سەيسەنبى, 18 قاڭتار 2022
جاڭالىقتار 2261 0 پىكىر 23 جەلتوقسان, 2013 ساعات 04:27

اۋىت مۇقيبەك. ناعاشىما حات (جالعاسى)

1-سۋرەت: 37 جاسىندا وققا بايلانعان مۇقاباي اتام...

2-سۋرەت: اكەم – مۇقيبەك مىرزابايۇلى

3. اقىلىن تىڭداپ اعانىڭ.... (تۇمانباي مولداعاليەۆ پەن اۋىت مۇقيبەك)

4. تۇماعامدى جەتەلەپ... (تۇمانباي مولداعاليەۆ پەن اۋىت مۇقيبەك)

5. تۇماعامدى قۇشاقتاپ... (تۇمانباي مولداعاليەۆ پەن اۋىت مۇقيبەك)

4. نۇرەكە، ءسىز سوڭعى كەزدە كوپ نارسەنى بىلمەي قالىپ نەمەسە بۇرىس ەسىپ ءجۇرسىز-اۋ شاماسى. مىسالى جاڭاوزەن! ەندى، مىنە، شەتتەگى بەس ميلليون قازاق تۋرالى!

1-سۋرەت: 37 جاسىندا وققا بايلانعان مۇقاباي اتام...

2-سۋرەت: اكەم – مۇقيبەك مىرزابايۇلى

3. اقىلىن تىڭداپ اعانىڭ.... (تۇمانباي مولداعاليەۆ پەن اۋىت مۇقيبەك)

4. تۇماعامدى جەتەلەپ... (تۇمانباي مولداعاليەۆ پەن اۋىت مۇقيبەك)

5. تۇماعامدى قۇشاقتاپ... (تۇمانباي مولداعاليەۆ پەن اۋىت مۇقيبەك)

4. نۇرەكە، ءسىز سوڭعى كەزدە كوپ نارسەنى بىلمەي قالىپ نەمەسە بۇرىس ەسىپ ءجۇرسىز-اۋ شاماسى. مىسالى جاڭاوزەن! ەندى، مىنە، شەتتەگى بەس ميلليون قازاق تۋرالى!

ۇلت تاعدىرى بۇگىنگىدەي تىعىرىققا تىرەلگەن تۇستا، قاي زاماندا دا، اقساقال مەن تۇلعانىڭ ورنى، اتقارار ءرولى بولەك! ونىڭ ۇستىنە، كىسى اتاققا، ابىرويعا، بيىك مانساپقا نە ءۇشىن ۇمتىلادى؟ ءوز ۇلتى ءۇشىن ادال قىزمەت ەتۋ ءۇشىن! «كوشى-قون زاڭىنا وزگەرتۋلەر مەن تولىقتىرۋلار ەنگىزىلەدى ەكەن، قازاقتارعا بەس جىلدان كەيىن ازاماتتىق بەرىلەدى ەكەن!» – دەگەن تىقىر تاياعان سوڭ، الاش جۇرتى ايانباي-اق ايتتى، جازدى. سونىڭ ىشىندە، كىم نە دەسە، و دەسىن، جاڭا سەناتور، قازاقستان جازۋشىلار وداعىنىڭ توراعاسى نۇرلان ءورازاليننىڭ ەڭبەگىن مەن ەرەكشە اتاپ وتكىم كەلەدى. ونىڭ ارىپتەستەرى قۋانىش ايتاحانوۆ پەن سۆەتلانا جالماعامبەتوۆانى دا. نۇرلان مىرقاسىمۇلى اقىن عوي، سۋىرىلىپ شىعىپ، زاڭ جوباسىن سەنتاتتان ءبىر قايتارۋداي – قايتاردى. امان بولسىن ەكى اعا مەن سۆەتلانا اپايىم!

