ءپۋتيننىڭ قىسقا مەرزىمگە جوسپارلاعان اتالمىش «ارناۋلى وپەراتسياسى» ەكى جىلعا اياق باستى.

«الەمدىك اسكەري دەرجاۆا» اسكەرىنىڭ كۇنى ۋران بايىتۋ مەن عارىش كەمەسىن ۇشىرۋدان ورىستان كوش كەيىن قالعان يراننىڭ «شاھيد» درونى مەن سولتۇستىك كورەيانىڭ بالليستيكالىق زىمىرانىنا قاراپ قالدى. رەسەيدىڭ ەكى اسكەري ارىپتەسى كرەمل تارابىنا اسكەري كومەك بەرىپ قانا قويماي، جاھاندىق ەكونوميكاعا تىكەلەي اسەر ەتەتىن الەمدىك گەوساياساتتى بىرگە ۋشىقتىرۋعا ءوزارا ۋادەلەسكەندەي.

قاڭتاردىڭ 15-كۇنى يران يراقتىڭ كۋرد ايماعىنداعى ءيزرايلدىڭ «موسساد» شپيوندىق ورگانىنىڭ شتابىنا سوققى بەرگەنىن مالىمدەدى. بىراق يراق تارابى ءيزرايلدىڭ اسكەري شتابىنىڭ بولعانىن جوققا شىعارىپ، ءتورت ادام وپات بولعان شابۋىلدى ايىپتادى. يران سونىمەن بىرگە سيريانىڭ باتىس-سولتۇستىگىندەگى «يسلام مەملەكەتى» ۇيىمىنىڭ بازاسىنا اۋەدەن سوققى جاسادى.

ءوز قادامىن يران گەنارالى سۇلايمانيدى ەسكە الۋ كەزىندە بولعان جارىلىستى موينىنا العان اتالمىش ءۇيىمنان كەك الۋ دەپ ءتۇسىندىردى.

قاڭتاردىڭ 16-كۇنى يران ويلاماعان جەردەن پاكىستانعا زىمىرانمەن، درونمەن شابۋىل جاسادى. يران تارابى ءوز ارەكەتىن سۋنني باعىتتاعى «Jaish al-Adi» (اقيقاتشىلدار قوسىنى) ۇيىمىنا قارسى جاسالدى دەپ ءتۇسىندىردى.

پاكىستان دا قاراپ جاتپاي، يران جەرىنە سوققى جاسادى. ەكى جاقتان دا ادام شىعىنى بولدى.

امەريكا تارابى تاياۋ شىعىستى دۇربەلەڭگە سالعان «حاماس»، «حەزبوللا»، «حۋسيتەردىڭ» ارتىندا يران تۇر، باسقانىڭ قولىمەن وت كوسەپ وتىر»، - دەپ، تەگراندى ايىپتاپ كەلگەن ەدى.

ءپۋتيننىڭ سەرىكتەسى يران بيلىگىنىڭ اشكەرە ۇرىسقا دا كەت ارى ەمەسى سوڭعى ارەكەتتەرىنەن انىق بايقالدى.

ال سولتۇستىك كورەيا بولسا، جاڭا جىل باستالا سالىسىمەن وڭتۇستىك كورەيانىڭ شەكاراسىنا جاقىن جاعالاۋدى زىمىرانمەن اتقىلادى. وتكەن اپتادا كيم چەن ىن وڭتۇستىك كورەيانى باۋىرلاستارى تۇراتىن ەل سانامايتىنىن، كەرىسىنشە يادرولىق بومبانىڭ كۇشىمەن جاۋلاپ الاتىن باستى دۇشپان كورەتىنىن مالىمدەدى.

سونداي-اق ادامسىز اتوم سۇڭگۋىر كەمەسىن سىناقتان ءساتتى وتكىزگەنىن، امەريكانىڭ كەمەلەرىن جويۋعا قاۋقارلى ەكەنىن جەتكىزدى. قازىر الەمدىك ساراپشىلار «كيم چەن ىن كورەياعا شىنىندا سوعىس اشا ما؟» دەگەن ماسەلەگە باس قاتىرىپ جاتىر.

ساراپشىلار ءپۋتيننىڭ دوستارىنىڭ قۇقايى رەسەيدەگى پرەزيدەنت سايلاۋى كەزىندە تاعى دا قارقىن الىپ، امەريكاداعى پرەزيدەنت سايلاۋى اياقتالعانشا جالعاسادى دەپ بولجاۋدا.

ەسبول ۇسەنۇلى

Abai.kz