جەكە ادامدار عانا ەمەس، وتباسىلار، ۇلتتار، مەملەكەتتەر مەن يمپەريالار، ءتىپتى، ۇلى وركەنيەتتەر بۇل الەمدە تۇگەلدەي جوعالىپ جاتادى. باتىس ەلدەرىندەگى وتباسىنىڭ ءبۇلىنۋى مەن دەموگرافيالىق كريزيس، وسمان جانە ۇلى ريم ءتارىزدى يمپەريالاردىڭ، ادامزات تاريحىنداعى ءفاني ءومىردىڭ شىڭىنا جەتكەن لەمۋريلىق، اتلانتيدالىق وركەنيەتتەردىڭ جويىلىپ كەتۋلەرى وسىنىڭ كورىنىستەرى.

ولاردىڭ جويىلۋ سەبەپتەرى نەدە؟

رۋحاني تۇرعىدان قاراستىراتىن بولساق، ءفاني الەمدە قانداي كورىنىس بولسا دا، ولاردىڭ بارلىعى زاتتىق بولمىستىڭ وزىمشىلدىك (جالعان ەگو) قاسيەتىنەن تۋاتىنىن كورەمىز. ءوزىن زاتپەن بالاعان جاننان شىعاتىن وزىمشىلدىك قاسيەت ءفاني الەمنىڭ زاڭدىلىقتارىن تۋدىرىپ، ونىڭ نەگىزگى قوزعاۋشى كۇشى بولىپ تابىلادى. سونىمەن بىرگە، بولمىس بىرلىگىن بۇزاتىن نەگىزگى سەبەپ تە وسى وزىمشىلدىك بولىپ تابىلادى.

ءومىرىمىزدى دۇرىس ءتۇسىنۋ ءۇشىن ونى وسى تۇرعىدان قاراستىرىپ كورەلىك.

حاكىم اباي مەن ورىستىڭ ويشىل جازۋشىسى ل.ن.تولستوي ءومىردى اعىپ جاتقان سۋمەن تەڭەيدى. ادامزات قاۋىمىنداعى ءتۇرلى قوعام، قۇرىلىمداردى، سونىمەن بىرگە، ءاربىر جان يەسىن ماتەريالدىق الەمنىڭ وزەنىندە ءجۇزىپ جۇرگەن ءتۇرلى كەمەلەرمەن سالىستىرۋعا بولادى. جان يەلەرى قايىقتار بولسا، ال ءتۇرلى قۇرىلىمدار وزدەرىنىڭ مولشەرىنە بايلانىستى كەمەلەر، ءتىپتى ۇلكەن لاينەرلەردى قۇرايدى. قولدانۋ جاعدايىنا بايلانىستى سۋ بەتىندەگى بۇلاردىڭ ءومىرى ۇزاق، نە بولماسا قىسقا بولىپ، وزدەرىنىڭ بارار جەرىنە جەتە الماۋى مۇمكىن. ماتەريالدىق الەم وزگەرگىش، پايدا بولعان سوڭ قايتادان جويىلىپ، باسقا ءتۇر الاتىندىقتان، الەمنىڭ شەكسىز سۋىندا ءجۇزىپ جۇرگەن بۇلار دا ۋاقىتى كەلگەندە شەگىنە جەتىپ، ءوزىنىڭ ءومىرىن توقتاتىپ جاتادى. ونىڭ سەبەبى، ءومىردىڭ بىرلىگىنىڭ بۇزىلۋى. ادامداردىڭ اراسىندا الاۋىزدىق تۋىپ، بىرلىك بۇزىلعاندا قايىقتىڭ  ءجۇرىسى وزگەرىپ، باعىتىنان ايىرىلىپ، ءتىپتى قۇزعا قۇلاۋى دا مۇمكىن. سول سياقتى، قانداي قۇرىلىمنىڭ ءومىرىن ۇزارتۋ ءۇشىن دە بىرلىككە ۇمتىلىپ، ونى قولدانا ءبىلۋ كەرەك. ول ءۇشىن ءبىلىم كەرەك ەكەنى بەلگىلى. وزىمىزگە بەرىلگەن ءومىردى دۇرىس قولدانۋ ءۇشىن دە ونىڭ بىرلىگىن نىعايتا ءبىلۋىمىز كەرەك. اباي دا «ءبىرىڭدى، قازاق، ءبىرىڭ دوس كورمەسەڭ، ءىستىڭ ءبارى بوس» دەپ ەسكەرتۋ جاساعان.