ال، مەن ءوز باسىم ءومىرى اتتان تۇسپەگەن، اقوردانىڭ ماڭايىنان قاشاندا الىستاماعان، ىستىق-سۋىقتى باسىنان كوپ وتكەرگەن، قازاقتىڭ ارعى-بەرگى تاريحى مەن قيلى تاعدىرىن جاقسى بىلەتىن، ەسكى-جاڭا ەكى جۇيەنىڭ دە سىنىنان قاسقايعان بويى سۇرىنبەي وتكەن، شەتىنەن تايپالعان شەشەن، ءسىزدىڭ ەڭ سەنىمدى سەرىگىڭىزگە اينالعان قازاقتىڭ ارداقتى ءۇش ازاماتىنا قاتتى ءۇمىت ارتتىم. مەنىڭ اينالامداعى پىكىرلەستەرىم دە وسى ءۇش تۇلعاعا قاراپ جاۋتاڭدادى دا وتىردى. كۇندەلىكتى شىعاتىن «ەگەمەن قازاقستان» گازەتىن پاراقتاۋمەن، تەلە ارنالارعا تەلمىرۋمەن بولدىق، ءسىزدىڭ قولىڭىز قويىلعانشا...

سونىڭ ءبىرىنشىسى، ءسىزدىڭ جاقسى اعاڭىز، الدىڭىزدا، جينالىستارىڭىزدا كوپ بولاتىن، ابىز اقساقال مىرزاتاي جولداسبەكوۆ. «ساعىنىپ سالەم جازدىم مىرزاتايعا، بالاسىڭ سوزگە شەشەن، ءتىلىڭ مايدا!»دەپ كەمەڭگەر كەنەن ازىرباەۆتىڭ كوزى تۇسكەن عالىم مىرزاتاي جولداسبەكوۆ!

«وتىرمىن كوڭىلىم جايلانىپ،

بەكىندىم وسى ويعا انىق:

بۇگىنگى تاڭدا استانا،

بارادى مىرزاتايلانىپ!» (م.جولداسبەكوۆ، «كۇندەرىمنىڭ كۋاسى» كىتابى)! دەپ، اس ۇستىندە وتىرىپ مايلىق قاعازعا (سالفەتكاگە) جازىپ بەرە سالعان ولەڭى ءۇشىن قايرات جۇماعاليەۆكە شاپان كيگىزگەن اتىمتاي جومارت مىرزاتاي جولداسبەكوۆ. ونىڭ ۇستىنە، 1992 جىلى اشىلعان الەم قازاقتارىنىڭ العاشقى قۇرىلتايىندا دۇنيەجۇزى قازاقتارى قاۋىمداستىعىنىڭ توراعاسى ەتىپ سايلاۋ تۋرالى ۇسىنىس ءبىراۋىزدان قابىلدانىپ، ءسىز تورالقا توراعاسى بولعاندا، وسى مىرزاتاي جولداسبەكوۆ تورالقا مۇشەلىگىنە بەكىتىلگەن ءۇش ادامنىڭ (قالعان ەكەۋى دالەلحان جانالتاي پەن التىنبەك سارسەنباەۆ) بىرەۋى بولاتىن. سوندىقتان، شەتتەگى قازاق ماسەلەسى تاريحتا، قانشا جەردەن قاشقانىمەن، مىرزاكەڭە ءبىر سوقپاي، اينالىپ وتە المايدى.

مەن ء«اي، نۇرسۇلتان قاراعىم، مىناۋ ەل شۋلاپ جاتىر. شەتتەگى قازاقتار سەن ەكەۋمىزگە بوتەن ەمەس، انا ءوزىمىزدىڭ ەكى اپەكەمىز بار ەمەس پە، دومالاق انادان تۋعان – كۇنبيكە مەن نۇربيكە دەگەن. سولاردىڭ تۇقىمى عوي، بايدىبەك بابامنىڭ ارۋاعى بار ەمەس پە؟!!» دەپ مىرزەكەڭ كەنەن اتام ايتقان مايدا تىلىمەن مايدالاپ وتىرىپ جەتكىزەدى دەپ ويلادىم!

