سۋ شارۋاشىلىعى سالاسىنىڭ ارداگەرى ناريمان قىپشاقباەۆ پرەزيدەنت جارلىعىمەن «وتان» وردەنىمەن ماراپاتتالدى. بۇل تۋرالى قر سۋ شارۋاشىلىعى جانە يرريگاتسيا مينيسترلىگى مالىمدەدى. 

قازاقستان رەسپۋبليكاسى پرەزيدەنتىنىڭ جارلىعىمەن سۋ شارۋاشىلىعى ەكس-ءمينيسترى ناريمان قىپشاقباەۆ ەلىمىزدىڭ الەۋمەتتىك-ەكونوميكالىق دامۋىنا قوسقان ەرەكشە ۇلەسى مەن بەلسەندى قوعامدىق قىزمەتى ءۇشىن «وتان» وردەنىمەن ماراپاتتالدى.

ناريمان قىپشاقباەۆ 1934 جىلى 27 مامىردا قوستاناي وبلىسىندا دۇنيەگە كەلگەن. 1981-1990 جىلدارى قازاق كسر مەليوراتسيا جانە سۋ شارۋاشىلىعى ءمينيسترى قىزمەتىن اتقاردى. 1990-1995 جىلدارى - سۋ رەسۋرستارى جونىندەگى مەملەكەتتىك كوميتەتتىڭ توراعاسى بولدى.

تاۋەلسىزدىك جىلدارىندا سۋ كودەكسىنىڭ جوباسىن ازىرلەۋگە جەتەكشىلىك ەتتى جانە ورتالىق ازيا مەملەكەتتەرى، رەسەي جانە قىتاي اراسىنداعى ترانسشەكارالىق وزەندەردىڭ سۋىن پايدالانۋ جونىندەگى حالىقارالىق ۇيىم قۇرۋعا ۇلكەن ۇلەس قوستى. سونداي-اق، حالىقارالىق ارالدى قۇتقارۋ قورىن قۇرۋ جۇمىسىندا دا ماڭىزدى ءرول اتقاردى.

قازىرگى ۋاقىتتا ناريمان قىپشاقباەۆ ارال تەڭىزى مەن سىرداريا وزەنى ماسەلەلەرى بويىنشا ءوز ۇسىنىستارىمەن بەلسەندى بولىسەدى. ۇزاق مەرزىمدى ەڭبەك جولىندا وننان استام ماراپاتقا يە بولدى، ولاردىڭ اراسىندا مەملەكەتكە سىڭىرگەن ۇلكەن ۇلەسى ءۇشىن «قۇرمەت» وردەنى جانە II دارەجەلى «بارىس» وردەنى بار.

«ناريمان قىپشاقبايۇلىنا قازاقستاننىڭ سۋ شارۋاشىلىعىن دامىتۋعا قوسقان زور ۇلەسى ءۇشىن العىس ايتقىم كەلەدى. قايراتكەردىڭ كوپ جىلدىق جۇمىسىنىڭ جەمىسى ءالى كۇنگە دەيىن ەلىمىزگە دە، كورشى مەملەكەتتەرگە دە پايداسىن تيگىزۋدە. سونداي-اق، وتاندىق سۋ سالاسىنىڭ ارداگەرىن 90 جىلدىق مەرەيتويىمەن دە قۇتتىقتاعىم كەلەدى. ناريمان قىپشاقبايۇلى قازاقستاننىڭ سۋ قاۋىپسىزدىگى جانە رەسپۋبليكانىڭ سۋ نىساندارىن قورعاۋ ماسەلەلەرىندە ءالى بەلسەندى، بارلىق ارىپتەستەرىنە ۇلگى كورسەتىپ وتىر»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

Abai.kz