ماتەريالدىق الەمدى ۋاقىت ىقپالىمەن اعىپ جاتقان وزەن رەتىندە قاراستىراتىن بولساق، ال رۋحاني الەم ونىڭ سىرتىندا جاتىر. ماتەريالدىق الەم وزگەرىپ وتىراتىن ۋاقىتشا جانە قاسىرەتكە تولى بولسا، ال رۋحاني الەم ماڭگىلىكتى جانە لاززاتقا تولى. ماتەريالدىق الەمدە جۇرگەن جان يەلەرىن اللا ءوزىنىڭ نۇرىمەن رۋحاني الەمگە تارتىپ، قىزىقتىرادى. اللانىڭ نۇرىمەن سەزىنىپ، ءبىز ءتۇپ يەگە ۇمتىلامىز. ءتۇپ يە ءبىزدىڭ نەگىزگى باعىتىمىز. دەنەمىز، جانە ونىمەن بايلانىسقان وتباسى، قوعام، ۇلت ءتارىزدى تاعى باسقا قورشاعان ورتانىڭ كورىنىستەرى ءومىر وزەنىندەگى بىزگە بەرىلگەن كەمە ەكەنىن تۇسىنەتىن بولساق وزىمىزگە بەرىلگەن بۇل زاتتىق بولمىسىمىزدى (ونىڭ كەمە ەكەنىن) ءتۇسىنىپ، دۇرىس پايدالانۋعا مۇمكىندىك تۋادى. ل.ن.تولستوي كورسەتكەندەي، سول كەمەمەن وزەننىڭ ەكىنشى جاعالاۋىنا ءبىز ءجۇزىپ ءوتۋىمىز كەرەك. وزەننىڭ بەتىندەگى تولقىندار ءناپسىنىڭ ىقپالىمەن ۇزدىكسىز سوققان ءتان قۇمارىنىڭ داۋىلىمەن پايدا بولعان ءومىردىڭ ءتۇرلى قۋانىشى مەن قايعىسى. بەيبەرەكەت تولقىندار ءبىزدى بىردە قۋانتىپ، بىردە قورقىتىپ، كەمەنى جان-جاققا شايقاپ، جوعارى-تومەن لاقتىرادى. ءومىر كورىنىسى دەگەنىمىز وسى.

يمان كەمەنى العا يتەرەتىن جەل. يماننان تۋعان ءۇمىت، العا قويىلعان ماقسات، بويعا بىتكەن  قايرات بەلگىلى ءبىر ناتيجە بەرەدى. كەمەنىڭ ءجۇزۋى جەلدىڭ قۋاتىنا بايلانىستى بولعاندىقتان، يمان كۇشەيگەن سايىن ءجۇزۋىمىز دە جىلدامداي تۇسەدى. بىراق دۇرىس باعىت بولماسا، كەمەمىز بولمىستىڭ رۋحاني جاعاسىنا ەمەس، ناتيجەسى باسقاشا بولىپ، قۇزعا اپارىپ قۇلاتۋى دا مۇمكىن.

