ىستانبۇلداعى قازاقتار كوپ شوعىرلانعان زەيتىنبۇرنى اۋدانىندا اقىن، حالىقارالىق «الاش» ادەبي سىيلىعىنىڭ يەگەرى ەربول الشىنباي مەن ءداستۇرلى ءانشى، ايتىسكەر، قوبىزشى، سىبىزعىشى بوكەن جىگەر جەرگىلىكتى قازاقتارعا كونتسەرتتىك باعدارلاما ۇسىندى.

ىستانبۇلداعى «اق تەڭىز» مادەنيەت سارايىندا، قازاق-تۇرىك قوعامىنىڭ ۇيىمداستىرۋىمەن وتكەن ايتۋلى كەشكە زەيتىنبۇنى اۋدانىنىڭ اكىمى ادەم ۋسلۋ، اق پارتيانىڭ القا مۇشەسى قازاق قىزى راشيدا زەينەشقىزى يۋكسەل، قازاق-تۇرىك قوعامىنىڭ باسشىسى جالەل قاھارمان قاتىسىپ، ونەر يەلەرىنە العىسىن ايتىپ، گۇل شوقتارىن ۇسىندى.

ءوز كەزەگىندە زەيتىنبۇرنى اكىمى «قازاق پەن تۇركى حالىقتارىنىڭ اراسىندا وسىنداي مادەني، ساياسي بايلانىستار ورناپ، ەكى حالىقتى جاقىنداستىرىپ جاتقانىنا وڭ باعاسىن بەرىپ، ەكى جاس ونەر ادامىنا تابىستار تىلەدى».

شىعارماشىلىق كەشتە  ەربول الشىنباي الۋان تاقىرىپتاعى جىرلارىن وقىدى. ال، بوكەن جىگەر دومبىرامەن كۇمبىرلەتىپ قازاقتىڭ بىرنەشە حالىق اندەرىن ورىندادى. سونداي-اق، قوبىزبەن حالىق اندەرىن، جانە سىبىزعىنىڭ سازدى ۇنىمەن بىرنەشە كۇي تارتتى.

اتالعان كونتسەرتتىك باعدارلاماعا 200 دەن اساتام ونەر سۇيەر قاۋىممەن قاتار،  دۇنيە ءجۇزى قازاقتار قاۋىمداستىعىنىڭ تۇركياداعى وكىلى، حالىقارالاق «تۇركسوي» ۇيىمىنىڭ باس حاتشىسىنىڭ كەڭەسشىسى ەرجان ءۋايىس، قازاق دياسپوراسىنىڭ كورەنكتى وكىلى فازلى توپلى، مانيسا وبلىسى ساليحلىداعى قازاق قاۋىمداستىعىنىڭ توراعاسى التاي قاراقول، پاريجدەگى قازاق قاۋىمداستىعىنىڭ باسشىسى ابدىسامەت التاي (حاليفا التايدىڭ ۇلى), تاريحشى نۇرجان قوڭىرباي، قازاق كاسىپكەرى جۇماي قىدىر، شاڭىراق ورتالىعىنىڭ باسشىسى دانيار يمانباق، ابدۋللا گۇلەر، مۇرات تەمىز، نۇر ابدۋللا، زەيتىنبۇرى اۋدانى اكىمشىلىك باسشىسىنىڭ ورىنباسارى كۋرشەت بەكەروعلى، اۋداندىق ماسليحات مۇشەلەرى جانە تاعى باسقالار قاتىستى. كەش سوڭىندا كورەرمەن ەكى ونەرپازدى تاعى دا قولقالاپ، جىر وقىتىپ، ءان شىرقاتتى.

قازاقستاندىق ونەر شەبەرلەرىنىڭ كورسەتىلىمەن كەيىن ساحناعا ىستانبۇلداعى قازاق ءانشىسى، ونەرتانۋشى بەشىر كوسە بەكەجان، دومبىراشى سەدات سولاقۇلى، ەۋروپادا تۇراتىن قازاق باۋىرىمىز مۇستافا، كۇيشى ەلامان ارى قاراي ساحنادا حالىق اندەرىن ورىنداپ، قارا جورعا بيىنە حالىقتى بيلەتتى. جەرگىلىكتى حالىق بەشىر كوسەنىڭ اندەرىن جاقسى قارسى الىپ، دۋ قول شاپالاقتاپ وتىردى. بەشىر كوسەدە حالىقتىڭ قۇرمەت قوشەمەتىنە ارقالانىپ، بىرنەشە اندەردى بىرىنەن كەيىن، ءبىرىن ورىنداپ كەلگەن حالىققا جاقسى كوڭىل كۇي سىيلادى. وسىلايشا قازاقتىڭ حالىق اندەرى انادولى جەرىندە ءبىر شارىقتاپ حالىقتىڭ ىستىق ىقىلاسىنا بولەندى.

ەرجان ءۋايىس،

قازاقستاننىڭ ەڭبەك سىڭىرگەن قايراتكەرى

Abai.kz