تەگەران، 22 مامىر. مەملەكەت باسشىسى قاسىم-جومارت توقاەۆتىڭ تاپسىرماسىمەن ءماجىلىس توراعاسى يران يسلام رەسپۋبليكاسىنا جۇمىس ساپارمەن باردى. تەگەراندا ەرلان قوشانوۆ پرەزيدەنت يبراحيم رايسيدىڭ قايتىس بولۋىنا بايلانىستى كوڭىل ايتۋ جانە قۇرمەت كورسەتۋگە ارنالعان ءىس-شاراعا قاتىستى.

بۇگىن يران حالقى تىك ۇشاق اپاتىنان قايتىس بولعان پرەزيدەنت يبراحيم رايسيمەن قوشتاستى. پرەزيدەنتتەر سارايىندا وتكەن كوڭىل ايتۋ جانە قۇرمەت كورسەتۋگە ارنالعان ءىس-شاراعا قازاقستان دەلەگاتسياسىن ءماجىلىس توراعاسى ەرلان قوشانوۆ باستاپ باردى.

پالاتا سپيكەرى يران يسلام رەسپۋبليكاسى ۆيتسە-پرەزيدەنتى  موحسەن مانسۋريمەن جانە مەملەكەتتىڭ جوعارى ساياسي باسشىلىعىمەن كەزدەسىپ، قازاقستان پرەزيدەنتىنىڭ اتىنان بۇكىل يران حالقىنا، سونداي-اق قازا تاپقان ادامداردىڭ وتباسىلارىنا كوڭىل ايتتى.

– ءبىزدىڭ پرەزيدەنتىمىز بۇل سۋىت حاباردى تەرەڭ كۇيزەلىسپەن قابىل الدى. يراننىڭ جوعارى ليدەرى ءالي حامەنەي مەن يران حالقىنا قوڭىل ايتۋ حاتتارىن جولدادى. سونىمەن قاتار، كەشە يراننىڭ استاناداعى ەلشىلىگىنە بارىپ، كوڭىل ايتۋ كىتابىنا جازبا قالدىردى. يبراحيم رايسي قازاقستان مەن يران اراسىنداعى ءوزارا سەنىمگە نەگىزدەلگەن دوستىق بايلانىستاردىڭ دامۋىنا زور ۇلەس قوسقان تۇلعا رەتىندە ءبىزدىڭ جادىمىزدا ساقتالادى، – دەدى ەرلان قوشانوۆ.

ءماجىلىس سپيكەرى قازاقستان پرەزيدەنتى قاسىم-جومارت توقاەۆتىڭ دوستاس يرانمەن سەنىمدى سەرىكتەستىك پەن تىعىز ارىپتەستىكتى نىعايتۋعا ەرەكشە ءمان بەرەتىنىن اتاپ ءوتتى.

– وسىنداي قيىن كەزەڭدە استاناداعى ەلشىلىگىمىزگە بارىپ، ءبىزدىڭ حالقىمىزعا قولداۋ كورسەتكەنى جانە يراننىڭ جوعارى ليدەرى ءالي حامەنەي مەن حالقىمىزعا قوڭىل ايتۋ حاتتارىن جولداعانى ءۇشىن قازاقستان پرەزيدەنتى قاسىم-جومارت توقاەۆقا العىسىمىز شەكسىز. مۇنى ەشقاشان ۇمىتپايمىز. الداعى ۋاقىتتا قارىم-قاتىناسىمىزدى دا دامىتا بەرۋگە مۇددەلىمىز، – دەدى موحسەن مانسۋري.

Abai.kz