كەمەمىزدىڭ ءجۇزۋ باعىتى جەلدىڭ باعىتىنا، ياعني يمانعا بايلانىستى.  ەگەر ءبىر جاراتۋشىعا سەنەتىن بولساق، وندا يمانىمىز كەمەمىزدى رۋحاني الەمگە باعىتتايدى، ال ءوزىمشىل بولىپ، تەك ءوزىمىزدى عانا ويلاپ، بىرلىكتى بۇزاتىن بولساق، وندا كەمەنىڭ باعىتى وزگەرىپ، ناداندىق پەن قاسىرەتكە، ياعني قۇزعا اپارىپ قۇلاتادى. ادەتتە بۇل ءفاني ءومىردىڭ كورىنىسى.

قازاق حالقى ءومىردىڭ نەشە ءتۇرلى تار سوقپاعى مەن تايعاق جولىندا ءبىر ءولىپ، ءبىر ءتىرىلدى ەمەس پە؟ بۇل شەكسىز الەمدە كەمەمىزدىڭ بەلگىلى ءبىر باعىتى بولماي، ماقساتسىز جۇزۋىنە كوپ ۋاقىت ءوتتى. بابالارىمىز عۇن، ساق، قىپشاق داۋىرىندە بۇكىل الەمنىڭ قوزعاۋشى كۇشى بولىپ، شىڭعىسحان مەملەكەتىنىڭ قۇرامىندا قانشا ەلدى اشسا الاقانىندا، جۇمسا جۇدىرىعىندا ۇستاپ، كەۋدەلەرى جوعارى بولدى. بىراق، سوڭعى ءۇش-ءتورت عاسىردىڭ ىشىندە جوڭعارلاردىڭ تەپكىسىن كورىپ، رەسەيدىڭ بودانىنا اينالىپ، كەڭەس ءداۋىرىنىڭ شىرماۋىنا ءتۇسىپ، كورگەن قاسىرەتى كوبەيدى. سول جاعدايىمىز بۇگىنگى كۇندەرگە دەيىن جالعاسىپ كەلەدى دەۋگە بولادى. رۋحاني تۇرعىدان قاراستىراتىن بولساق، ءفاني الەم دەگەنىمىز وسى. ونىڭ نە ەكەنىن تاعدىر وسىلاي كورسەتىپ وتىر.

كەمەمىز كەيدە باتىپ، كەيدە سۋدىڭ بەتىنە قايتا قالقىپ شىعىپ، بىزگە كوپتەگەن زارداپتار اكەلدى. باتقاندا سۋعا قاقالىپ، جالبارىنىپ اللادان كومەك سۇرايمىز، ال سۋدىڭ بەتىنە شىققاندا ۋاقىتشا تىنىشتىققا جاس بالاداي قۋانامىز.

بۇگىنگى كۇندەرىمىز سول تىنىشتىق ءداۋىردىڭ ءبىر كەزەڭى. عاسىرلار بويعى بوداندىقتان قۇتىلىپ، ەندى تاۋەلسىزدىك الىپ، بويىمىز كەڭىدى. عىلىمي-تەحنيكالىق وركەنيەتتىڭ ارقاسىندا تابيعاتتىق ىقپالىنان شىعىپ، جىلى ءۇي مەن مول تاماققا كەنەلدىك. تاعدىر بەرگەن جەر قويناۋىنىڭ بايلىعى مەن جەرىمىزدىڭ كەڭدىگى ەشبىر قيىندىقسىز ەركىن ءومىر سۇرۋگە مۇمكىندىك بەرەدى. رۋحاني جانە ماتەريالدىق قۇمارلىقتارىمىزدى تولىق قاناعاتتاندىرىپ، باقىتتى ءومىر سۇرۋگە بولاتىن داۋىرگە جەتتىك. ءتىپتى، ءومىرىمىز «كۇندە ويىن، كۇندە توي» دەگەندەي ۇزدىكسىز مەيرامعا اينالىپ كەتكەن ءتارىزدى.

وسى باقىتتى ءومىرىمىز ماڭگىلىكتى مە؟ ەندى وسى سۇراقتىڭ توڭىرەگىنە كەلەيىك.

