رەسەي ۋكرايناعا قارسى باسقىنشىلىق سوعىس باستاعالى-بەرى الەمنىڭ ءبىرسىپىرا ەلى ماسكەۋ مەن كيەۆ اراسىندا بەيبىت كەلىسسوزدەر ۇيىمداستىرۋعا تىرىستى. بۇل تۋرالى Mezgil.kz اقپاراتتىق پورتالى جازدى. 

الايدا وسى ۋاقىتقا دەيىن بۇل ارەكەتتەردىڭ بارلىعى دەرلىك  ساتسىز اياقتالدى. 

العاشقى بەيبىت كەلىسسوزدەر

بەيبىت ديالوگتىڭ العاشقى باستاماشىسى – الەكساندر لۋكاشەنكو بولدى. رەسەي-ۋكراينا كەلىسسوزدەرىنىڭ العاشقى ءۇش كەزەڭى بەلارۋستە ءوتتى: دەلەگاتسيالار گومەلدە ءبىر مارتە، برەستتە ەكى مارتە كەزدەستى. الايدا تاراپتار وق اتۋدى توقتاتۋ ماسەلەسىندە ىلگەرىلەۋگە قول جەتكىزە المادى.

ەردوعاننىڭ باستاماسى

تۇركيا پرەزيدەنتى رەجەپ تايىپ ەردوعان دا كەلىسسوزدەر وتكىزۋ الاڭى رەتىندە ءوز ەلىن ۇسىنىپ، كەلىسسوزدەر ىستامبۇلدا ءوتتى. تۇركيا باسشىسىنىڭ باستاماسىمەن استىق كەلىسىمى جۇزەگە اسىرىلدى. رەسەي مەن ۋكراينا اراسىنداعى كەلىسسوزدەر رەسەي، ۋكراينا، تۇركيا جانە بۇۇ اراسىنداعى كەلىسىمگە قول قويۋمەن اياقتالدى. قۇجاتتا اۋىل شارۋاشىلىعى جۇكتەرىن تاسىمالداۋ ءۇشىن تەڭىز ءدالىزىن ۇيىمداستىرۋ كوزدەلگەن.

زەلەنسكي: «پۋتينمەن كەلىسسوز جاساۋ مۇمكىن ەمەس!»

كەيىن ۋكراينا پرەزيدەنتى زەلەنسكي رەسەي پرەزيدەنتى ۆلاديمير پۋتينمەن كەلىسسوزدەردىڭ «مۇمكىن ەمەستىگى» تۋرالى جارلىق شىعاردى، بۇل رەتتە ۋكراينا «كەلىسسوزدەر بويىنشا كوشباسشى بولدى جانە سولاي بولىپ قالا بەرەدى» دەپ مالىمدەدى.

قىتايدىڭ «بەيبىت جوسپارى»

قحر كوشباسشىسى سي تسزينپين دە ۋكراينا قاقتىعىسى بويىنشا كەلىسسوزدەر جۇرگىزۋگە شاقىردى. قىتايدىڭ سىرتقى ىستەر مينيسترلىگى جوسپاردىڭ ءماتىنىن ءوزىنىڭ رەسمي سايتىندا جاريالادى.

قىتاي ۋكرايناداعى ۇرىس قيمىلدارىن توقتاتۋدى، رەسەيگە قارسى بىرجاقتى سانكتسيالاردى الىپ تاستاۋدى، بارلىق ەلدەردىڭ ەگەمەندىگى قاعيداتتارىن ساقتاۋدى، گۋمانيتارلىق دالىزدەردى ۇيىمداستىرۋعا جاردەمدەسۋدى جانە تۇرىكتىڭ «استىق مامىلەسىن» قولداۋدى ۇسىندى. الايدا اقش پەن ۋكراينا بەيجىڭنىڭ جوسپارىن كەرى قايتارىپ، ونى «رەسەيگە عانا ءتيىمدى» دەپ اتادى.

