مادەنيەت جانە اقپارات ءمينيسترى

ا.ع.بالاەۆاعا!

اشىق حات

قۇرمەتتى ايدا عالىمقىزى، وزىڭىزگە ارنايى جولداپ وتىرعان مىنا حاتىمنىڭ باستالۋى كوپشىلىگىمىزگە تانىس تاقىرىبىنىڭ سوڭعى ءۇش ءسوزىن جاڭارتىپ: «...عابباس اعاي قارتايدى» دەپ وزگەرتۋدى ءجون كوردىم. سەبەبى...

بۇيىرعان تاۋەلسىزدىگىمىزدىڭ باستاپقى «رەفورمالارىندا» قاتەلىكتەر بولدى. ونى بىلگەنىڭىزگە كۇمانىم جوق. ايتسە دە، ءبىر عانا مىسال: اۋىل اتا-بابامىزدىڭ ازىق-تۇلىك قويماسى عانا ەمەس، التىن بەسىگى ەدى، سول بەسىك اۋدارىلدى. ۇجىمشارلار مەن كەڭشارلاردىڭ بۇكىل دۇنيە-مۇلكى ساۋداعا سالىندى. ولاردى ءتىزىپ ايتپاعاندا: 1990-جىلى 34 ميلليونعا جۋىق قوي بولدى، ال ول قايدا كەتتى؟ «پالەنباي سوماعا ساتىلىپ، مەملەكەتتىك بيۋدجە وتكىزىلدى» دەگەندەي دەرەك جوق. ياعني بولىسكە ءتۇستى. قالتالى ازشىلىق قارىق، قالتاسىز كوپشىلىك زارىق بولدى.

وسىنداي كوپە-كورىنەۋ قاتەلىكتەر تۋرالى ماقالا جازۋعا كىرىستىم دە، جاڭا بيلىكتىڭ قاراۋىلىنا ىلىكتىم. اقىرىندا 1997-جىلدان باستاپ كىتاپتارىم مەملەكەتتىك باسپادان شىقپايتىن بولدى. قولجازبالارىم: «كوميسسيا قۇپتامادى»، «تەندەردەن وتپەدى» دەگەندەي تاقپاق جاۋاپپەن قايتارىلاتىن بولدى.

2021-جىلى مادەنيەت جانە سپورت مينيسترلىگى كىتاپتاردىڭ مەملەكەتتىك كىتاپ پالاتاسىنداعى كوميسسيانىڭ ۇيعارىمى بويىنشا شىعارىلاتىنىن حابارلادى. جاڭالىقتى جاقسىلىققا جورىپ، «بەتى قايتقان» ءۇش قولجازبامدى ۇسىندىم: «ءبىز ەمەي، كىم؟» ء(ازىل-سىقاق اڭگىمەلەرىم، 260 بەت); «ەشكىم ەشتەڭە بىلمەيتىن ەلدە»، ەكىتومدىق. ءازيز نەسيننەن اۋدارمالارىم (480 بەت); «كوڭىلىمنىڭ كوگىندە»، ەكىتومدىق، ەستەلىكتەرىم (556 بەت). قابىلدانار، جىلارا شىعار دەپ ويلادىم.

ءسويتىپ، ول قولجازبالارىم... حابار-وشارسىز كەتتى. سول جىلى جانە بىلتىر مينيسترلىككە جازعان حاتتارىم ەسكەرۋسىز قالدى.

ءسوز ىڭعايىنا قاراي ايتا وتىرايىن: بۇگىندە كوبىكاۋىزدار جامانداپ جۇرگەن كەڭەس كەزىندە كىمنەن بولسىن كەلگەن حاتقا ءبىر اپتادان كەشىكتىرمەي جاۋاپ بەرەتىن ءتارتىپ بولدى. بۇگىنگى بيلىكشىلدەر ەل تاۋەلسىزدىگىن اركىمنىڭ ءبىر-بىرىنەن  تاۋەلسىزدىگى دەپ تۇسىنگەن سياقتى. جوعارعى جاقتاعى كىمگە بولسىن ۇسىنىس، ءوتىنىش حات جازعان تانىستارىم جاۋاپ الا الماعاندارىن ايتادى. مەنشە.

قۇرمەتتى ايدا عالىمقىزى، جاعدايىمدى ءتۇسىندىڭىز دەپ بىلەم جانە كىتاپتارىمنىڭ شىعۋىنا جول اشاتىنىڭىزعا سەنگىم كەلەدى. نە ايتاسىز؟

عابباس قابىشۇلى،

جۋرنالشى- جازۋشى

Abai.kz