ءومىردىڭ كوكجيەگىندە اللا نۇر شاشىپ، ءبىزدى وزىنە شاقىرىپ، باعىت بەرىپ تۇرعانداي. بۇگىنگى بەيبىت ءومىرىمىز سول نۇردىڭ شاپاعاتى. بىراق بۇل نۇردى سەزىنە الماي، ونى دۇرىس تۇسىنبەي، ءبىز ويىن ساۋىققا بەرىلىپ كەتتىك. دۇرىس پايدالانا الماي ءجۇرمىز. ارنەنىڭ ءوزىنىڭ مولشەرى مەن سۇراۋى بولادى. سوندىقتان بۇل باقىتتى ءومىردىڭ دە كەزەگى مەن سۇراۋى بار. ەگەر كەمەمىزدى اللانىڭ نۇرىنا باعىتتاپ، رۋحاني قۋات الماساق، ءومىر تولقىنىنداعى ساۋىق قۇرىپ جۇرگەن كەمەمىز سۋعا قايتادان باتىپ كەتۋى مۇمكىن. تولقىننىڭ الماسۋى تابيعي زاڭدىلىق. تاعدىردىڭ قىسپاعىنا قايتادان ءتۇسىپ قالماۋ ءۇشىن دەر كەزىندە ەسىمىزدى جيىپ، جۇرەك كوزىن اشىپ، كەمەمىزدى نىعايتۋ كەرەك. الەم تولقىنىنداعى ءجۇزۋدىڭ ءمانى ءوزىمىزدىڭ ءتانىمىزدى قاناعاتتاندىرۋ ءۇشىن ەمەس، ودان دا جوعارى ماقسات بار ەكەنىن ءتۇسىنۋ كەرەك. ول ماقسات بىرلىگىمىزدى نىعايتۋ بولسا كەرەك. وعان  ۇلى اباي بابامىز كورسەتكەندەي «جۇرەكتىڭ كوزى اشىلسا، حاقتىقتىڭ تۇسەر ساۋلەسى. ىشتەگى كىردى قاشىرسا، ادامنىڭ حيكمەت كەۋدەسى» ارقىلى عانا جەتۋگە بولادى. ىنتامىزدى ءوزىمىزدى قۇتقاراتىن اللا تاعالانىڭ نۇرىنا بۇرۋىمىز كەرەك. سوندا عانا وزىمشىلدىكتەن ارىلىپ، «ادامزاتتىڭ ءبارىن ءسۇي» (اباي) دەڭگەيىنە ۇمتىلىپ، بۇل ءفاني الەمنىڭ قىسپاعىنان شىعا الامىز. ءۇمىت پەن ىنتا-جىگەر پايدا بولىپ، جەتىلۋدىڭ جارقىن جولىنا تۇسۋگە بولادى. بىراق، بۇل جولعا ءتۇسۋ ءۇشىن، اۋەلى كوپتەگەن نارسەلەرگە يە بولۋ كەرەك.

ءتان قۇمارىنان شىعاتىن وزىمشىلدىك دارەجەسىنە بايلانىستى ءومىر تولقىندارىنىڭ اسەرى ءارتۇرلى بولادى. ءومىردىڭ قانداي وزگەرىسى بولسا دا، وزىمشىلدىككە بەرىلمەي، ونى سابىرمەن دۇرىس قابىلداي ءبىلىپ، قياناتسىز، كوپشىلىكتىڭ بىرلىگىنە باعىتتاۋ كەرەك. مۇنداي قاسيەت ءوزىمىزدىڭ اقىل-ەسىمىزدى، مىنەز-قۇلقىمىزدى، ياعني دەنە-كەمەمىزدى دۇرىس پايدالانا ءبىلۋىمىزدى كەرەك ەتەدى.

