قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ شانحاي ىنتىماقتاستىق ۇيىمىنا مۇشە مەملەكەتتەر ۇكىمەتتەرى باسشىلارى كەڭەسىنىڭ وتىرىسىنا قاتىسۋ ءۇشىن يسلاماباد قالاسىنا باردى. بۇل تۋرالى ۇكىمەتتىڭ ءباسپاسوز قىزمەتى حابارلادى. 

بارعان ساتتە پاكىستان پرەمەر-ءمينيسترى شاحباز شاريفپەن كەزدەسۋ ءوتتى. ەكىجاقتى ساۋدا-ەكونوميكالىق ىنتىماقتاستىقتىڭ قازىرگى جاعدايى مەن ودان ءارى دامۋ پەرسپەكتيۆالارى، سونداي-اق تسيفرلاندىرۋ سالاسىنداعى ءوزارا ءىس-قيمىل تالقىلاندى.

ولجاس بەكتەنوۆ مەملەكەت باسشىسى قاسىم-جومارت توقاەۆ قازاقستان مەن پاكىستان اراسىنداعى ەكونوميكالىق كووپەراتسيا الەۋەتىنە ەرەكشە نازار اۋداراتىنىن اتاپ ءوتتى.

بيىلعى 8 ايدىڭ قورىتىندىسى بويىنشا ەكىجاقتى تاۋار اينالىمى 16%-عا ءوسىپ، شامامەن $40 ملن-دى قۇرادى. قولدانىستاعى الەۋەتتى اشۋ ءۇشىن تاراپتار تاۋار اينالىمىن ءارتاراپتاندىرۋدى جالعاستىرۋعا نيەتتى. قازاقستان پاكىستان نارىعىنا جالپى قۇنى $490 ملن-نان اساتىن 85 تاۋار ءتۇرى بويىنشا جەتكىزۋ كولەمىن ارتتىرۋعا، ونىڭ ىشىندە جەتكىزىلەتىن مۇناي-حيميا، مەتاللۋرگيا، حيميا، فارماتسەۆتيكا سالالارىنىڭ، سونداي-اق تاماق ونەركاسىبى مەن ماشينا جاساۋ ونىمدەرىنىڭ نومەنكلاتۋراسىن كەڭەيتۋگە دايىن.

سونىمەن قاتار اۋىل شارۋاشىلىعى سالاسىنداعى ىنتىماقتاستىققا نازار اۋدارىلدى. بيىلعى قاڭتار-تامىزدا قازاقستاندىق اۋىل شارۋاشىلىعى ونىمدەرىن جەتكىزۋ كولەمى 2 ەسەگە جۋىق ءوسىپ، $7,7 ملن-دى قۇرادى. قازاقستاننان اكەلىنەتىن كوكونىستەر مەن ءداندى داقىلدار پاكىستان نارىعىندا سۇرانىسقا يە. بيىل كۇتىلەتىن جوعارى ءونىمدى ەسكەرە وتىرىپ، قازاقستان ۇكىمەتى پاكىستانعا ءداندى داقىلدار جەتكىزۋ كولەمىن جىل سايىن 2 ملن تونناعا دەيىن ارتتىرۋعا دايىن.

ترانزيتتىك-كولىك سالاسىندا تەمىرجول جۇك تاسىمالى كولەمىنىڭ ءۇش ەسەگە ارتۋى جانە اۆتوموبيل كولىگىمەن ترانزيتتىك تاسىمالدىڭ ءتورت ەسەگە ءوسۋى اياسىندا ۇكىمەتتەر باسشىلارى قولدانىستاعى «قازاقستان–وزبەكستان–اۋعانستان–پاكىستان» مۋلتيمودالدى باعىتىن جانە «قازاقستان–تۇرىكمەنستان–اۋعانستان–پاكىستان» جاڭا كولىك ءدالىزىن ودان ءارى دامىتۋ پەرسپەكتيۆالارىن تالقىلادى.

ەكى ەل ساۋدا-ەكونوميكالىق جانە مادەني-گۋمانيتارلىق قاتىناستاردىڭ بارلىق سپەكترى بويىنشا ءوزارا ءىس-قيمىلدى كەڭەيتۋدى جالعاستىرادى.

Abai.kz