جىلىتۋ ماۋسىمى جاقىنداپ كەلەدى، قازاقستان بىلتىر اپاتتاردان كوز اشپادى. قاقاعان سۋىقتا جىلۋ بەرەتىن ورتالىقتار ىستەن شىقتى.

جىل سايىن ۇكىمەت «ءتيىستى جۇمىستار اتقارىلىپ جاتىر» دەپ ەسەپ بەرەدى. بىراق، جىل سايىن كورەتىنىمىز ءبىر كارتينا.

مەملەكەت باسشىسى قاسىم-جومارت توقاەۆتىڭ 2023 جىلعى 1 قىركۇيەكتەگى «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىندا: «وتكەن قىستا ەلىمىزدىڭ جىلۋ ەلەكتر ستانتسيالارىندا قايتا-قايتا اپات بولدى. بۇل جاعداي جىلدار بويى شەشىلمەگەن ماسەلەنىڭ بەتىن اشىپ بەردى. ينفراقۇرىلىمنىڭ ابدەن توزۋى حالىقتىڭ تۇرمىس ساپاسىنا تىكەلەي اسەر ەتەدى. يندۋستريالاندىرۋ قارقىنىن دا تەجەيدى. ياعني، ينفراقۇرىلىمدى جاڭعىرتپاساق، جاڭا ەكونوميكالىق ۇلگىگە كوشۋ مۇمكىن ەمەس. ۇكىمەت جاڭا ينفراقۇرىلىمدىق جوسپاردا وسى سالاداعى بارلىق تۇيتكىلدى اشىق كورسەتىپ، ونى شەشۋ جولدارىن انىقتاۋعا ءتيىس»،- دەگەن ەدى.

بيىل ۇكىمەت ءتيىستى جۇمىستاردىڭ اتقارىلىپ جاتقانىن ايتۋدا. سونىمەن، ۇكىمەت ەسەبىنە كوز جۇگىرتەيىك:

1. 2023 جىلدىڭ باسىندا ۇكىمەتتىڭ باستاماسىمەن جىلۋمەن جابدىقتاۋ جۇيەلەرىن دامىتۋعا نىسانالى ترانسفەرتتەر ءبولۋ جونىندەگى بيۋدجەتتىك باعدارلاما ىسكە قوسىلدى.

2. اتالعان باعدارلاما اياسىندا 114 شاقىرىم جىلۋمەن جابدىقتاۋ جەلىلەرىن جاڭعىرتۋعا 77,4 ملرد تەڭگە ءبولدى.

3. سونىمەن قاتار، ينفراقۇرىلىمدىق جوسپار شەڭبەرىندە 2030 جىلعا قاراي جىلۋمەن جابدىقتاۋ جەلىلەرىنىڭ توزۋىن 43%-عا دەيىن تومەندەتۋدى كوزدەيتىن 1,6 مىڭ شاقىرىمدى جوندەۋگە تاپسىرىستار بەرىلدى.

جىلۋمەن جابدىقتاۋ جەلىلەرىنىڭ توزۋىن ازايتۋ ماقساتىندا 2023 جىلى رەسپۋبليكالىق بيۋدجەت ەسەبىنەن جالپى سوماسى 116,3 ملرد تەڭگەگە 131 كم جىلۋمەن جابدىقتاۋ جەلىلەرى جوندەلدى.

بيىل رەسپۋبليكالىق بيۋدجەت ەسەبىنەن 92,5 ملرد تەڭگە سوماسىنا شامامەن 160 شاقىرىم جىلۋمەن جابدىقتاۋ جەلىلەرىن جوندەۋ جوسپارلانىپ وتىر.

Abai.kz