ءومىر تولقىندارىنا قارسى تۇرا الماساق، تىرشىلىك  شىرعالاڭدارى جەتىلۋ بارىسىمىز مۇلدە توقتاپ، ءتىپتى، كەيىن كەتۋىمىز دە مۇمكىن. ءومىر تولقىندارىن دۇرىس پايدالانۋ ءۇشىن ولاردىڭ پايدا بولۋ سەبەپتەرى مەن ءمانىن ءبىلۋ كەرەك. بۇل فيزيكا، حيميا، استرونوميا ءتارىزدى فيزيكالىق الەمدى زەرتتەيتىن، پسيحولوگيا، پاراپسيحولوگيا، گيپنوز، سپيريتۋاليز ءتارىزدى نازىك الەمدەردى زەرتتەيتىن  بولمىستىڭ ماتەريالدىق بولىگىنە كوڭىل ءبولۋ كەرەك دەگەن ءسوز.

ءفاني الەم ومىردەن ساباق الىپ، جۇرەگىمىزدى تازارتۋ ءۇشىن اللانىڭ بىزگە بەرگەن شەكسىز مەيىرىمدىلىگى ەكەنىن ەستەن شىعارماۋ كەرەك. بۇل مەيىرىمدىلىكتى دۇرىس تۇسىنبەي، دۇرىس قابىلداي الماساق، بىرلىگىمىزدى نىعايتۋ قيىنعا سوعادى. ءومىر كورىنىستەرى بىزگە ولاردى قابىلداۋىمىزعا بايلانىستى جاقسى، نەمەسە جامان بولىپ كورىنەدى. سانامىزدى ءوسىرىپ، رۋحاني تۇرعىدان قابىلداساق، ءومىردىڭ ءاربىر تولقىنى ءبىز ءۇشىن ۇلكەن ساباق بولىپ، ونى ءوز پايدامىزعا اينالدىرا الامىز. بۇل قۇدايدى تانۋ، ءوزىمىزدى تانۋ ارقىلى بولمىستىڭ رۋحاني بولىگىن مەڭگەرۋ دەگەن ءسوز. وسىلاي ماتەريالدىق جانە رۋحاني ءبىلىمدى بىرىكتىرىپ، بولمىستى تولىق تانۋعا بولادى.

كەمەمىزدىڭ دۇرىس ءجۇزۋى ءۇشىن اللا تاعالا پايعامبارلاردى، رۋحاني ۇستازداردى، حاكىم-اۋليەلەردى جانە باسقا دا رۋحاني ۇستازداردى كاپيتان رەتىندە جىبەرەدى. وسىلاي حالقىمىز مۇحاممەد (س.ع.س.) پايعامبار ارقىلى يسلام ءدىنىن قابىلداپ، تاعدىر اباي مەن شاكىرىم، احمەت ياساۋي، ءال-فارابي ءتارىزدى عۇلامالاردى جىبەردى. بۇل كاپيتاندار كەمەنى جاقسى بىلەتىن، ءجۇزۋدىڭ دۇرىس باعىتىن كورسەتەتىن تاجىريبەلى جۇزۋشىلەر. كەمەنى دۇرىس باسقارىپ، جاقسى جۇزدىرە الاتىنىنا تولىق سەنەتىن بولساق، ءبىز الدىمىزداعى كوپتەگەن قيىنشىلىقتاردان قۇتىلا الامىز. ولاردىڭ بەرگەن ءتالىمى، رۋحاني ەڭبەكتەرى كەمەنىڭ دۇرىس باعىتىن كورسەتىپ، ەركىن العا جىلجۋعا مۇمكىندىك بەرەتىن كومپاس ءتارىزدى.

