ارمەنيا پرەمەر-ءمينيسترى پاشينيان 13 ماۋسىمدا «كەلەسى قيسىندى قادام ۇقشۇ-دان شىعۋ بولادى جانە ەل بيلىگى بۇل قادامدى قاشان جاساۋ كەرەكتىگىن شەشەدى»، - دەگەن ەدى. بۇل تۋرالى Mezgil.kz اقپاراتتىق پورتالى جازدى. 

ال ونىڭ الدىندا پاشينيان ارمەنيانىڭ ۇقشۇ-عا (ودكب) قاتىسۋىن توقتاتا تۇراتىنىن مالىمدەگەن بولاتىن.

ارمەنيا قاراباقتاعى سوعىستان كەيىن باتىس ەلدەرىمەن ىنتىماقتاستىقتى جانداندىردى. سوعىس قيمىلدارىنىڭ ناتيجەسىندە ازەربايجان قاراباق اۋماعىن تولىعىمەن ءوز باقىلاۋىنا الدى. سول كەزدە ارمەنيا ۇجىمدىق قاۋىپسىزدىك شارتى ۇيىمىنا (ۇقشۇ) جۇگىندى جانە «دەرەۋ كومەك، سونىڭ ىشىندە اسكەري كومەك كورسەتۋدى» سۇرادى. بىراق رەسەي ماڭىزدى ءرول اتقارىپ وتىرعان ۇقشۇ جاعدايدىڭ شيەلەنىسۋىنە «الاڭداۋشىلىق» ءبىلدىرىپ، ارمەنياعا «كوڭىل ايتۋ» مالىمدەمەسىمەن شەكتەلدى.

(سۋرەت: ەرا)

پاشينيان: قوش بول، ۇقشۇ! بىرەۋگە تاۋەلدى بولۋ – ءبىز ءۇشىن قاۋىپتى!

مىنە، وسىدان كەيىن ارمەنيا پرەمەر-ءمينيسترى نيكول پاشينيان ارمەنيا ۇقشۇ-دان شىعاتىنىن مالىمدەدى. ويتكەنى ەرەۆان ەلگە ناقتى قورعانىس كەرەك كەزدە كومەككە كەلمەگەن «سابىن كوپىرشىگىندەي وداققا» قكپەلى بولدى.

سونداي-اق، پاشينيان: «ۇقشۇ-عا مۇشە ەكى ەل ازەربايجانعا 2020 جىلى قاراباقتاعى جاۋىنگەرلىك ءىس-قيمىلداردى دايىنداۋعا كومەكتەستى»، - دەپ سويلەدى.

ارمەنيا تاراپىنان ايتىلىپ ءھام جاسالىم جاتقان ۇقشۇ-دان شىعۋ تۋرالى ريتوريكالارعا رەسەي باق-تارى، ونداعى ساياساتتانۋشىلار، ءتۇرلى دارەجەدەگى شەندىلەر بۇلقان-تالقان بولۋدا. قاراڭىز:

رەسەيلىك باق («قۇپيا ساياسات» تەلەگرام ارناسى): «ارمەنيا ۇقشۇ-دان شىقسا، رەسەي ارمەنيامەن اراداعى قارۋ-جاراق پەن اسكەري تەحنيكانى جەتكىزۋ جونىندەگى كەز كەلگەن كەلىسسوزدەردەن باس تارتا الادى. بۇل ەرەۆاننىڭ رەسەيگە قارسى بەلسەندىلىگىنە ماسكەۋدىڭ ەڭ پارمەندى جاۋابى بولماق.

ارمەنيا ەندى قارۋدى فرانتسيا، ۇلىبريتانيا، اقش جانە باسقا دا ۇجىمدىق باتىس ەلدەرىنەن، سولاردىڭ قالدىق تەمىر-تەرسەكتەرىن ساتىپ السىن»، - دەپ جازادى، ەرەۆانعا سەس كورسەتكەندەي مازمۇندا.

رەسەي قارۋ-جاراعىنا تاۋەلدىلىك جايلى، وسىعان دەيىن ارمەنيا قاۋىپسىزدىك كەڭەسىنىڭ حاتشىسى: «ءبىر قارۋ جەتكىزۋشىگە تولىعىمەن تاۋەلدى بولۋ – قاۋىپتى. رەسەيمەن اسكەري-تەحنيكالىق ىنتىماقتاستىق 96%-دان 10%-عا دەيىن تومەندەدى»، - دەگەن ەدى.

(سۋرەت: azertag.az)

گالۋزيننىڭ ويبايى: ارمەنيا ەاەو-دان دا شىعۋى مۇمكىن!

رەسەيدىڭ رەسمي بيلىگىنىڭ كوزقاراسىن رف ءسىم باسشىسىنىڭ ورىنباسارى ميحايل گالۋزينءنىڭ «كومسومولسكايا پراۆدا» گازەتىنە بەرگەن سۇحباتىنان اڭعارسا بولادى.

گالۋزين: «ارمەنيا بيلىگى اسكەري ارىپتەستىككە باسا نازار اۋدارا وتىرىپ، باتىسقا قايتا باعىتتاۋدى جەدەلدەتۋدە. ارمەنيانىڭ اقش پەن ناتو-نىڭ «قاعاز قولشاتىرىنا» ءوتۋى رەسەيمەن جانە ۇقشۇ شەڭبەرىندە بىرىڭعاي قورعانىس كەڭىستىگىن ساقتاۋعا مۇمكىندىك بەرمەيتىنى بەلگىلى»، - دەدى.

