وسى جىلى سالىق سالاسىندا ءبىراز وزگەرىستەر بولىپ جاتىر. اسىرەسە شاعىن بيزنەس ءۇشىن موراتوري مەرزىمى اياقتالدى، ەندى ءبىراز تەكسەرۋلەر بولادى دەگەن ءسوز.

ءموبيلدى اۋدارىمداردى دا سالىقتىق ورگاندار قاداعالايتىن بولادى. ونىڭ دا قاراپايىم حالىققا ەش قاتىسى جوق، ايىنا 100 اۋدارىم قابىلدايتىن جانە ونى ءۇش اي قاتارىنان جالعاستىرىپ 300 اۋدارىمنان اسىراتىن ازاماتتارعا سالىق كوميتەتىنەن ناقتى ساۋالدار قويىلۋى مۇمكىن.

وسى جىلى كاسىپكەرلەر جالپىعا بىردەي دەكلاراتسيا بويىنشا ەسەپتەرىن وتكىزەدى، مەنىڭ ويىمشا قورقاتىن ەشتەڭە جوق، بارلىق مۇلكى مەن اكتيۆتەرىن بارىنشا كورسەتە بەرگەندەرى دۇرىس. كەيىن ەگەر اياق استىنان وتە جوعارى سوماداعى مۇلىككە يە بولىپ، سول كەزدە ايىپ پۇل ارقالاپ كەتپەۋى ءۇشىن قازىر بارلىق اكتيۆتەرىن كورسەتكەندەرى دۇرىس. بۇنىڭ بارلىعى ەكونوميكامىزدىڭ كولەڭكەلى تۇسىن اشىقتىققا، اقشا اينالىمىنداعى مولدىرلىككە جول اشاتىن بولادى.

كرەاتيۆتى يندۋسترياعا دا بولشەك سالىق رەجيمىنە وتۋگە مۇمكىندىك بەرىلىپ جاتقانى جاعىمدى وزگەرىس. ويتكەنى بۇل ءبىرىنشى كەزەكتە مادەنيەتىمىزدىڭ دامۋىنا ۇلەس قوسادى، ول ۇلتتىق قۇندىلىقتارىمىزدىڭ سالت-سانامىزدىڭ جاڭعىرۋىنا سەپتىگىن تيگىزەدى. ءوز كەزەگىندە ۇلتتىق ەكونوميكامىزدىڭ قالىپتاسۋىنا جول اشادى.

بولشەك ساۋدا رەجيمى كولەڭكەدە جۇرگەن كوپتەگەن كاسىپكەرلىك سۋبەكتىلەرىن جارىققا الىپ شىعۋىنا سەپتىگىن تيگىزەدى. ويتكەنى ولار كتپ (كورپوراتيۆتىك تابىس سالىعىنان) 20% جانە ققس (قوسىلعان قۇن سالىعىنان) 12% بوساتىلاتىن بولادى. بۇل جەكە كاسىپكەرلەر ءۇشىن 2%-دان 4%-عا دەيىن، جشس ءۇشىن 8%-عا دەيىن بولادى. تەك كومپانيانىڭ جىلدىق اينالىمى 2,2 ميلليارد تەڭگەدەن اسپاۋى، ال شتاتتا 200 ادامنان كوپ بولماۋى قاجەت. دەمەك كاسىپكەر، سالىققا تولەۋى قاجەت قاراجاتتى ءوز بيزنەسىن دامىتۋعا جۇمسايدى، قىزمەتكەرلەرىنىڭ تابىسىن ارتتىرۋعا باعىتتاي الادى دەگەن ءسوز.

بۇگىن كوپتەگەن شاعىن بيزنەس وكىلدەرى جەڭىلدەتىلگەن سالىقتىق رەجيمىن قولدانادى 3%، ول جاقسى عوي، دەگەنمەن كومپانيانىڭ جىلدىق اينالىمى ققس-نىڭ بەلگىلەنگەن شەگى جىلىنا 73 840 000 تەڭگەدەن اسىپ كەتسە، جوعارىداعى سالىقتىڭ ءبارىن تولەۋگە مىندەتتەلەدى. سوندىقتان مۇمكىندىگىنشە بولشەك ساۋدا رەجيمىنە اۋىسىپ العان دۇرىس. سوندا جىلدىق اينالىمىڭىز 2,2 ميلليارد تەڭگەدەن اسقانشا ەش قينالماستان كاسىبىڭىزدى دوڭگەلەتە بەرەسىز.

ال، 4 جىل بويى ءموراتوريدىڭ اياقتالۋىن كۇتىپ وتىرعان سالىق كوميتەتىنە ايتارىم، شاش ال دەسە باس الىپ ەرتەڭ كاسىپكەرلدەرگە قىسىم جاسالماۋى قاجەت. وندا كولەڭكەلى ەكونوميكا ۇلەسى تەك ارتاتىن بولادى. ادامگەرشىلىكتىڭ قاعيدالارىنا نەگىزدەلىپ، ءبىرىنشى بارىنشا اقپاراتتىق تۇسىندىرمە جۇمىستارى جۇرگىزىلسە، كەيىن قتەلەسىپ جاتقاندار بولسا ەسكەرتۋ جاساسا دۇرىس بولادى. ال ەندى وعان كونبەگەندەرگە ايىپپۇل ارقالاتۋعا دا، جازا قولدانۋعا دا بولادى.

ماقسات حالىق