ۇكىمەت مۇشەلەرى قازاقستاندا اتوم ەلەكتر ستانتسياسىن سالۋ بويىنشا رەفەرەندۋم وتكىزۋگە بايلانىستى قاۋلىعا داۋىس بەرىپ، ءبىراۋىزدان قابىلدادى.

رەفەرەندۋمنىڭ كۇزدە وتەتىنىن مەملەكەت باسشىسى قاسىم-جومارت توقاەۆ ايتقان بولاتىن. بۇگىنگە دەيىن 20 قالادا تالقىلاۋ بولىپ، قوعام پىكىرى ەسكەرىلدى. اەس سالۋعا ەلىمىزدەگى ساياسي پارتيالار دا ءۇن قوسۋدا.

سۋرەت: amanatpartiasy.kz

«امانات» پارتياسى نە دەيدى؟

«امانات» پارتياسىنىڭ وكىلى  ەلنۇر بەيسەنباي، پارتيا ءوز ۇستانىمىن الداعى ۋاقىتتا جاريا ەتەدى دەيدى. ول: «ءبىز اەس سالۋعا بايلانىستى پارتيانىڭ ۇستانىمىن الداعى ۋاقىتتا جاريالايتىن بولامىز. ال مەنىڭ جەكە پىكىرىمە كەلسەك، اەس سالۋ كەرەكپىز. ءبىز وعان بولاشاقتاعى التەرناتيۆتى ەنەرگيا كوزى رەتىندە قاراۋىمىز كەرەك. بىرىنشىدەن ول جوعارعى تەحنولوگيا. ەكىنشىدەن بۇل ءبىزدىڭ مەملەكتىمىزگە ءبىلىم مەن عىلىمنىڭ دامۋىنا ۇلكەن ىقپالىن تيگىزەتىن بولادى. قوعامدا ءارتۇرلى ۇرەي مەن قاۋىپ-قاتەر بار. ءبىرشاما زەرتتەۋلەر مەن ۇكىمەت بەرگەن ساراپتامالار بار. الەمدىك تاجىريبە دە  ەسكەرىلەدى. الەمدە 30-دان استام مەملەكەتتە اەس بار»، - دەدى (دەرەككوزى: ازاتتىق راديوسى).

سۋرەت: dalanews.kz

«بايتاق» پارتياسى نە دەيدى؟

ال  «بايتاق» پارتياسىنىڭ توراعاسى ازاماتحان امىرتاەۆتىڭ ايتۋى بويىنشا، الەمدە تازا، جاسىل ەنەرگيا كوزى — اتوم ەنەرگياسى بولىپ سانالادى.

«سەبەبى، كليماتتى تۇراقتى ۇستاپ قالۋ مەن قورشاعان ورتانى قورعاۋدى تەك اتوم ەلەكتر ستانتسياسى عانا قامتاماسىز ەتە الادى. ونىڭ ەنەرگياسى — ەكولوگيالىق تازا ەنەرگيا»،- دەپ باسا ايتتى BAYTAQ جاسىلدار پارتياسىنىڭ توراعاسى.

ونىڭ سوزىنشە، اتوم ەلەكتر ستانتسياسى عىلىمنىڭ جەتىستىگى.

«وڭتۇستىك كورەيا، جاپونيا، اقش، ەۋروپا جانە وزگە دە دامىعان ەلدەردىڭ ءبارى وزدەرىنە وسى ستانتسيانى سالىپ جاتىر. ءبىر عانا اقش-تىڭ وزىندە 99 اتوم ستانتسياسى بار. بۇل، ونىڭ قاۋىپسىزدىگىن دالەلدەيتىن بىردەن-ءبىر فاكتور».

سۋرەت: Google ىزدەۋ جۇيەسى

«اۋىل» پارتياسى نە دەيدى؟

سونىمەن قاتار «اۋىل» پارتياسى ساياسي كەڭەسىنىڭ اتوم ەلەكتر ستانتسياسى قۇرىلىسى بويىنشا جالپىحالىقتىق رەفەرەندۋم وتكىزۋگە بايلانىستى قازاقستان حالقىنا جانە پارتيا مۇشەلەرىنە ۇندەۋ جاسادى.