ەكىنشىسى قۋانىش سۇلتانوۆ! بۇل كىسىگە دە ايتار جوق! قازىر داۋرەنى دۇرىلدەپ تۇر. سىزدەن كەيىنگى ەكىنشى ءسوز وسى قۋانىش اقساقالدا. تەلە ارنانىڭ بەتىنەن تۇسپەيتىن بولدى. وتە-موتە بيىلعى تاۋەلسىزدىك مەرەكەسى قارساڭىندا بازارى قاتتى ءجۇردى. «ۇلت، مەملەكەت، نازارباەۆ!» دەگەندە تاڭدايى تاقىلداپ، اسقاقتاپ، ەكپىندەتىپ سويلەۋمەن بولدى. بۇل دا بوتەنىم ەمەس، جارقىشاقتان تۋعان، ءتىپتى جاقىن ناعاشىم مەنىڭ. اۋىلىمىز ارالاس، قويىمىز قورالاس جاتقان ەلمىز. سۋاننىڭ تەڭ جارىمى تەلمىرىپ، وسى كىسىنىڭ ەسكى ءۇيىنىڭ ىرگەسىندە وتىر. بۇكىل قازاق، ودان قالابەردى قىزاي ءۇشىن دەمەي-اق قويايىن، سول ءوز تۋىستارى ءۇشىن بولسا دا، نۇرەكە، سىزگە كىرىپ، ءبىر اۋىز ءسوز ايتۋى، ەجەلگى ادەتىمەن ەڭىرەپ تۇرىپ جىلاۋى كەرەك قوي قۋانىش بولعان ادام!..

ءۇشىنشىسى، باس گازەتتىڭ باسىندا وتىرعان ساۋىتبەك ءابدراحمانوۆ. سىزدەن سۇحبات الۋعا ءجيى كىرىپ-شىعىپ جۇرەدى دەپ ويلايمىن ونى. نەگىزى، بۇل ماسەلەنى الدىمەن كوتەرەتىن، سىزگە جەتكىزەتىن وسى اقساقال باسقاراتىن – «ەگەمەن قازاقستان». بەكەر وبالىم نە، ساۋىتبەك مىرزاعا «egemenkz@mail.online.kz» ارقىلى (22 قاراشا، 2013 جىل) ولەڭمەن جازىلعان ءۇش تىلەگىمدى جىبەرىپ، سىزگە جەتكىزۋىن ءوتىندىم. سوسىن، وزىمشە، ساۋىتبەك ءبىراز اقساقالداردىڭ باسىن قوسىپ، ءبىر مالىمدەمە جاسايدى، نە ءوزى ءبىر ماقالا جازادى دەپ ءجۇرمىن عوي مەن بايقۇس!

كوپ وتپەي، ەربول شايمەردەنوۆتىڭ اسىندا، ۇلتتىق كىتاپحاناداعى «بابالار ءسوزىنىڭ» تۇساۋكەسەرىندە ادەيى بارىپ، وسى جايلى بىردەمە ايتا ما دەپ، ساۋىتبەككە سالەم دە بەردىم. بەيباقتىڭ بەتى بۇلك ەتكەن جوق!

ءتىپتى، وسى كىسىلەر وسى كوش تاقىرىبىنا جولاڭقىراماي جۇرگەن سوڭ، الدىن-الا قامشىلاپ تا كورگەم. اسسامبليانىڭ مەرەكەلىك جينالىسىندا دۋلات يسابەكوۆ اعا ماڭعوليا قازاقتارى تۋرالى ماسەلە كوتەرگەن سوڭ، مەن «ءشارىپحان قايسار» دەگەن اتپەن «دۋلات اعانىڭ اينالاسىندا كىمدەر وتىر؟!» (http://old.abai.kz/node/34756) دەگەن ماقالا جازدىم. جاقىندا عانا «قازاق ماسەلەسىندە قالعىپ جۇرگەن “ەگەمەن قازاقستان”» اتتى ماقالام دا (http://old.abai.kz/node/41040) باق-تا جاريالاندى. سوندا وسى ءۇش اعامنىڭ اتىن ەرەكشە اتاپ، شەتتەگى قازاقتاردى ەسىنەن كەتپەستەي-اق ەتىپ جازىپ ەم. جوق، ەستىسە دە، ەستىمەسكە; وقىسا دا، وقىماسقا سالىندى. «بايدىبەك پەن دومالاق انا دەسەم تىم اۋىرلاپ، تۇقىم-تۇياقتارىنا دەيىن وڭباي كەتەر، بەرگى اپايلارى قىزاي انامنىڭ ارۋاعى اتسىن سەندەردى!» دەمەسكە ەندى مەنىڭ ەش امالىم جوق بۇل ۇشەۋگە!

