شەۆروندارىندا ءۇش ايىر بەلگىسى بار ارميا 80 جىل بويى جاۋ ەتىگى باسپاعان كۋرسكى وبلىسىنىڭ جەرىن تاپتاپ، بەلگورود وبلىسىنا باسىپ كىرۋگە ۇمتىلىپ، ماسكەۋگە دروندارمەن شابۋىل جاساپ جاتىر عوي...

كەشە ۋكراينانىڭ اسكەرباسى، گەنەرال سىرسكي: «ءبىز كۋرسك وبلىسىنداعى 100 ەلدىمەكەندى ءوز باقىلاۋىمىزعا الدىق. بۇل 1294 شارشى شاقىرىم اۋماق. 594 باسقىنشى تۇتقىنعا الىندى. بۇل باعىتقا (كۋرسككە) رەسەي 30 مىڭ اسكەري قىزمەتكەرىن ورنالاستىرىپ جاتىر»، - دەدى.

كۋرسكى مايدانىنىڭ كارتاسى

قيانكەسكى شايقاستار ءجۇرىپ جاتقان نۇكتەلەر: بوركي، كورەنەۆو، كرەميانوە، مالايا لوكنيا، سپالنوە، ولگوۆكا، رۋسسكايا كونوپەلكا، اپاناسوۆكا، ۆيكتوروۆكا، كرۋگلەنكوە، كراسنوكتيابرسكي، ليۋبيموۆكا، ميرنىي، نوۆايا سوروچينا، وبۋحوۆكا، پلەحوۆو، سۆەردليكوۆو، سۋدجا، سناگوست جانە يۋجنىي ەلدىمەكەندەرى.

ۋكراينا اۆياتسيانى دا ىسكە قوسقان. نەگىزىنەن «ۆامپير» دەيتىن رسزو-نى جانە FPV درونداردى كوپتەپ قولدانۋدا.

ەكى نەگىزگى باعىتقا توقتالساق:

ءبىرىنشى باعىت: سۋدجا-كورەنەۆو-رىلسكى-لگوۆ جولىن بويلاپ جالعاسۋدا. بۇل جولدا: كازاچيا جانە مالايا لوكنيا، سۆەردليكوۆو، ليۋبيموۆكا ناعىز قانقاساپ بولىپ جاتقان جەرلەر.

ۋكراينا كۋرسك-رىلسك كولىك جولىن باقىلاۋعا الۋعا تىرىسۋدا. رەسەي بۇل تراسسانى ازاماتتىق قولدانىس ءۇشىن جابىق دەپ جاريالادى.

ەكىنشى باعىت: گلۋشكوۆو قورشاۋى. بۇل جولدا تەتكينودان باستاپ، زۆاننوە مەن گلۋشكوۆودان بۇرىلىپ، كوماروۆا، سناگوست پەن اپاناسوۆكادا اتوي سالىپ، ليۋبيموۆكا مەن سۆەردليكوۆودان قورشاۋدى جابۋعا بارىن سالۋدا.

قوسىمشا: ۋكراينا اسكەرى ءبىر جاقتا شەت جولدا بولشوە سولداتسكىگە، ورتا جولدا كرومسكيە بىكيگە دەيىن جەتكەنىن بىلەمىز.

ەندى تاقىپقا تۇزدىق رەتىندە ورىس ەركەكتەرىنىڭ بۇگىنگى وبرازى تۋرالى ەكى اۋىز ءسوز ايتايىق:

رەسەي حالقى رەسەيدى قورعاعىسى كەلمەيدى!

ۋكراينا اسكەرى ءۇش اپتا بولدى، رەسەيدىڭ ىشكى تەرريتورياسىنا اسكەر كىرگىزىپ، ءجۇز شاقتى ەلدىمەكەندى وزىنە باعىندىردى. مۇنىمەن قويماي، ور قازىپ بەكىنە باستادى. ال «الەمنىڭ ەكىنشى اسكەرى» دەپ اسپەتتەلگەن ارميا ءۇش اپتادان بەرى ۋكراينانى كۋرسكىدەن قۋىپ شىعا الماي وتىر. ونىڭ باستى سەبەبى – رەسەي ارمياسىنداعى ادام تاپشىلىعى!

سوعىستىڭ العاشقى كۇندەرىنەن كۇنى بۇگىنگە دەيىن رەسەي بيلىگىنىڭ ناسيحاتتىق ماشيناسى توقتاۋسىز «پاتريوتيزم»، «اسكەرگە شاقىرۋ»، «ورىستىڭ جەرىن قورعاۋ» تۋرالى جاقتارى تالعانشا سويلەپ جاتسا دا، ولارىنان تۇك شىقپادى. كەرىسىنشە يليا مۋرومەتستىڭ، كاپيتان ءتۋشيننىڭ جانە كراسنودوننىڭ جاس گۆاردياسىنىڭ ەرلىكتەرىمەن تاربيەلەنگەن ورىس ەركەكتەرى اسكەري كوميسسارياتتاردىڭ ماڭىن توپىرلاي شاڭ قىلۋدىڭ ورنىنا وڭتۇستىك قاپقاز بەن ورتالىق ازياعا توپىرلاي قاشتى.

وسىدان سوڭ، امالى قۇرىعان رەسەي اسكەري بيلىگى سوعىسقا ادامداردى اقشامەن ارباۋ امالىنا كوشتى. رەسەي ەركەكتەرى وتاندى اقشاعا عانا قورعايتىن كۇيگە قالاي ءتۇستى؟ بۇعان 2 فاكتوردى اتاۋعا بولادى.

بىرىنشىدەن: بۇگىنگى رەسەي ەركەكتەرى قاراقان باستىڭ قامىن عانا ويلايتىن كۇيگە جەتكەن. ولار الدەقاشان جايلى ءومىردىڭ بەسىگىنە بولەنگەن، «وتان» ۇعىمىنىڭ كوك تيىندىق قۇنى جوق.

ەكىنشىدەن: «ايەلدەر ءالى دە بالا تاۋىپ بەرەدى» دەگەن جۋكوۆ ۇرانىنىڭ كۇنى وتكەن. بۇگىندە ورتاشا ستاتيستيكالىق ورىس وتباسىسىندا ەكى بالادان كەم بولماسا، ارتىق ەمەس! سوندىقتان، ەسى دۇرىس بىردە-ءبىر انا ۇلىن سوعىسقا، ولىمگە جىبەرمەيدى. رەسەيلىك ناسيحات وسى فاكتوردى دا ەلەمەدى. ويتكەنى، تۋى تومەن ەلدە اسكەر جيناۋ - اسا ۇلكەن پروبلەما!

Abai.kz