ريم پاپاسىنىڭ بەيبىتشىلىككە شاقىرۋى

رەسەي مەن ۋكراينا كەلىسسوزدەرىندە دەلدال بولۋ باستاماسىن ريم پاپاسى فرانتسيسك تە كوتەردى. 2022 جىلدىڭ قاراشاسىندا ول قاقتىعىستى رەتتەۋگە جاردەمدەسۋ ءۇشىن رەسەي مەن ۋكرايناعا ءوز ەلشىلەرىن جىبەرۋگە نيەتتى ەكەنىن مالىمدەدى. بىراق ۆاتيكان ازىرگە بۇل ءۇشىن ەشقانداي قادام جاساماعان.

فرانتسيانىڭ «بەيبىت باستاماسى»

فرانتسيا پرەزيدەنتى ەممانۋەل ماكرون ۋكراينا قاقتىعىسىن رەتتەۋ جونىندەگى جوسپاردى ۇسىنىپ، بەيجىڭدى ونىمەن بىرلەسىپ جۇمىس ىستەۋگە شاقىردى. الايدا فرانتسۋز بەيبىت باستاماسىنىڭ ەگجەي-تەگجەيى، سونداي-اق، ەو-نىڭ باسقا ەلدەرى مەن ۋكراينا ونى قولدايتىنى بەلگىسىز.

برازيليا دا بەيبىت الاڭ بولۋعا نيەت ءبىلدىردى

2023 جىلدىڭ ساۋىرىندە برازيليانىڭ پرەزيدەنتى لۋلا دا سيلۆا G20 فورماتىن قۇرۋ يدەياسىن ۇسىندى. بۇعان دەيىن ول ۋكرايناعا بەيبىتشىلىككە قول جەتكىزۋ ءۇشىن قىرىمعا دەگەن تالاپتارىنان باس تارتۋعا تۋرا كەلەتىنىن ايتقان. بىراق، برازيليانىڭ دا ۇسىنىسى سىنعا ۇشىرادى.

قازاقستان دا «بەيبىت كەلىسسوزدەرگە» الاڭ ۇسىندى

كۇنى كەشە نەمىس كانتسلەرى ولاف شولتسپەن استانادا جەكە جولىققان قازاقستان پرەزيدەنتى رەسەي-ۋكرايناسوعىسىن بەيبىت شەشۋگە الاڭ ۇسىندى. ارينە، جاھاندىق باق پرەزيدەنت توقاەۆتىڭ: «رەسەي اسكەري تۇرعىدان جەڭىلمەيتىنى فاكتى بولىپ تابىلادى. سوعىستىڭ ودان ءارى ءورشۋى بۇكىل ادامزات ءۇشىن، ەڭ الدىمەن رەسەي-ۋكراينا قاقتىعىسىنا تىكەلەي تارتىلعان بارلىق ەلدەر ءۇشىن ورنى تولماس سالدارعا اكەلەدى»، - دەگەن سوزدەرىنە عانا ءمان بەردى.

الايدا، ءدال وسىنىڭ الدىندا قر سىرتقى ىستەر ۆيتسە-مينيستر رومان ۆاسيلەنكو نەمىس اقپاراتىنا سۇحبات بەرىپ، سوعىسىپ جاتقان قوس ەلگە كەلىسسوز الاڭىن ۇسىناتىنىن ايتقان ەدى. بۇل ءسوزدى پرەزيدەنت توقاەۆ تا راستادى. توقاەۆ ءتۇرلى ەلدەردىڭ بارلىق بەيبىت باستامالارىن مۇقيات قاراۋعا جانە «اسكەري ءىس-قيمىلداردى توقتاتۋ تۋرالى شەشىمگە كەلۋگە، سودان كەيىن اۋماقتىق ماسەلەلەردى تالقىلاۋعا كوشۋگە» شاقىردى.

«قازاقستاندا ۋكراين حالقىنا، ونىڭ وزىندىك مادەنيەتىنە شىنايى سۇيىسپەنشىلىكپەن قارايدى. ءبىزدىڭ مەملەكەتتەرىمىز اراسىندا ەشقاشان كەلىسپەۋشىلىك بولعان ەمەس»، - دەپ مالىمدەدى توقاەۆ.

Abai.kz