قىتايلىق ينۆەستورلار كيىك ەتىن وڭدەۋگە قىزىعۋشىلىق تانىتىپ وتىر. ولار جابايى جانۋاردى قولعا ۇيرەتىپ، ەتىن وڭدەپ شىعاراتىن زاۋىت سالۋعا بقو-دان جەر سۇراعان.

بۇل تۋرالى وبلىس اكىمى ناريمان تورەعاليەۆتىڭ استانادا ورتالىق كوممۋنيكاتسيالار قىزمەتىنە بەرگەن اقپاراتىنان بەلگىلى بولدى.

«ءبىز قازىر ينۆەستور ىزدەپ جاتىرمىز. قىتاي بولا ما، باسقا بولا ما، بىزگە ينۆەستور جاقسى شارتپەن كەلسە قابىلدايمىز. ەكى اي بۇرىن قىتايدان ازاماتتار كەلدى، ءوز ويىن ايتتى. جەر تاۋىپ بەرسەڭىزدەر، كيىكتەردى قولعا ۇيرەتىپ، بولاشاقتا ۇلكەن زاۋىت سالىپ، كيىك ەتىن وڭدەۋگە، جالپى مال ەتىن وڭدەۋگە قاتىستى تەرەڭ وڭدەۋ جۇمىسىن قامتيتىن جوسپار بارىن ايتتى. ءبىز ولارعا ءوز شارتىمىزدى قويدىق. جەر تاپقان جاعدايدا بىرىنشىدەن كومپانيا ءبىزدىڭ وبلىسقا تىركەلۋى كەرەك، ياعني سالىق بىزگە ءتۇسۋى كەرەك. جۇمىس ىستەۋگە جەرگىلىكتى حالىق الىنۋى كەرەك جانە ءوز موينىنا العان شارتتارىن ورىنداۋى كەرەك. بۇلار ورىندالماسا، جەردى كەرى قايتارۋ جونىندە الدىن الا ۋاعدالاستىق بولدى. ەگەر ولار ءبىز ايتقان شارتقا كەلىسسە، جۇمىس قولعا الىنادى. ونىڭ قارجى جاعى دا ءالى شەشىلمەگەن»، - دەدى ن. تورەعاليەۆ.

وبلىس اكىمى ينۆەستور قاي ەلدەن كەلسە دە، ەڭ باستىسى پايدانى كورەتىن ءوز حالقىمىز ەكەنىن ايتتى. سونىمەن قاتار، اكىم جادا جانۋارىنىڭ ەتىن، تەرىسىن ءوز كۇشىمىزبەن وڭدەيتىن مۇمكىندىك جوق.

«قازىر ءىرى قارا جانە جانە باسقا مالدى سويىپ جاتىرمىز. ونىڭ تەرىسىن قايدا جىبەرىپ جاتىرمىز؟ سۇيەگى قايدا جاتىر؟ ەشقايسىسىن وڭدەي المايمىز، پايداعا اسىرا الماي وتىرمىز. كەشە كەلگەن ينۆەستورلارمەن سويلەسكەندە «قانى، تەرىسى، سيراعىنان باستاپ مۇيىزىنە دەيىن سۇيەكتەرى قايتا كەتەدى؟ وسىنىڭ ءبارىن وڭدەيسىزدەر مە؟» دەپ سۇراق قويدىم. ولار ءبارىن وڭدەۋگە دايىن، ياعني سونداي تەحنولوگيا بار. بىزدە ۇلكەن زاۋىتتار سالىنسا، وتە پايدالى بولادى. ءتىپتى مالدىڭ قانىنان مال ازىعىن دايىنداۋعا بولادى ەكەن. سۇيەكتى وڭدەپ، ۇن جاساپ، مال ازىعىنا جىبەرۋگە بولادى. مىنە، وسى مۇمكىندىكتەردى نەگە پايدالانباسقا؟!»، - دەيدى بقو اكىمى.

Abai.kz