نە ەكسەڭ، سونى وراسىڭ!

كەيىنگى كەزدەرى تۇڭعىش پرەزيدەنت ن.نازارباەۆقا قاتىسى بار اقپاراتتىق حابارلار قوعامدا قىزۋ تالقىلاناتىن بولدى. ول 2022 ج. قاڭتار ايىندا رەسپۋبليكالىق ەفيرگە شىعىپ «مەن ءجاي عانا قاتارداعى زەينەتكەرمىن» دەپ جالپاق جۇرتقا جاريا ەتكەن بولاتىن. الايدا، قوعام  ونى ەشقاشان «قاتارداعى زەينەتكەر» رەتىندە قابىلدامايتىنىن كورسەتۋدە.

بۇل – زاڭدى قۇبىلىس. ەگەر، تاريحي تۇرعىدا الساق، ن.نازارباەۆ قازاقستان حالقى ءۇشىن قاي ۋاقىتتا بولماسىن «تاريحي تۇلعا» بولىپ قالا بەرەدى. سەبەبى، ونىڭ قىزمەتى مەن جەكە تۇلعالىق بولمىسى قازاقستان مەملەكەتتىلىگىنىڭ تاريحىنىڭ اجىراماس بولىگى بولىپ، تاريحقا ەندى. ونى وزگەرتۋ ەندى مۇمكىن ەمەس.

مۇنداعى ماسەلە باسقادا، ول ‑ «تۇڭعىش پرەزيدەنت تاريحقا قانداي باعامەن ەندى؟» دەگەن سۇراقتان تۋىندايدى. ويتكەنى، كەز كەلگەن وقيعاعا باعا بەرەتىن نارسە – تاريح. ولاي بولسا، قوعام دا وسى سۇراقتى ۇنەمى قويىپ وتىراتىن بولادى: ەگەر قوعام ونىڭ قىزمەتىن وڭ باعالاسا، وندا ول «ن.نازارباەۆتىڭ ەسكەرتكىشى الىنىپ تاستالدى» دەگەن اقپاراتتى نارازىلىقپەن قابىلدايدى. ەگەر قوعام ونىڭ قىزمەتىن تەرىس باعالاسا، وندا ول بۇل اقپاراتتى قولداپ قابىلدايدى.

وسىدان كەلىپ، قوعامدا العاشقى پرەزيدەنتتىڭ وزىنە، ونىڭ اتقارعان قىزمەتىنە، ول قۇرعان مەملەكەتكە جانە تاعى كوپتەگەن ماسەلەلەرگە جالپى باعا بەرىلەدى.

ال،  قازىرگى اقپاراتتىق جەلىدە بايقالعانداي، ن.نازارباەۆتىڭ ەسكەرتكىشتەرى مەن ۇلكەن پورترەتتەرىنىڭ الىنىپ تاستالۋى قوعام تاراپىنان دۇرىس دەپ باعالانۋدا. ەندەشە، بۇدان «بۇگىنگى قوعام ن.نازارباەۆتىڭ قىزمەتىنە، تۇلعالىق بولمىسىنا، ول قۇرعان مەملەكەت ۇلگىسىنە كوڭىلدەرى تولماعان، قوعام وعان ريزاشىلىق بىلدىرمەگەن دەگەن قورىتىندى سۇرانىپ تۇراتىنىن كورەمىز.

ءيا، قازاقتىڭ «نە ەكسەڭ، سونى وراسىڭ» دەگەن دانالىق ءسوزى قالايشا ءدال ايتىلعان دەسەڭشى!

مۇنىڭ استارىندا ن.نازارباەۆ بيلىك ەتكەن كەزدەردەگى پايدا بولعان جاعىمپازدىقتىڭ اسقىنعان ءتۇرى، حالىقتىڭ قازىناسىنا وبىرلىقپەن قول سالۋ، قۇقىقتىق مەملەكەتتىڭ ورناماۋى، ازاماتتىق قوعامنىڭ قىسىمعا ءتۇسۋى جانە حالىقتىڭ الەۋمەتتىك جاعدايىنىڭ تىم تومەندەپ كەتۋى، مەملەكەتتىك دامۋداعى تۇراقتىلىقتىڭ بولماۋ سياقتى كوپتەگەن كۇيزەلىستى قۇبىلىستار تۇرعانى وسىدان بىلىنەدى.

سوندىقتان بولار، حالىق ن.نازارباەۆتىڭ قانداي دا ءبىر ەسكەرتكىشى، نە پورترەتى الىنىپ تاستالۋىنىڭ ءوزىن «ادىلەتتىلىككە قادام» دەپ باعالاۋدا.

بۇل - ن.نازارباەۆتان كەك الۋ ەمەس، بۇل - قوعامنىڭ ءوزىنىڭ ارىلۋ جولى!

ال، ادامي تۇرعىدا – ەشكىمنىڭ ەشكىمگە وكپەسى جوق...

ءابدىراشيت باكىرۇلى

Abai.kz