رۋحاني ۇستازداردىڭ كومەگىمەن دەنە-كەمەمىزگە ىشكى جانە سىرتقى تازالىقتىڭ كەرەگىن ءبىلىپ، ۇنەمى كۇتىپ، مەزگىلىمەن جوندەۋدەن وتكىزىپ وتىرامىز. وسىلاي بۇگىنگى قۇلدىراعان مەديتسينا، ءبىلىم بەرۋ جۇيەلەرىن قالپىنا كەلتىرۋگە مۇمكىندىك تۋادى. رۋحاني ۇستازدارعا دەگەن سەنىم مەن يمان سوققان جەل ءتارىزدى ءبىزدى اڭساعان ارمانىمىزعا قاراي جۇزدىرەدى، جانە جەل كۇشەيگەن سايىن ءجۇزۋ جىلدامدىعىمىز دا ارتا تۇسەدى. كەرەك- جاراعىمىز تۇگەل بولعاندا كەمەنىڭ جەلكەنىن تولىعىمەن اشىپ، نىسانامىزعا قاراي بارىنشا ۇمتىلۋعا بولادى. بۇل الدىڭعى شەپتەگى ەلدەر قاتارىنا جەتۋگە مۇمكىندىك بەرەدى. ال تۇپكى نىسانا – ءومىر وزەنىنىڭ سىرتىنداعى ماڭگىلىكتى جانە شەكسىز ءلاززات پەن ساناعا تولى رۋحاني الەم.

بىراق، كەمەدە ءتان قۇمارى تۋدىرعان وزىمشىلدىك ادامداردىڭ اراسىندا ءجيى الاۋىزدىقتار تۋدىرىپ وتىرادى. جولاۋشىلار وتباسى، حالىق، مەملەكەت، ءدىن ءتارىزدى ءتۇرلى بولىكتەرگە ءبولىنىپ، وزەرىنىڭ مەنمەندىك سەزىمدەرىنە بوي بەرەدى. بولىكتەردىڭ ارقايسىسى وزدەرىن جانە كەمەدەگى ءرولىن باسقالاردان جوعارى قويىپ، باسىمدىلىق كورسەتكىسى كەلەدى. ورتاق ماقسات ۇمىتىلىپ، بولىكتەردىڭ اراسىندا الاۋىزدىق تۋادى.

وسىلاي بۇگىنگى كۇندەرى يسلامشىلار مەن تاڭىرشىلەردىڭ اراسىندا قايشىلىق ۇدەپ، ولار ەندى ءبىرىن ءبىرى تۇسىنۋدەن قالدى. ماقساتتارى – حالىقتىڭ بىرلىگىن ويلاپ، قارسىلاسىن ءتۇسىنىپ، ءبىر ىمىراعا كەلۋ ەمەس، تەك قانا وزدەرىنىڭ مەنمەندىگىنەن شىعاتىن  جەكە مۇددەسىن قورعاپ، قارسىلاسىن جەڭۋ. مۇنداي جول وشپەندىلىكتى كۇشەيتىپ، ەشۋاقىتتا كەلىسىمگە اكەلمەيدى. وسىلاي بۇل ەكى اعىم تۇتاس حالىقتى ەكىگە ءبولىپ، ماڭگىلىكتى جاۋلاستىرىپ جىبەرۋى مۇمكىن.

وسى 2024 جىلعى مامىر ايىندا تاڭىرشىلدىكتى ءدىن رەتىندە تىركەۋگە پەتيتسيا جاريالاندى. بۇل پەتيتسيانى قولداۋشىلار سانى دا كوبەيىپ بارادى.  ەگەر پەتيتسيا قابىلدانىپ، تاڭىرشىلدىك ءدىن رەتىندە قابىلداناتىن بولسا، وندا قازاق حالقى ەكىگە بولىنەتىن بولادى. سان جاعىنان العاندا ۇلكەن جەرگە يە بولىپ وتىرعان ازعانا حالىق ءوزىنىڭ بىرلىگىنەن ايىرىلىپ، ۇلكەن قۇزعىنداردىڭ جەمتىگىنە اينالۋى وڭايلانادى.