اشىعىن ايتپاسام، اتالعان بابالارىمنىڭ قاسيەتى مەنى دە وڭدىرمايدى، نۇرسۇلتان اعا! مەن حالىققا توپىراق شاشۋدان اۋلاقپىن، تۋرا ءسىز سەنىپ جۇرگەن وسى ءۇش سابازدىڭ ۇشەۋى دە ءسىزدىڭ №1 جاۋلارىڭىز! تۇمانباي اعامنىڭ ءسىزدى جاقسى كورەتىنىندەي، مەنىڭ تۇماعام دەسە، ولەتىنىمدەي قازاققا، سىزگە دەگەن مەيىرىمدى مەن بۇلاردان كورىپ تۇرعام جوق. بولسا، مۇمكىندىك دەگەن قولدارىندا تۇر، ەڭ قۇرسا، بىرەۋى سۋىرىلىپ شىعىپ، ايتپاي ما سىزگە، قازاق كوشىنىڭ قيىن جاعدايىن؟! ءسىز دە ەت جۇرەكتى پەندەسىز، ويلانىپ، باسقاشا شەشىم قابىلداۋىڭىز مۇندا تۇرعان اڭگىمە! ءسىز قۇرعان قازاقستاندى بۇل «ۇشتىك» باياعى كەڭەس وداعى سەكىلدى سانايدى. نۇرسۇلتان نازارباەۆ – ولار ءۇشىن جان العىش ستالين! وزدەرىنشە سولاي جاساپ العان. كەڭەس وداعى كەزىندە، ءوزىڭىز بىلەسىز، «اشىق ايتىلاتىن» جانە «اشىق ايتۋعا بولمايتىن» ەكى ءتۇرلى ءسوز بولىپتى عوي. قىتايدا دا سولاي. مىرزەكەڭدەر ءۇشىن كازىر «شەتتەگى قازاقتار كەلسىن!» – سول «اشىق ايتۋعا بولمايتىنداردىڭ» قاتارىندا، قارا ءتىزىمنىڭ باسىندا تۇرعان ءسوز؟! سوندىقتان، باسىمىز بالەگە قالادى دەپ قورقادى، تۇك جولامايدى. وتە-موتە ساۋىتبەك! قۋانىش تا ودان اسپاسا، كەم سوقپايدى! مىرزاتاي ءۇشىن قازاق كوشىنەن گورى، اسسامبليانىڭ جينالىسىندا لەكتسيا وقىعاننان اسقان باقىت جوق قازىر. «مىناۋ قازاق كوشىنىڭ توقتاۋى – 32-ءشى جىلعى قولدان جاسالعان اشتىقتان ءبىر كەمى جوق ۇلتقا جاسالعان قيانات بولدى-اۋ; ەرتەڭ نۇرەكەڭنىڭ بار ىستەگەن ەڭبەگىن بۇل شەشىمى جۋىپ-شايىپ كەتەدى-اۋ; بولاشاقتا ءسىزدىڭ ورنىڭىزدا جاڭا ۇرپاق وتىرادى، سوندا بيلىك باسىنا قىتايدىڭ دەن سياوپينى (http://old.abai.kz/node/21462) سەكىلدى ءبىر كەمەڭگەر شىعىپ، ءبارىن ءوز ورنىنا قويا السا جاقسى، ونىڭ بەتىن ارى قىلسىن، ءوزىمىز كورگەن كەشەگى حرۋشەۆ سەكىلدى ءبىر انتۇرعان كەلىپ، ءسىزدىڭ سۇيەگىڭىزدى كوردەن جۇلىپ الىپ تاستاسا نە بولامىز-اۋ؟؟!» دەگەن وي بۇلاردىڭ نانازارىنا دا كىرىپ شىقپايدى ەكەن عوي! «ماقتاۋ، ماقتاۋ جانە ماقتاۋ!»-دان باسقا تىرلىكتەرى بار ما ءوزى!؟