«الەمدىك ەكونوميكانىڭ قازىرگى جاعدايى، حالىقارالىق نارىقتارداعى قاتاڭ باسەكەلەستىكتىڭ ارتۋى، گەوساياسي تەكەتىرەستىڭ كۇشەيۋى ءاربىر مەملەكەتكە ەنەرگەتيكالىق قاۋىپسىزدىك ماسەلەلەرىنە باسا كوڭىل ءبولۋدى تالاپ ەتەدى. باسەكەگە قابىلەتتى، ءارى ساپالى ونەركاسىپ پەن اۋىل شارۋاشىلىعى ونىمدەرىن ءوندىرۋ وتاندىق ەنەرگەتيكانى قارقىندى دامىتۋ قاجەتتىلىگىن تۋىنداتىپ وتىر. ەلىمىزدە ءداستۇرلى جانە ءداستۇرلى ەمەس كوزدەردەن ەنەرگيا ءوندىرۋدىڭ وزىندىك پروبلەمالارى بار ەكەنى بەلگىلى. مىسالى، سوڭعى كەزدەرى سۋ تاپشىلىعىنىڭ ارتۋى ءبىزدى سۋ ەلەكتر ەنەرگياسىن ءوندىرۋدىڭ بولاشاعىنا كۇمانمەن قاراۋعا ماجبۇرلەيدى. مۇناي مەن گاز قورلارى دا شەكسىز ەمەس. سوندىقتان مۇناي، گاز قورلارىنا نەگىزدەلگەن ۇزاق مەرزىمدى پايدالانىلاتىن ەنەرگەتيكالىق جوبالاردى جوسپارلاۋ مۇمكىن ەمەس.

كومىر وتىنىن پايدالانۋ قازىردىڭ وزىندە كۇردەلى ەكولوگيالىق ماسەلەلەردى تۋىنداتۋدا. اتالمىش ەكولوگيالىق ماسەلەلەردىڭ ەڭ باستىسى – قۇرعاقشىلىققا، شولەيتتەنۋگە جانە اۋىل شارۋاشىلىعى ونىمدەرىنىڭ ۇلەسىن ايتارلىقتاي جوعالتۋعا الىپ كەلەتىن جاھاندىق كليماتتىڭ وزگەرۋى.

قازاقستاندا كۇن جانە جەل ەنەرگياسى سەكىلدى ءداستۇرلى ەمەس قۋات كوزدەرىنىڭ ايتارلىقتاي الەۋەتى بار. الايدا مۇنىڭ دا ەنەرگيا قورلارىن جيناقتاۋ جانە تۇراقتاندىرۋ سياقتى تەحنولوگيالىق ماسەلەلەردىڭ شەشىلمەۋى سالدارىنان كومىر مەن كومىرسۋتەكتەردى تولىقتاي الماستىرا المايتىنى بەلگىلى بولىپ وتىر. ەلىمىز قازىردىڭ وزىندە ەلەكتر قۋاتىنىڭ تاپشىلىعىن سەزىنۋدە جانە ونى ايتارلىقتاي كولەمدە يمپورتتاۋعا ءماجبۇر. ەلەكتر قۋاتىنىڭ تاپشىلىعى ورىن العاندا ونى ەڭ الدىمەن اۋىلدار مەن اۋىل شارۋاشىلىعى سالاسى وتكىر سەزىنەتىنىن كەزىندە جارىقسىز قالعان اۋىلداردىڭ مىسالىنان جاقسى بىلەمىز. قازىرگى تاڭدا اتوم ەلەكتروستانتسيالارى الەمدەگى كوپتەگەن ەلدەر ءۇشىن ەڭ تۇراقتى ەنەرگيا كوزدەرىنىڭ ءبىر بولىپ وتىر», - دەيدى «اۋىل» پارتياسىنىڭ مۇشەلەرى.

Abai.kz