2026 جىلعى 3 قازاندا كوك-جايلاۋدا الماتى جاستارى مەن ستۋدەنتتەرىنىڭ قاتىسۋىمەن اعاش وتىرعىزۋ جونىندەگى ەكولوگيالىق اكتسيا ءوتتى. باستاماعا قازاقستان رەسپۋبليكاسىنىڭ ەكولوگيا جانە تابيعي رەسۋرستار ءمينيسترى الىبەك قۋانتىروۆ، الماتى قالاسىنىڭ اكىمى دارحان ساتىبالدى، «Kazakh Tourism Development Ltd.» كومپانياسىنىڭ باس اتقارۋشى ديرەكتورى ەرجان ەركىنباەۆ، سونداي-اق بەيىندى عىلىمي ۇيىمداردىڭ وكىلدەرى قاتىستى. اكتسيا اياسىندا قاتىسۋشىلار 2 000-عا جۋىق شرەنك شىرشاسىن وتىرعىزدى.

ەكولوگيالىق اكتسيا Almaty SuperSki جوباسى توڭىرەگىندە الماتى جاستارىمەن جۇرگىزىلگەن اشىق ديالوگتىڭ جالعاسى بولدى. بۇعان دەيىن جاس الماتىلىقتار جوبانى، ونىڭ تاۋلى اۋماقتاردىڭ دامۋىنا ىقپالىن جانە كوك-جايلاۋدىڭ بولاشاعىن تالقىلاۋ جونىندە باستاما كوتەرگەن بولاتىن. بىرقاتار كەزدەسۋلەر بارىسىندا ستۋدەنتتەر مەن جاستار وزدەرىن قىزىقتىرعان سۇراقتارىن قويىپ، پىكىرلەرىن ءبىلدىرىپ، ۇسىنىستارىن جوبا وكىلدەرىمەن تالقىلاۋعا مۇمكىندىك الدى.

جاستاردىڭ ەكولوگيالىق اكتسياعا قاتىسۋى وسى ديالوگتىڭ ناقتى ىسپەن جالعاسۋىنا اينالدى. جاس الماتىلىقتار اعاش وتىرعىزۋعا تىكەلەي قاتىسىپ، تابيعي اۋماقتى ساقتاۋعا ءوز ۇلەستەرىن قوستى. اكتسيا ەكولوگيالىق مادەنيەتتى قالىپتاستىرۋعا، تاۋعا ۇقىپتى قاراۋعا جانە جاس ۇرپاقتى ناقتى تابيعاتتى قورعاۋ باستامالارىنا تارتۋعا باعىتتالدى.

اكتسيانىڭ ماڭىزدى ساتتەرىنىڭ ءبىرى - باسشىلىق پەن شاقىرىلعان قاتىسۋشىلاردىڭ العاشقى اعاشتى بىرلەسىپ وتىرعىزۋى بولدى. ودان كەيىن قاتىسۋشىلار بەلگىلەنگەن ۋچاسكەلەرگە ءبولىنىپ، جاپپاي اعاش وتىرعىزۋعا كىرىستى.

«بۇگىن بولاشاق كوك-جايلاۋ كۋرورتىنىڭ اۋماعىندا اعاش وتىرعىزۋ جونىندەگى ەكولوگيالىق اكتسيا ءوتىپ جاتىر. بۇل - الماتى مەن بۇكىل ءوڭىردىڭ تۋريستىك دامۋىنا جاڭا سەرپىن بەرىپ، قالا تۇرعىندارى مەن قوناقتارى ءۇشىن قوسىمشا مۇمكىندىكتەر قالىپتاستىرۋعا باعىتتالعان ماڭىزدى جوبا.

سونىمەن قاتار تۋريستىك ينفراقۇرىلىمدى دامىتۋ تابيعاتتى ساقتاۋعا ەرەكشە نازار اۋدارا وتىرىپ جۇزەگە اسىرىلۋعا ءتيىس. ءبىز تابيعي رەسۋرستاردى جاۋاپكەرشىلىكپەن پايدالانۋ قاعيداتىن باسشىلىققا الامىز: الىناتىن ءاربىر اعاشتىڭ ورنىنا ون اعاشتان وتەمدىك وتىرعىزۋ قامتاماسىز ەتىلەدى. بۇل رەتتە تۋريستىك كلاستەردى ىسكە اسىرۋ ايماعىنداعى قىزىل كىتاپقا ەنگىزىلگەن بىردە-ءبىر اعاش كوشىرىلمەيدى جانە الىنبايدى.

