپ، كورشىسىنە جابدىقتار ەكسپورتتاۋى مۇمكىن دەگەن الاڭداۋشىلىق بار. ويتكەنى قازاقستاندىق كەي بلوگەرلەر Telegram مەن باسقا دا كانالدار ارقىلى وسىنداي مالىمەتتەردى ارا-تۇرا تاراتىپ جاتادى.

ساتتار بەكماقان

Abai.kz