بۇرىنعى ۇلتتىق ەكونوميكا ءمينيسترى قۋاندىق بيشىمباەۆ كىسى ءولتىردى دەگەن كۇدىكپەن ۇستالدى. اقپاراتتى ىشكى ىستەر ءمينيسترىنىڭ ورىنباسارى ساكەن سارسەنوۆ راستادى.

«ول ۇستالدى، قازىر تەرگەۋ شارالارى ءوتىپ جاتىر. قالعانىنا پىكىر بىلدىرە المايمىن. جۇمىس اياسىندا سىزدەرگە قوسىمشا مالىمەت بەرىلەدى»، - دەدى ول.

كەشە باق بەتتەرىندە ەكس-ءمينيستردىڭ استاناداعى مەيرامحانالاردىڭ بىرىندە ايەلىن ءولىمشى ەتىپ ساباپ تاستاعانى تۋرالى اقپارات تاراعان ەدى. اۋىر سوققىدان كەيىن جەدەل-جاردەم كەلەم دەگەنشە كەلىنشەك وقيعا ورنىندا كوز جۇمعان.

«استانا قالاسىنىڭ پوليتسيا دەپارتامەنتىنە قالاداعى مەيرامحانالاردىڭ بىرىندە كەلۋشىلەر اراسىندا جانجال بولىپ، ناتيجەسىندە ايەل دەنە جاراقاتىنان قايتىس بولعانى تۋرالى حابارلاما ءتۇستى. كۇدىكتى ۇستالدى. ءتيىستى ساراپتامالار تاعايىندالدى. وقيعا ورنىندا پوليتسيا ءبولىمى مەن ەسىل اۋداندىق بولىمشەسى جۇمىس ىستەپ جاتىر، تەرگەۋ امالدارى جۇرگىزىلۋدە»، - دەلىندى ەلوردا پوليتسياسىنىڭ حابارلاماسىندا.

قايتىس بولعان ازاماتشا – 1992 جىلى تۋعان نۇكەنوۆا سالتانات امانگەلدىقىزى، ول قۋاندىق بىشىمباەۆتىڭ ەكىنشى ايەلى بولعان، ەكەۋىنىڭ ورتاق ءبىر بالاسى بار. ەكس-ءمينيستردىڭ العاشقى نەكەسىنەن – 3 بالاسى بار.

قۋاندىق بىشىمباەۆ «بولاشاق» باعدارلاماسىمەن شەتەلدە وقىعان. 2009-2010 جىلدارى پرەزيدەنت نازارباەۆتىڭ كومەكشىسى قىزمەتىن اتقارعان. ودان كەيىن ساۋدا جانە ەكونوميكالىق دامۋ ءمينيسترىنىڭ ورىنباسارى، «سامۇرىق-قازىنا» قورى باسقارما توراعاسىنىڭ ورىنباسارى بولدى. 2013-2016 جىلدار ارالىعىندا «بايتەرەك» اق باسقارما توراعاسى، 2016 جىلى بىرنەشە اي ۇلتتىق ەكونوميكا ءمينيسترى قىزمەتىن اتقاردى.

2017 جىلى 10 قاڭتاردا اسا ءىرى كولەمدە پارا الدى دەگەن ايىپپەن تۇتقىندالادى. 2018 جىلى 14 ناۋرىزدا سوت شەشىمىمەن 10 جىلعا سوتتالادى، الايدا 2019 جىلى 25 قىركۇيەكتە كەشىرىم سۇراپ، بوستاندىققا شىققان. شىمكەنت قالاسىنىڭ اباي اۋداندىق سوتى ونىڭ مەرزىمىنەن بۇرىن شارتتى تۇردە بوساتقان.

Abai.kz