بارلىق ەكولوگيالىق تالاپتار ساقتالعان جاعدايدا جوبانى ىسكە اسىرۋ تۋريزم مەن ەكونوميكانىڭ دامۋىن تابيعي مۇرانى ساقتاۋمەن ۇشتاستىرۋعا مۇمكىندىك بەرەتىنىنە سەنىمدىمىن. بۇل - ءبىز ساقتاپ، كەلەر ۇرپاققا جەتكىزۋگە ءتيىس بايلىعىمىز», - دەدى ءا. قۋانتىروۆ.

الماتى قالاسىنىڭ اكىمى د. ساتىبالدى جاس الماتىلىقتاردىڭ ەكولوگيالىق باستامالارعا قاتىسۋىنىڭ ماڭىزىن اتاپ ءوتتى: «تاۋ - الماتىنىڭ اجىراماس بولىگى ءارى قالانىڭ وزىندىك بولمىسىنىڭ ءبىر بەلگىسى. ءبىز ءۇشىن جاستاردىڭ قالانىڭ بولاشاعى مەن ونىڭ تابيعي اۋماقتارىنا قاتىستى ماسەلەلەردەن شەت قالماۋى ماڭىزدى. مۇنداي باستامالار ەكولوگيا تۋرالى ءسوز قوزعاپ قانا قويماي، تابيعاتتى ساقتاۋعا باعىتتالعان ناقتى جۇمىستارعا تىكەلەي قاتىسۋعا مۇمكىندىك بەرەدى».

ەرجان ەركىنباەۆ ەكولوگيالىق ءىس-شارالار Almaty SuperSki جوباسىن ىسكە اسىرۋدىڭ كەلەسى كەزەڭدەرىنەن بۇرىن جۇرگىزىلۋى ءتيىس ەكەنىن اتاپ ءوتتى.

«الماتى جاستارىنىڭ قالانىڭ، تاۋلارىمىزدىڭ جانە كوك-جايلاۋدىڭ بولاشاعىنا وزدەرى قىزىعۋشىلىق تانىتىپ وتىرعانى ءبىز ءۇشىن ماڭىزدى. ءبىز بۇعان دەيىن بىرقاتار اشىق كەزدەسۋ وتكىزىپ، جاستاردىڭ پىكىرىن تىڭداپ، ولاردىڭ سۇراقتارىنا جاۋاپ بەردىك. ءبىزدىڭ ۇستانىمىمىز ايقىن: كەز كەلگەن دامۋ تابيعاتقا قۇرمەتتەن باستالۋى كەرەك. سوندىقتان Almaty SuperSki جوباسىن ىسكە اسىرۋدىڭ كەلەسى كەزەڭدەرىنە دەيىن ءبىز ناقتى ەكولوگيالىق قادامداردان باستايمىز. جاڭا اعاشتار وتىرعىزۋ - سونداي قادامداردىڭ ءبىرى. كوك-جايلاۋ الماتىنىڭ وكپەسى بولىپ قالا بەرەدى», - دەدى ول.

اكتسياعا ستۋدەنتتەر مەن جاس الماتىلىقتار، سونىڭ ىشىندە بەيىندى باعىتتاردا ءبىلىم الىپ جۇرگەن جاستار قاتىستى. سونداي-اق اكتسياعا ءال-فارابي اتىنداعى قازاق ۇلتتىق ۋنيۆەرسيتەتىنىڭ بيولوگيا جانە بيوتەحنولوگيا فاكۋلتەتىنىڭ بوتانيكا جانە اگروەكولوگيا كافەدراسىنىڭ جانە باسقا دا بەيىندى عىلىمي ۇيىمداردىڭ وكىلدەرى قوسىلدى.

Abai.kz