جانىم، نۇرسۇلتان اعا، ساداعاڭ كەتەيىن، «سەنبە جۇرتقا تۇرسا دا قانشا ماقتاپ!» دەگەن اباي ءسوزىن ەسىڭىزگە ءبىر الىپ، ءوزىڭىز ويلاڭىزشى! سىزدەن كەتىپ بارا جاتقان وسىناۋ ۇلكەن، ورنى تولماس ساياسي قاتەلىكتى كورە تۇرىپ، كورمەگەنسىگەن بۇلاردى جاۋ دەمەي، كورىڭىز كانە!؟

«ما́و تسزەدۋ́ن جولداستىڭ قاتەلىگى – ونىڭ ءوزىنىڭ دۇرىس نارسەلەرىنە ءوزى قايشىلىق ىستەگەندىگىندە» دەپتى سول دەن سياوپين («دەن سياوپين ماقالالارىنان تاڭدامالىلار» 432-بەت، ۇلتتار باسپاسى، بەجىڭ). نەگىزى، ءسىزدىڭ شەتتەگى قانداستارىڭىزدى اتاجۇرقا شاقىرۋىڭىز – ۇلى باستاما ەدى!

ءسىزدىڭ نامىسىڭىز – مەنىڭ، بۇكىل قازاقستاننىڭ نامىسى! شەتتەگى قازاق ماسەلەسىندە، قالاي دا ءسىز جاعىنان، ءسىز ەل باسقارىپ تۇرعان تۇستا كەمشىلىك كەتپەۋ كەرەك قوي!

ونى دا ايتا كەتەيىن، ەرتەڭ «بەزگراجداندىق» بەرىپ جاتساڭىز، سويلەۋ قۇقىعىم بولماي قالۋى مۇمكىن، سىزگە تىلەۋلەس ادام بۇل قازاقتا كوپ. ماسەلەسىن شەشسەڭىز، شەتتەگى بەس ميلليون قازاق تۇگەلىمەن ءسىزدىڭ قولداۋشىڭىز، بەرىك قورعانىڭىز. وعان مەنىڭ زارەدەي كۇمانىم جوق! بىراق، سولاردىڭ بارىنەن دەسى باسىم ءبىر تۇلعا بار. ول – جازۋشى مۇحتار ماعاۋين!!! سول قۇرداسىڭىزدى تىڭداڭىز، كوبىرەك دەن قويىڭىز ول كىسىنىڭ ايتقاندارىنا!!!

5. قوش! ءسىز، نۇرەكە، مەملەكەتتىڭ تىنىشتىعىن ءومىر بويى دارىپتەپ كەلە جاتقان باسشىسىز! قازاقستاننىڭ بەيبىتشىلىگى مەن ورنىقتىلىعىن ەڭ الدىمەن ساقتايتىن ءبىر توپ بولسا، ول – ورالماندار! وسى جولى بايقادىڭىز با، ءتورت جىل كەشىكتىرىلىپ ازاماتتىق بەرىلەتىن زاڭ جوباسىنا ءسىز قول قويعانىڭىزبەن، ولار قانشا شۋلاسا دا، تىنىش قالدى. نەگە؟! ءسىزدىڭ بەت-بەدەلىڭىزدى سىيلادى، «ەكى دۇنيەدەگى جالعىزى – قازاقستاننىڭ» (ەرمۇرات زەيىپحاننىڭ ءسوزى) ورنىقتىلىعىن ويلادى! ايتپەسە، ميلليون ورالمان وڭاي كۇش ەمەس، نۇراعا! جيىلىپ، اقوردانىڭ الدىنا ەرەۋىلگە شىعۋ، كراننىڭ باسىنا ورمەلەۋ، «نۇروتاننىڭ» الدىندا ءوزىن بەنزين شاشىپ ورتەۋ، توپ-توپ بولىپ اشتىق جاريالاۋ دەگەن ولاردىڭ قولدان سانگە كەلەتىن شارۋا!

