ەلىمىزدىڭ ونەركاسىپ مينيسترلىگى ۋتيلالىمدى الىپ تاستاۋدى قابىلدامادى. بۇل تۋرالى الماتىداعى «Hyundai Trans Kazakhstan» زاۋىتىندا وتكەن قوعامدىق تىڭداۋدا قر ونەركاسىپ جانە قۇرىلىس مينيسترلىگىنىڭ وكىلى ادىلبەك بەكتىباەۆ ايتتى.

«پەتيتسياداعى ۋاجدەردى ەسكەرسەك، ولار شىندىققا جاناسپايدى. بۇعان قوسا، جوبانى قوعامدىق تىڭداۋ كەزىندە باسقا نەگىزدەمەلەر مەن فاكتىلەر ۇسىنىلعان جوق. سوندىقتان پەتيتسيانى قاناعاتتاندىرۋدان باس تارتۋ ۇسىنىلادى»، - دەدى ول.

بەكتىباەۆ اقىرعى شەشىمدى مينيستر قابىلدايتىنىن، بۇل جايىندا رەسمي حابار بولاتىنىن ايتتى. ول: «پەتيتسيا اۆتورلارى شەشىمگە شاعىمدانا الادى»، - دەدى.

مامىردا قازاقستاندا شەتەلدەن اكەلگەن كولىكتەرگە تولەنەتىن ۋتيليزاتسيا الىمىنا قارسى پەتيتسياعا قول قويعاندار 50 مىڭنان اسىپ، ۇكىمەت پەتيتسيانى قاراۋدى قولعا العان ەدى.

پەتيتسيا اۆتورلارى ۋتيليزاتسيا الىمى مەن العاشقى تىركەۋ جارناسىن تولىق الىپ تاستاۋ نەمەسە باعاسىن ءتۇسىرۋدى تالاپ ەتەدى.

الماتىداعى جيىنعا «ۋتيلالىمعا جول جوق» قوزعالىسىنان «قايتالاما مەتاللۋرگيا ونەركاسىپشىلەرىنىڭ رەسپۋبليكالىق وداعى» قاۋىمداستىعىنىڭ توراعاسى ۆلاديمير دۆورەتسكي عانا بارعان. تىڭداۋعا پەتيتسيا اۆتورلارىنىڭ ءبىرى، قوعام بەلسەندىسى سانجار بوقاەۆ پەن ونىڭ باسقا جاقتاستارى قاتىسپاعان.

Abai.kz