ۇكىمەت وتىرىسىندا پرەمەر-مينيستر ولجاس بەكتەنوۆ قازاقستاندا قىمباتتاعان ونىمدەردى اتادى، دەپ حابارلايدى Abai.kz.

سونداي-اق ول قازاقستاندا ينفلياتسيانى ودان ءارى تومەندەتۋدىڭ ماڭىزىن ايتتى.

"2 ايدىڭ قورىتىندىسى بويىنشا ينفلياتسيا جىلدىق ماندە باياۋلاپ، 9,3 پايىز بولدى. بۇل رەتتە ونى 8 پايىز دالىزىندە ۇستاپ تۇرۋ مىندەتى تۇر. كۇرىش، جۇمىرتقا، جەمىستەر، سۋسىندار، سارى ماي جانە ماكارون ونىمدەرىنىڭ باعاسى قىمباتتاعان", - دەلىنگەن حابارلامادا.

بەكتەنوۆ باعاسى ءوسىپ كەتكەن پوزيتسيالاردىڭ سانى ەداۋىر كوپ ەكەنىن ايتتى.

"دەمەك بۇل ورتالىق جانە جەرگىلىكتى اتقارۋشى ورگاندار تاراپىنان قابىلدانىپ جاتقان شارالاردىڭ جەتكىلىكسىز ەكەنىن كورسەتەدى", - دەدى ۇكىمەت باسشىسى.

باسشىلىقتىڭ پايىمداۋىنشا، فورۆاردتىق كەلىسىمشارتتار، ءونىم قۇنىن ارزانداتۋدى سۋبسيديالاۋ، باعا تۇراقتىلىعىن قامتاماسىز ەتۋ بويىنشا ساۋدا سۋبەكتىلەرىمەن كەلىسىمدەر جاساۋ سياقتى پارمەندى تەتىكتەردى بەلسەندى پايدالانۋ كەرەك.

Abai.kz