مەن ومىرىمدە جالعىز رەت بەيبىت شەرۋگە قاتىناسىپپىن. بيىل كۇزدە استانادا وتكەن قازاق جەرىنە قۇلاعان «پروتونعا» قارسى. كوشى-قون ماسەلەسىن ايتامىز دەپ باردىق قوي باياعى. باسقا ەلدە بودان بولىپ، ۇلتىڭا تەڭدىك سۇراپ جۇرسەڭ ءبىر ءسارى، ءوزىڭنىڭ ازات ەلىڭدە وزەۋرەپ ايعايلاعان، ۇراندار جازىلعان پلاكات كوتەرىپ جۇرگەن ءبىر ىڭعايسىز، قورلىق ءىس ەكەن. مەنىڭ ۇعىمىمدا ءسىز قول قويعان ءار زاڭ، ءسىز قابىلداعان ءار قاۋلى قازاق جۇرەگىنە جايناتىپ، شىراق جاعۋى كەرەك! ءار وتباسى ونى اقسارباس اتاپ، تويلاۋى ءتيىس قوي! اناۋ باق-تاعى جازىلىپ جاتقان دۇنيەلەر – ءسىز بەرگەن ءباسپاسوز ەركىندىگى. ونىڭ ۇستىنە، مىناۋ شەتتەن كەلىپ جاتقان قازاقتار ەشتەڭەنى جاسىرماي، كۇلبىلتەلەمەي، اشىق ايتادى. وتانىنا دەگەن ادالدىقتىڭ، كۇيىنگەننىڭ بەلگىسى – ماقتاي بەرۋ ەمەس، ءولىپ كەتسە دە شىندىقتى ايتۋ!.. سولاي بولۋى كەرەك-تە! سوندىقتان، مەنىڭ وسىناۋ حاتىمدى وقىپ، شىنىمەن مەنىڭ بايدىبەك بابامنىڭ تۇقىمى، قازاق حالقىنىڭ باعىنا تۋعان نۇرسۇلتانى ەكەنىڭىز راس بولسا، ءالى دە رايىڭىزدان قايتىپ، شەتتەگى قازاقتاردىڭ شەرىن تارقاتادى دەپ سەنەم سىزگە!

شەتتەن كەلەتىن قازاقتار جۇمىسسىز قالىپ، قازاقستانعا ماسىل بولادى دەپ ەش ويلاماڭىز. مەنىڭ وسىنداعى جاقىن تانىستارىمنىڭ ءبارى جۇمىس ورىندى وزدەرى اشقان. جۇمىسسىز قالعىشى – مەن عانا. ورالمان اعايىندار مەملەكەتتەن جۇمىس سۇراۋ دەگەندى، ول جۇمىستى قايدان، كىم بەرەتىنىن اۋەلى بىلمەيدى دە. باباسىنىڭ ازات مەكەنىنە كەلەدى. بەرسە، باسپاناسىن بەرەدى. بەرمەسە، وعان دا وكپەلەپ جاتقان جوق، قاڭىراپ بوس قالعان اۋىلدان باسپانا ساتىپ الادى. سوسىن اكەلگەن ءوز قاراجاتىنا مال الىپ، ەلدىڭ جەرىن جالداپ، ونى جايادى. ءسويتىپ، كەرەك بولسا، جۇمىستى وزدەرى-اق قولدان جاسايدى. كازىر ەلىمىزدىڭ بار قالاسىنداعى ءدامحانالاردىڭ اسپازدارى سول ارعى بەتتەن ورالعان اعايىنداردىڭ بالالارى. شاشتاراز، سۇلۋلىق سالوندارىندا، ماشينا جۋاتىن جەرلەردە دە سولار ءورىپ ءجۇر. مونشاعا بارساڭ، بىلەكتى ءتۇرىپ الىپ، ارقاڭدى ىساتىندار – تاعى سولار. استانانىڭ كوشەسىن سىپىرىپ جۇرگەندەردىڭ قاتارىندا مەنىڭ جەرلەستەرىم از ەمەس. «باراحولكاداعى» ورتەنگەن تاۋاردىڭ ءبىرمۇنشاسى جانە سول شەگارا اتتاپ كەلگەن قازاقتاردىكى. اقىن ادالبەك ءاحمادي قۇرداسىمدىكى دە بار ەكەن، ورتەنە بەرسىن، باستان قۇلاق – ساداعا، ادالبەك! «سەلگە كەتكەن جامان، ءورتتىڭ ارتى جاقسى بولادى!» دەگەن ىرىم بار قازاقتا، ءالى بايىپ كەتەسىڭدەر. ولگەيدەن كەلگەندەر جاساعان ءۇي جيھازدارىنىڭ ساپاسى قانداي جاقسى، باعاسى قانداي ارزان؟! ۇلى جايلاۋلارعا مالىن سىيدىرا الماي سىزگە ارىزدى بۇرقىراتقانداردىڭ تۇگەلگە جۋىعى ءوز جيەندەرىڭىز، نۇرسۇلتان اعا. ءسىز مۇنداي ەڭبەكقور، ءتوزىمدى، وتانىنا ادال قازاقتى مەككەنى التى اينالساڭىز دا تاپپايسىز...

