قانشا جەردەن قىرعىز، قازاق، وزبەك پەن تۇركىمەن باۋىرلاس تۇركىلەر دەسەك تە، ولاردىڭ التايلىق، قىپشاقتىق، قارۇلىق پەن وعىزدىق تارماقتالۋى ءبىر-بىرىنەن الشاقتاتىپ، ءبىر كەزدەرى بودانىندا بولعان رەسەيگە قاتىستى ءتۇرلى ساياسات ۇستانتىپ كەلەدى.

تۇركىمەنستان بىردەن رەسەيدەن الشاقتاپ، «بەيتاراپ ەل» مارتەبەسىن يەلەندى. قازاقستان ءوزىنىڭ «كوپ ۆەكتورلى ساياساتىن» جاريا ەتتى. وزبەكستان رەسەيمەن اراداعى بارشا وداقتان باس تارتتى. تەك قىرعىزستان عانا رەسەيمەن ورتاق شەكاراسى بولماسا دا، ەكىنشى ارمەنيانىڭ كەبىن كيگەن ورتالىق ازياداعى جالعىز تۇركى ەلى.

قىرعىزستان سوڭعى ۋاقىتتا رەسەيشىلدىك باعىتتى اشىق ۇستانىپ، ورىس مەكتەپتەرىن اشىپ، رەسەيدەن ورىس ءتىلدى مۇعالىمدەر الدىرتىپ، كورشىسى قازاقتار قاشىپ قۇتىلا الماي وتىرعان ورىستىڭ قۇشاعىنا ءوز ەركىمەن كىرۋدى قۇپ كورە باستادى.

جاقىندا ايىرقالپاقتىلار ەلىندەگى تانىمال «ۆەچەرني بيشكەك» باسىلىمى «باتىس قىرعىزستاندا توڭكەرىس ازىرلەپ جاتىر» دەگەن تاپسىرىسپەن جازىلعان ماقالانى جاريا ەتتى.

«رەسەي مەن قىرعىزستاننىڭ بۇگىنگى ءوزارا جاقىنداسا ءتۇسۋى باتىس ءۇشىن وڭەشتەگى سۇيەك سەكىلدى. ونى الىپ تاستاۋ ءۇشىن امەريكالىقتار پرەزيدەنت جاپاروۆتى تاعىنان تايدىرۋعا ۇمىتتەنەدى.  وسىلايشا ەلدىڭ باسشىلىعىن مۇحيتتىڭ ارعى جاعىنداعى قوجالارىنىڭ ءسوزىن ەكى ەتپەيتىن قولىندا ويناتاتىن قۋىرشاق بيلىكپەن الماستىرا الادى»، - دەپ جازادى «ۆەچەرني بيشكەك» گازەتى.

بيىلعى ماۋسىمدا مەملەكەت «توڭكەرىس جاساماقشى» بولدى دەگەن ايىپپەن 30 ادام تۇتقىندالدى. گازەت قولىنداعى كوزىرى رەتىندە ۇسىنعان تاعى ءبىر فاكتور – باتىس «ءتۇرلى-ءتۇستى توڭكەرىس» جاساۋ ءۇشىن وزدەرى قۇپ كورگەن بەلسەندىلەرگە «ۇشاقپەن اقش دوللارىن تاسۋدا».

جەل بولماسا ءشوپتىڭ باسى قيمىلدامايدى. قىرعىزدىڭ بەلسەندى كۇشتەرى تىم رەسەيشىل بيلىكتى قۇلاتقىسى كەلسە، اقش-تان كومەك سۇرامايدى دا. بۇل ەل ازاماتتارىنىڭ حالقىن جاتقا بەرمەۋدىڭ قاسقا جولى. ودان باتىستىڭ ءىزىن ىزدەۋ اقىماقتىق بولار ەدى.

Abai.kz