وسىنداي جاعدايدى تۇسىنگەن قىرعىز ەلى مۇنداي قۇبىلىسقا جول بەرمەي، تاڭىرشىلدىك تۋرالى ۇسىنىستى قابىلداماي تاستادى. ءبىزدىڭ ەلدە دە حالىقتى ەكىگە بولۋگە جول بەرىلمەۋ كەرەك. سوندىقتان، جاريالانعان پەتيتسيانى قابىلداۋعا بولمايدى! مۇنداي پەتيتسيانى قابىلداۋ كەلەشەكتە قازاق حالقى ءۇشىن ولىممەن تەڭ دەسەك ارتىق بولمايدى.

ورتا ازياداعى ەلدەردىڭ اراسىندا تاڭىرشىلدىكتىڭ وسىنداي باس كوتەرۋ سەبەبى تەك قانا قازاقستان مەن قىرعىزستاندا عانا بايقالادى. سەبەبى، بۇلار وتىرىقشىلىققا كوشكەن سوڭعى ەلدەر بولعاندىقتان، تاڭىرشىلدىك جاقسى ساقتالعان. بىراق، ونى عاسىرلار بويى قالىپتاسقان يسلامعا قارسى قويۋعا بولمايدى.

ءدىني اعىمداردىڭ ءبىر حالىقتى ءتۇرلى بولىكتەرگە بولگەن مىسالدار تاريح قويناۋىندا بارشىلىق. اۋەلدە ءبىر ەل بولىپ  وتىرعان بەنگال حالقى بۇگىنگى كۇندەرى بىرلىگى بۇزىىلىپ، باتىس بەنگاليا جانە بانگلادەش بولىپ ەكى مەملەكەتكە ايىرىلىپ كەتتى. تۇتاس ينديا ەلى پاكيستان جانە ينديا مەملەكەتى بولىپ ءبولىندى. يۋگوسلاۆيا دا ىدىراپ، بىرنەشە ۇساق مەملەكەتكە اينالدى. ايتا بەرسە، ءدىني اعىمداردىڭ اسەرىنەن پايدا بولعان مۇنداي مىسالدار ادامزات تاريحىندا جەتكىلىكتى. ولاردىڭ وسىلاي ءبولىنىپ، تۇتاستىعىن جويىپ الۋ سەبەبى بىرەۋ عانا. ول سەبەپ -- ءومىردىڭ تۇپكى ماقساتىن ۇمىتىپ، وزىمشىلدىكپەن الاۋىزدىق تۋدىرىپ، ەل بىرلىگىنەن ايرىلىپ قالۋ. بۇل ەلدەر ءتان قۇمارى تۋدىرعان وزدەرىنىڭ مەنمەندىگىنە يە بولا الماي، ءتۇرلى ءدىني اعىمداردىڭ ىقپالىمەن بولمىس ۇيلەسىمدىگىن بۇزىپ، ورتاق كەمەلەرىن دۇرىس پايدالانا الماي، ءبۇلدىردى. وسىلاي ءبولىنىپ كەتتى. بىرلىكتەن ايىرىلۋ ادامزاتتىڭ دامۋ قارقىنىن تەجەيدى. سوندىقتان، بۇگىنگى تەز وزگەرگىش اۋمالى-توكپەلى زاماندا بۇكىل الەمدى قۇتقارۋ ءۇشىن ورتاق مۇددەنى ۇمىتپاي، حالقىمىزدىڭ عانا ەمەس، بۇكىل ادامزات كەمەسىنە دۇرىس باعىت بەرۋ كەرەك بولىپ وتىر.

ەلىمىزدەگى ەكى اعىمنىڭ اراسىنداعى الاۋىزدىق تا ادامداردىڭ اراسىندا ىرىتكى سالىپ، ەل بىرلىگىنە ۇلكەن قاتەر تۋدىراتىن قۇبىلىستاردىڭ ءبىرى. ودان قۇتىلۋ ءۇشىن جۇرەك كوزىن اشىپ، بولمىس بىرلىگىنە ۇمتىلۋ كەرەك.

دوسىم وماروۆ،

ابايتانۋشى، تەولوگ

Abai.kz