تۇسىنبەستىك، بايقاماي قالۋ دەگەن – ءومىر بولعان سوڭ، بولىپ تۇرادى. كەتكەن قاتەلىك ءۇشىن حالقىڭىزدان كەشىرىم سۇراي سالساڭىز، ءتىپتى جاقسى. وندا تۇرعان دانەڭە جوق. ەلدىڭ پرەزيدەنتى اي مەن كۇندەي سۇلۋ، يناباتتى، الەم تانىعان ايەلى تۇرىپ، باسقا قىزبەن ويناس جاساپ، ۇستالعانى ءۇشىن وتانداستارىنان كەشىرىم سۇرادى عوي اناۋ جىلى؟! وعان قاراعاندا، ءوز ۇلتىڭىزدىڭ تاعدىرى، ءوز قولىڭىزبەن قۇرعان جاڭا، ۇلى مەملەكەتىڭىزدىڭ بولاشاعى ءۇشىن ءبىر يىلە سالۋ – ءسىزدىڭ قولىڭىزدان كەلەدى. وعان مەنىڭ نۇراعامنىڭ اقىلى دا، بىلىگى دە قاپتال جەتەدى! ەگەر، قازاقتىڭ كوبەيىپ، ۇلتتىق مەملەكەتتىڭ سالتانات قۇرۋىنا سىرتتان ءبىر كۇشتەر كەدەرگى كەلتىرىپ وتىرسا، جاسىرماي ايتىڭىز، بۇكىل قازاق ءسىزدىڭ جولىڭىزدا ولەدى! الدىڭعى شەپتە مەن جۇرەم!!!

جوق، «ول زاڭ وزگەرمەيدى، وسى بەتى كەتەدى!» دەسەڭىز، ماعان ءتورت جىلعا تۇل ازاماتتىق (بەز گراجداندىق) بەرىڭىز، قۇرمەتتى نۇرەكە! الىستان كەلگەن اعايىندارىمدى ءتورت جىل بويى جاۋتاڭداتىپ قويىپ، كىلەڭ تەكتى تۇقىمنان تۋعان مەنىڭ كەردەڭدەپ جۇرۋگە ادامدىق تا، اقىندىق تا ارىم جىبەرمەيدى! مەن نە كورسەم دە سولارمەن بىرگە كورۋگە ءتيىسپىن. ويتكەنى، ولار ەلگە كەرەك بولماعانمەن، ماعان كەرەك! ەگەر، قۇسادان ءولىپ كەتسەم، تاعى ءسىزدىڭ سۇيەگىڭىزگە تاڭبا بولام!!!

ايتپاقشى، مەنى جەكە قابىلداۋىڭىزدى وتىنەم! مەن قازاقستان رەسپۋبليكاسىنىڭ ازاماتتىعىن الاردا، ارىزدى ءسىزدىڭ اتىڭىزعا جازعام. سوندىقتان، تولقۇجاتىم مەن جەكە باس كۋالىگىمدى كەرى وتكىزۋگە مۇرسات بەرىڭىز، قۇرمەتتى نۇرەكە!! سىزدەن جاۋاپ كۇتەم، مارتەبەلى نۇرسۇلتان ءابىشۇلى!

زور ءۇمىت، ۇلكەن قۇرمەتپەن، 

اقىن جيەنىڭىز

اۋىت مۇقيبەك

16 – 17.12.2013

استانا

سوڭى

«دات» گازەتى

0 پىكىر