باس پروكۋراتۋرا «ارسەلورميتتال تەمىرتاۋ» اق كوستەنكو شاحتاسىندا بولعان وقيعالاردى تەرگەۋ قالاي ءجۇرىپ جاتقانى جونىندە مالىمەت بەردى، دەپ حابارلايدى Ulysmedia.kz.

ۆەدومسۆتو اقپاراتىنا سۇيەنسەك، گاز-مەتان قوسپاسىنىڭ جارىلۋىنىڭ سەبەپتەرى مەن جاعدايلارىن انىقتاۋ ماقساتىندا شاحتاعا ءتۇسۋ ارقىلى وقيعا ورنىن العاشقى تەكسەرۋ جۇرگىزىلگەن.

“اۋىسىم قىزمەتكەرلەرىنەن، «امت» كومىر دەپارتامەنتىنىڭ باسشىلارى مەن جاۋاپتى قىزمەتكەرلەرىنەن جاۋاپ الىندى. بىرقاتار سوت ساراپتامالارى، ونىڭ ىشىندە جارىلىس-تەحنيكالىق، بيولوگيالىق، گەنومدىق-مولەكۋلالىق جانە ت.ب. تاعايىندالدى. كەنشىلەر ەڭبەگىنىڭ قورعالۋىنىڭ ماتەريالدىق قامتاماسىز ەتىلۋ تالاپتارىنا سايكەستىگىن تەكسەرۋ جانە قورىتىندى بەرۋ ءۇشىن مەملەكەتتىك اۋديت ماماندارى مەن باسقا دا ساراپشىلار تارتىلدى”، – دەلىنگەن حابارلامادا.

سونداي-اق، شاحتادا جۇمىستاردى ۇيىمداستىرۋعا جانە قاۋىپسىزدىك تەحنيكاسىن قامتاماسىز ەتۋگە ارنالعان قۇجاتتامالار الىنعان.

“كىنالى تۇلعالاردىڭ ءىس-ارەكەتتەرىنە ءتيىستى قۇقىقتىق باعا بەرىلەتىن بولادى. زارداپ شەككەندەر مەن تۋىستارىنىڭ قاتىسۋىمەن وتكىزىلەتىن تەرگەۋ ارەكەتتەرى ولاردىڭ دەنساۋلىق جاعدايى جانە جەرلەۋ راسىمدەرىن وتكىزۋ قاجەتتىلىگىن ەسكەرە وتىرىپ جۇرگىزىلەتىن بولادى”، – دەپ حابارلادى باس پروكۋراتۋرا.

ەسكە سالايىق، 28 قازانعا قاراعان ءتۇنى «ارسەلورميتتال تەمىرتاۋ» كەنىشىندە جارىلىس بولدى. جارىلىس كەزىندە شاحتادا 252 ادام بولعان، 206 كەنشى جەر بەتىنە شىقتى، قالعاندارى جەر استىندا قالىپ قويدى.

العاشقى ەكى كۇندە 45 كەنشىنىڭ دەنەسى تابىلدى، ال 46-شى جۇمىسشىنىڭ تەك دەنە بولشەكتەرى تابىلعانى بەلگىلى بولدى.

قازاقستان پرەزيدەنتى توقاەۆ «ارسەلورميتتال تەمىرتاۋمەن» ىنتىماقتاستىقتى توقتاتۋدى بۇيىردى. قايعىلى وقيعا بويىنشا سوتقا دەيىنگى تەرگەۋ باستالدى.

سونداي-اق، ۇكىمەتتىڭ «ارسەلورميتتال تەمىرتاۋ» اق اكتسيونەرلەرىمەن الدىن الا كەلىسىمگە كەلگەنى جانە كاسىپورىندى قازاقستاننىڭ پايداسىنا مەنشىك قۇقىعىنا بەرۋ جونىندەگى مامىلەنىڭ اياقتالىپ جاتقانى حابارلاندى.

قاراعاندى ​​وبلىسىنا بارىپ، مارقۇم كەنشىلەردىڭ تۋىستارىمەن كەزدەسكەن توقاەۆ 29 قازاندى جالپىۇلتتىق ازا تۇتۋ كۇنى دەپ جاريالادى. سونىمەن قاتار پرەزيدەنت «ارسەلورميتتال تەمىرتاۋ» ءبىزدىڭ تاريحىمىزداعى ەڭ ناشار كومپانيا ەكەنىن اتاپ ءوتتى.

قايعىلى وقيعادان سوڭ قازاقستاندا "ارسەلورميتتال تەمىرتاۋ" اق ينۆەستورى لاكشمي ميتتال مەن باسقارۋشى پالاۆاتحۋ كريشناندى "قىزمەتكەرلەردىڭ قاۋىپسىزدىگىن قامتاماسىز ەتۋدەگى قاساقانا ارەكەتسىزدىگى" ءۇشىن قىلمىستىق جاۋاپكەرشىلىككە تارتۋدى تالاپ ەتەتىن پەتيتسياعا قول جيناۋ باستالدى.

بەلگىلى ەكونوميست، 2022 جىلى پرەزيدەنتتىككە ۇمىتكەر بولعان مەيرام قاجىكەن بيلىك كوستەنكو شاحتاسىنداعى اپاتقا بار كىنانى "ارسەلورميتتال تەمىرتاۋ" كومپانياسىنىڭ اكتسيونەرى لاكشمي ميتتالعا جاۋىپ وتىرعانىن، ال شىن مانىندە كەنشىلەردىڭ ولىمىنە 90% ۇكىمەتتىڭ ءوزى كىنالى ەكەنىن مالىمدەدى.  الايدا پرەمەر-مينيستر ءاليحان سمايىلوۆ ۇكىمەتتى اقتاپ، جاۋاپكەرشىلىكتى كاسىپورىن باسشىلىعىنا ىسىردى.

Abai.kz