ءماجىلىس توراعاسى ەرلان قوشانوۆ قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ مەملەكەتتىك ىستەرگە ارالاسپايتىنىن مالىمدەدى. 

ءماجىلىستىڭ جالپى وتىرىسىنان شىققان ەرلان قوشانوۆقا Halyq Uni ءتىلشىسى «قوعامدا «جاڭا قازاقستان» مەن «ەسكى قازاقستان» اراسىندا تەكەتىرەس ءجۇرىپ جاتىر» دەگەن پىكىر بار. سەبەبى، ەكس-پرەزيدەنت نۇرسۇلتان نازارباەۆ جۋىردا استانا كلۋبى جيىنىن وتكىزدى جانە رەسەي پرەزيدەنتى ۆلاديمير پۋتينمەن كەزدەستى. حالىقتىڭ الاڭداۋىنا نەگىز بار ما؟» دەپ سۇراق قويدى.

ءماجىلىس توراعاسىنىڭ جاۋابىنشا، بيلىك قازىرگى پرەزيدەنت قاسىم-جومارت توقاەۆتىڭ قولىندا، سوندىقتان حالىقتىڭ الاڭداۋىنا ەش سەبەپ جوق.

«حالىقتىڭ جانە ءسىزدىڭ (جۋرناليستكە) الاڭداۋىزعا نەگىز جوق. بۇگىندە قوس بيلىك جوق. ولاي بولۋى مۇمكىن دە ەمەس. بۇگىندە بارلىق شەشىمدى حالىق ءوزى سايلاعان مەملەكەت باسشىسى قاسىم-جومارت توقاەۆ قابىلداپ وتىر.

بىرىنشىدەن، بۇگىندە ەكس-پرەزيدەنت (نۇرسۇلتان نازارباەۆ) مەملەكەتتىك ىستەرگە ارالاسپايدى. ەكىنشىدەن، كەزدەسۋلەرى مەن ءىس-شارالارىن، جول ساپارلارىن ءوزىنىڭ جەكە ازامات رەتىندەگى قۇقىعىن پايدالانىپ وتكىزىپ جاتىر»، - دەدى ءماجىلىس توراعاسى.

Abai.kz