بىلتىر ەلدە بالا تاربيەسىنە نەمقۇرايلى قاراعان 6 مىڭنان استام ادام پروفيلاكتيكالىق ەسەپكە الىنعان، دەپ حابارلايدى 24.kz.

ارنايى كوميسسيا ولارعا قاتىستى 1800 ءىستى قارادى. سوتتىڭ شەشىمىمەن 600 ادام اتا-انا قۇقىعىنان ايىرىلدى. تاعى 340 ادامنىڭ قۇقىعى شەكتەلگەن. بۇل تۋرالى ىشكى ىستەر مينيسترلىگىنىڭ وكىلى بريفينگتە ايتتى. ۆەدومستۆو وتكەن جىلدىڭ سوڭىندا مەملەكەتتىك ورگاندارمەن بىرلەسىپ، جاسوسپىرىمدەرگە قاتىستى زورلىق-زومبىلىق پەن بۋللينگتىڭ الدىن الۋ جانە كومەك كورسەتۋ ادىستەمەسىن جاساپتى. سونىڭ اياسىندا ولاردىڭ قاۋىپسىزدىگىن قامتۋ شارالارى كۇشەيتىلىپ جاتىر.

- جاسوسپىرىمدەر اراسىندا بوپسالاۋعا قاتىستى 40 دەرەك انىقتالدى. ءار وڭىردە زورلىق-زومبىلىقپەن كۇرەسۋ جانە الدىن الۋ ءۇشىن اكىمدىكتەر جانىنان ۆەدومستۆوارالىق ءموبيلدى توپتار جۇمىس ىستەيدى. سوڭعى 10 جىل ىشىندە كامەلەت جاسقا تولماعاندارعا قاتىستى قۇقىقبۇزۋشىلىق دەرەكتەرى 3 ەسە ازايدى. ولاردىڭ قاۋىپسىزدىگى ودان ءارى باستى نازاردا بولادى، - دەيدى قر ءىىم اكىمشىلىك پوليتسيا كوميتەتىنىڭ باسقارما باستىعى اسەت وسپانوۆ.

Abai.kz