گالۋزين ءارى قاراي: «باتىس «ارمەنيانى ۋتيليتارلىق، رەسەي مەن وڭتۇستىك كاۆكازعا قارسى گيبريدتىك سوعىستىڭ ءبىر قۇرالى رەتىندە قاراستىرادى. ماقساتى تۇسىنىكتى. وڭىردە شيەلەنىستىڭ كەزەكتى وشاعىن قالىپتاستىرۋ. ول ءۇشىن ارميان «پلاتسدارمىن پايدالانباق.

اقش، ەو جانە ناتو وكىلدەرى ەرەۆاندى ماسكەۋمەن بارلىق بايلانىستاردى ۇزۋگە شاقىرادى. ارمەنيانى ەۋروسپەكتيۆامەن قىزىقتىرىپ، وزدەرى تاراپىنان بىزبەن ورتاق ينتەگراتسيالىق بىرلەستىكتەردەن شىعارۋعا ۇمتىلىپ وتىر. ەلىمىزدى سوڭعى جىلدارى ەكونوميكاسىنىڭ رەكوردتىق ءوسىمىن قامتاماسىز ەتەتىن تەتىكتەردەن باس تارتۋعا يتەرمەلەيتىنىن بولجاۋ قيىن ەمەس»، - دەدى رف ءسىم باسشىسىنىڭ ورىنباسارى.

گالۋزيننىڭ ايتۋىنشا: «ۋاقىت وتە كەلە باتىس پەن اقش ەرەۆاننان ەاەو-دان كەتۋدى تالاپ ەتەدى. ال ارمەنيا وداقتىڭ قالىپتاسىپ كەلە جاتقان ەنەرگيا رەسۋرستارىنىڭ بىرىڭعاي نارىعىنا قاتىسۋ مۇمكىندىگىن جوعالتادى».

ماسكەۋ: ارمەنيا ءۇشىن ۇقشۇ-عا پارمەندى بالاما جوق!

ءارى قاراي گالۋزين: «ەرەۆاننىڭ ۇقشۇ جۇمىسىنا تولىققاندى قاتىسۋى – وڭتۇستىك كاۆكازدا بەيبىتشىلىك پەن تۇراقتىلىقتى ساقتاۋ ىسىنە قىزمەت ەتىپ، ارميان حالقىنىڭ مۇددەسىنە جاۋاپ بەرەدى. ارميان بيلىگىن ۇيىمعا قاتىسۋدى «توقتاتۋعا» يتەرمەلەگەن باتىستىقتار نە ۋادە ەتسە دە، بۇگىندە ارمەنيانىڭ قاۋىپسىزدىگىن قامتاماسىز ەتۋ تەتىگى رەتىندە ۇقشۇ-داي پارمەندى بالاما جوق»، - دەپتى.

ەرەۆان: فرانتسيادا كوپ قارۋ، ۇقشۇ-دا جوق قارۋ!

رەسەي باق-تارى مەن ساياساتكەرلەرى ەرەۆاندى ۋىسىنان شىعارىپ الاردىڭ از-اق الدىندا جانتالاسىپ تۇرعاندا، ارمەنيا بيلىگى اسكەري ارىپتەستىك ماسەلەسىندە فرانتسيامەن بايلانىستارىن نىعايتا باستادى. ونىڭ دالەلى – ارمەنيا فرانتسيامەن «Caesar» دەيتىن فرانتسۋزدىڭ وزدىگىنەن جۇرەتىن ارتيللەريالىق قوندىرعىلارىن ساتىپ الۋعا كەلىسىمشارتقا قول قويدى. بۇل تۋرالى فرانتسيانىڭ قورعانىس ءمينيسترى سەباستيان لەكورنيۋ مالىمدەدى.

«ءبىز ارمەنيامەن قورعانىس قارىم-قاتىناستارىمىزدى نىعايتۋدى جالعاستىرۋدامىز. جاڭا ماڭىزدى كەزەڭ – «Caesar» زەڭبىرەكتەرىن ساتىپ الۋعا كەلىسىمشارتقا قول قويۋ»، - دەدى لەكورنيۋ.

پاريج 2023 جىلى ارمەنيانىڭ ازەربايجانمەن قارىم-قاتىناسى شيەلەنىسكەن كەزدە ەرەۆانعا اسكەري كومەك كورسەتە باستادى. ارميان ارمياسىنا ارنالعان بروندى اۆتوكولىكتەردىڭ ءبىرىنشى پارتياسى رەسپۋبليكاعا گرۋزيا ارقىلى جەتكىزىلدى.

2023 جىلدىڭ قازان ايىنىڭ سوڭىندا لەكورنيۋ پاريج ارمەنياعا «Ground Master 200» (GM200) ءۇش راديولوكاتسيالىق جۇيەسىن ساتۋعا نيەتتى ەكەنىن حابارلادى. سونداي-اق ول ەرەۆاننىڭ «Mistral» جىلجىمالى زەنيتتىك زىمىران كەشەندەرىن ءوندىرۋشى – «MBDA» كومپانياسىمەن ىنتىماقتاستىعىنىڭ باستالعانىن حابارلادى. بۇدان باسقا، لەكورنگە ارميان اسكەريلەرىن اۋە شابۋىلىنا قارسى قورعانىسقا ۇيرەتۋگە ۋادە بەردى.

بۇل رەتتە پاشينيان ارمەنيانىڭ باتىس ەلدەرىمەن، ونىڭ ىشىندە فرانتسيامەن جانە اقش-پەن ىنتىماقتاستىعى ەلدىڭ قاۋىپسىزدىك سالاسىنداعى باسقا سەرىكتەستەرىنە قارسى باعىتتالماعانىن، تەك ءبىر عانا ماقسات - كاۆكازدا بەيبىتشىلىك ورناتۋعا قىزمەت ەتەتىنىن اتاپ ءوتتى.

Abai.kz