كوكشەتاۋ ولكەسى كەڭەستىك اتاۋدان ارىلا ما؟!
وبلىس اكىمى مارات احمەتجانوۆتىڭ نازارىنا!
ءبىزدىڭ قازاقستاندا اسا كورىكتى، تابيعاتى سۇلۋ، وزىمىزگە بولسىن، ءتىپتى شەتەلدىك قوناقتارعا دا كوكىرەك كەرە، ماقتانىشپەن كورسەتۋگە تۇرارلىق، كەرەمەتتەي ادەمى ولكەلەرىمىز بارشىلىق. سونىڭ ءبىرى جانە بىرەگەيى التاي-تارباعاتاي اۋماعى، سونداي-اق، الاتاۋ باۋرايى سانالاتىن جەتىسۋ ءوڭىرى جانە ماڭعاز، تاككاپار، كوگىلدىر ايماق كوكشەتاۋ اتىرابى.
بۇل شۇرايلى، ءسان-سالتاناتى كەلىسكەن، قۇتتى، قاسيەتتى ولكەلەر، جاراتۋشىنىڭ قازاقتىڭ دارحاندىعى مەن اپپاق پەيىلىنە بەرگەن تەڭدەسى جوق باق دەۋگە بولادى.
ارينە، بۇل ماقالادا مەنىڭ ايتايىن دەگەنىم، مۇلدە باسقا وي جانە پىكىر.
قازىرگى، كۇننەن-كۇنگە كوركەيىپ كەلە جاتقان، كەلبەتتى ەلوردامىز ويىپ اۋماعىنا ورنالاسقان اقمولا وبلىسى، ياعني، كوكشەتاۋ ءوڭىرى. ءبىز كەيىنگى كەزدە، يدەولوگيالىق تۇرعىدان مۇلدە ەسكىرگەن، سوناۋ كەڭەستىك ءداۋىردىڭ بوداندىعىن ەلەستەتىپ تۇراتىن ء(تىپتى، قۇلدىعىن دەسە دە ارتىق ايتپاعاندىق) ءبىراز اتاۋلاردى ءالى كۇنگە دەيىن وزگەرتە الماي كەلەمىز. ۇساق-تۇيەك دەمەي، ايتاتىن بولساق، تۋرا استانامىزدىڭ ىرگەسىندە تۇرعان سەرىكتەس قالالار (سپۋتنيك) ستەپنوگورسك پەن ششۋچينسك, سونىمەن قاتار تسەلينوگراد اۋدانى.
مىسالى: كورشى رەسەيدە كەڭەستىك زاماننىڭ اتاۋلارىن باياعىدا-اق، سىپىرىپ تاستاعان. بۇرىنعى لەنينگراد - قازىرگى سانكت-پەتەربور، كالينين - تۆەر، كۋيبىشەۆ - سامارا، گوركي - نيجني نوۆگورود بولىپ وزگەردى. ودان دا باسقا قالالار مەن اۋداندار تولىپ جاتىر.
ال، ءبىزدىڭ وتىز جىلدىق بيلىكپەن قازىرگى بيلەۋشىمىز كوپ نارسەگە باتىلى جەتپەي، ۋاقىت وزدىرىپ، شەگىنۋمەن كەلەدى. ءوز ۋاقىتىندا، تۋعان ەلىمىز بوداندىقتىڭ قامىتىندا جۇرگەن كەزىندە، اقىماق نيكيتا حرۋششەۆتىڭ كۇشتەپ، قارادۇرسىن قويعان تسەلينوگراد اتاۋىن دا ءالى كۇنگە دەيىن وزگەرتە المادىق.
ول تۇرماق، وسى وبلىستىڭ قۇرامىنداعى اۋدانداردا كوپتەپ كەزدەسەتىن: زارەچنىي، دۆۋرەچنىي، پريرەچنىي، دالني، رازدولنىي، ەيسكي، كۋرسكي، كراسنىي زاپوروجەتس، سۆوبودنىي، كراسيۆينسكي، كراسيۆوە، كومسومولسكي، 37 لەت وكتيابريا، ميرنىي، ماياكوۆسكي، كراسنوگورسك، كالاچەۆسكي دەگەن اتاۋلاردىڭ قازىرگى ۋاقىتقا كەرەگى قانشا؟
مەن وسى وبلىستا ۇزاق جىلدار قىزمەت جاساعاندىقتان، ەسىل، جاقسى، جارقايىڭ، اتباسار، استراحان، زەرەندى جانە وزگە دە اۋدانداردىڭ يەلىگىندەگى وكرۋگتەردىڭ قالاي اتالاتىندىعىن جاتقا بىلەمىن. تۋرا ءبىر رەسەيدىڭ گۋبەرنياسىندا جۇرگەندەي بولاسىڭ. وسىنداي يدەولوگيالىق تۇرعىدا مۇلدە ەسكىرگەن اتاۋلاردى جاڭا قازاقستان زامانىنا ساي ەتىپ، قايتادان اتاۋدى ۋاقىت كەتىرمەي ۇيىمداستىرۋدى، ياعني، تەزدەتىپ ونوماستيكالىق كوميسسيانىڭ جۇمىس ىستەۋىنە رۇقسات بەرۋدى قامتاماسىز ەتۋ كەرەك.
جاقىندا بۇرىنعى دەرجاۆينسك قالاسىن كەنەسارى دەپ وزگەرتتىڭىزدەر. سول سەكىلدى، ۇلى ابىلاي حاننىڭ رەزيدەنتسياسى تۇرعان ششۋچينسك قالاسىن دا ابىلاي حان قالاسى دەپ اتاساڭىزدار دا نۇر ۇستىنە نۇر بولارى ەدى عوي.
بۇل ۇيىمداستىرۋشى ادامعا كوپ قيىندىق تۋدىرمايدى، وپ-وڭاي نارسە. ايتپەسە، جوعارىدا اتالعان وتە ەسكىرگەن يدەولوگيالىق اتاۋلار، قاي كەزدە بولماسىن، كەزىندەگى بوداندىقتىڭ، ءتىپتى، قۇلدىق كەزەڭدى ەسكە ءتۇسىرىپ تۇرادى.
سوندىقتان، قازىرگى اقمولا وبلىسىنىڭ اكىمى، قۇرمەتتى مارات مۇراتۇلى مىرزانىڭ، وسى اتاۋلارعا كوڭىل اۋدارىپ، ۋاقىت وزدىرماي الدىرىپ تاستاۋىن قالار ەدىك!
نەگە دەسەڭىز، كوگىلدىر كوكشەتاۋ ولكەسى، قالىڭ قازاق ەلىنىڭ، مىناۋ اينالاداعى شارتاراپ ەلدەرىنە ماقتانىشپەن كورسەتەتىن، اسىل بايلىعىمىز دەسەك، ارتىق كەتپەگەندىگىمىز!
بەيسەنعازى ۇلىقبەك،
قازاقستان جۋرناليستەر وداعىنىڭ مۇشەسى
Abai.kz
